ନୂଆଦିଲ୍ଲୀ, ୨୨।୫: ୨୦୨୬ ଅଗଷ୍ଟ ପୂର୍ବରୁ ଗଡ଼ିପାରେ ଦେଶର ପ୍ରଥମ ବୁଲେଟ ଟ୍ରେନ । ଦେଶର ଏହି ଦ୍ରୁତଗାମୀ ରେଳ କରିଡରକୁ ମୁମ୍ବାଇ ଏବଂ ଅହମ୍ମଦାବାଦ ମଧ୍ୟରେ ବିକଶିତ କରାଯାଉଛି । ଜାପାନଭିତ୍ତିକ ହିତାଚି ଏବଂ କାୱାସାକି ଭାରତକୁ ବୁଲେଟ ଟ୍ରେନ ଯୋଗାଇବା ଲାଗି ଚୁକ୍ତିରେ ସାମିଲ ହୋଇଛନ୍ତି । ନ୍ୟାସନାଲ ହାଇସ୍ପିଡ ରେଲ କର୍ପୋରେସନ ମୁମ୍ବାଇ-ଅହମ୍ମଦାବାଦ ପ୍ରକଳ୍ପ ପାଇଁ ୧୮ ଟ୍ରେନ କିଣିବ । ଏଥିରେ ପ୍ରତ୍ୟେକ ଟ୍ରେନରେ ୧୦ଟି କୋଚ୍ ରହିବ । ଯେଉଁଥିରେ ୬୯୦ ଲୋକ ଯାତ୍ରା କରିପାରିବେ ।
ଭାରତ ବଜାରର ଆବଶ୍ୟକତା ଭିତ୍ତିରେ ଏହି ଟ୍ରେନଗୁଡିକୁ ପ୍ରସ୍ତୁତ କରାଯିବ । ଟ୍ରେନଗୁଡ଼ିକ ଘଣ୍ଟା ପ୍ରତି ୩୨୦ କିମି ବେଗରେ ଯାତ୍ରା କରିବାକୁ ସକ୍ଷମ ହେବ । ୫୦୮ କିମି ଦୂରତ୍ୱ ବିଶିଷ୍ଟ ଏହି ପ୍ରକଳ୍ପକୁ ୨୦୧୭ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଜାପାନର ତତ୍କାଳୀନ ପ୍ରଧାନମନ୍ତ୍ରୀ ସିଞ୍ଜୋ ଆବେ ଭିତ୍ତିପ୍ରସ୍ତର ସ୍ଥାପନ କରିଥିଲେ । ବୁଲେଟ ଟ୍ରେନ ଆରମ୍ଭ ହେଲେ ମୁମ୍ବାଇ ଏବଂ ଅହମ୍ମଦାବାଦ ମଧ୍ୟରେ ଦୂରତ୍ୱକୁ ମାତ୍ର ସାଢ଼େ ୩ ଘଣ୍ଟାରେ ପୂରଣ କରାଯାଇପାରିବ ।
