ବିଶାଖାପାଟନମ୍,୨୪/୦୩: ଆଇପିଏଲ୍ ୨୦୨୫ ର ଚତୁର୍ଥ ମ୍ୟାଚ୍ ଦିଲ୍ଲୀ କ୍ୟାପିଟାଲ୍ସ ଏବଂ ଲକ୍ଷ୍ନୌ ସୁପର ଜିଆଣ୍ଟସ୍ ମଧ୍ୟରେ ବିଶାଖାପାଟନମ କ୍ରିକେଟ୍ ଷ୍ଟାଡିୟମରେ ଖେଳାଯାଇଛି। ତମାମ ମୁକାବିଲାରେ ଦିଲ୍ଲୀ କ୍ୟାପିଟାଲ୍ସ ଏକ ରୋମାଞ୍ଚର ବିଜୟ ହାସଲ କରିଛି। ଆଶୁତୋଷ ଶର୍ମାଙ୍କ ଯୋଗୁ ହାରିବାକୁ ଥିବା ମ୍ୟାଚ୍କୁ ଜିତିନେଇଛି ଦିଲ୍ଲୀ କ୍ୟାପିଟାଲ୍ସ। ଆଶୁତୋଷ ଶର୍ମା ୩୧ ବଲ୍ରେ ୫ଟି ଚୌକା ଓ ୫ଟି ଛକା ମାରି ୬୬ ରନ୍ର ଏକ ଦର୍ଶନୀୟ ପାଳି ଖେଳିଥିଲେ। ଅନ୍ୟମାନଙ୍କ ମଧ୍ୟରେ ଭିପରାଜ ନିଗମ ୩୯ ରନ୍, ତ୍ରିଷ୍ଟନ୍ ଷ୍ଟବ୍ସ ୩୪, ଫାପ୍ ଡୁ ପ୍ଳେସିସ୍ ୨୯ ଏବଂ ଅକ୍ଷର ପଟେଲ୍ ୨୨ ରନ୍ କରିଥିଲେ। ଅନ୍ୟ କୌଣସି ବ୍ୟାଟର ଦୁଇ ଅଙ୍କ ଛୁଇଁବାରେ ସକ୍ଷମ ହୋଇନଥିଲେ।
ଏହି ମ୍ୟାଚରେ ଦିଲ୍ଲୀ କ୍ୟାପିଟାଲ୍ସ ଅଧିନାୟକ ଅକ୍ଷର ପଟେଲ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମେ ବ୍ୟାଟିଂ କରି ଲକ୍ଷ୍ନୌ ସୁପର ଜିଆଣ୍ଟସ୍ ୨୦ ଓଭରରେ ୮ ୱିକେଟ୍ ହରାଇ ୨୦୯ ରନ୍ ସଂଗ୍ରହ କରିଥିଲେ। ଲକ୍ଷ୍ନୌ ପକ୍ଷରୁ ମିଚେଲ ମାର୍ଶ ୩୬ ଟି ବଲରେ ୭୨ ରନ୍ ସଂଗ୍ରହ କରିଥିଲେ। ନିକୋଲାସ ପୁରନ ୩୦ ବଲରେ ୭୫ ରନର ଚମତ୍କାର ଇନିଂସ ଖେଳିଥିଲେ। ମିଚେଲ ମାର୍ଶ ଦିଲ୍ଲୀ ପାଇଁ ସର୍ବାଧିକ ୩ଟି ୱିକେଟ୍ ନେଇଥିଲେ। ଅନ୍ୟମାନଙ୍କ ମଧ୍ୟରେ କୁଲଦୀପ ଯାଦବ ମଧ୍ୟ ଦୁଇଟି ୱିକେଟ୍ ନେଇଥିଲେ।
