ଚନ୍ଦ୍ରଶେଖରପୁର,୧୯/୦୯: ଓଡ଼ିଶା କ୍ଷୁଦ୍ର ଓ ମଧ୍ୟମ ଉଦ୍ୟୋଗ ସଭା (ଓଏଏସ୍ଏମ୍ଇ) ଓ ଫ୍ୟୁଚରେକ୍ସ ଟ୍ରେଡ୍ ଫେୟାର ଆଣ୍ଡ୍ ଇଭେଣ୍ଟସ୍ ପ୍ରାଇଭେଟ୍ ଲିମିଟେଡ୍ର ମିଳିତ ଆନୁକୂଲ୍ୟରେ ଆସନ୍ତା ନଭେମ୍ବର ୨୧ରୁ ଜନତା ମଇଦାନରେ ‘ପ୍ରୋପ୍ୟାକ୍ ଓଡ଼ିଶା-୨୦୨୪' ଓ ‘ଓଡ଼ିଶା ପ୍ଲାଷ୍ଟ-୨୦୨୪'ପ୍ରଦର୍ଶନୀ ଅନୁଷ୍ଠିତ ହେବ ।
୪ ଦିନ ଧରି ଚାଲିବାକୁ ଥିବା ଏହି ତୃତୀୟ ପ୍ରଦର୍ଶନୀରେ ମୁଖ୍ୟତଃ ପ୍ଲାଷ୍ଟିକ, ପ୍ରିଣ୍ଟିଂ, ପ୍ୟାକେଜିଂ, କନ୍ଭର୍ଟିଂ ଏବଂ ଫୁଡ୍ ପ୍ରୋସେସିଂ ଇଣ୍ଡଷ୍ଟ୍ରି ଉପରେ ଗୁରୁତ୍ୱ ଦିଆଯିବ । ଭାରତର ବିଭିନ୍ନ ପ୍ରାନ୍ତରୁ ୨୫୦ରୁ ଅଧିକ କମ୍ପାନି ଏହି ପ୍ରଦର୍ଶନୀରେ ଅଂଶଗ୍ରହଣ କରି ସେମାନଙ୍କ ଉତ୍ପାଦ ପ୍ରଦର୍ଶନ କରାଇବାର କାର୍ଯ୍ୟକ୍ରମ ରହିଛି । ଏହି ମେଗା ଇଭେଣ୍ଟକୁ ଭାରତ ସରକାରଙ୍କ ଏମଏସ୍ଏମ୍ଇ ମନ୍ତ୍ରଣାଳୟ ଏବଂ ଓଡ଼ିଶା ସରକାରଙ୍କ ଏମ୍ଏସ୍ଏମ୍ଇ ବିଭାଗ ସମର୍ଥନ ମଧ୍ୟ କରୁଛନ୍ତି ବୋଲି ଆଜି ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି । ଓଏଏସ୍ଏମ୍ଇର ମହାସଚିବ ସାତ୍ୱିକ ସ୍ୱାଇଁ କହିଛନ୍ତି ଯେ, ଏହି ପ୍ରଦର୍ଶନୀରେ ବିଭିନ୍ନ କ୍ଷେତ୍ରଗୁଡ଼ିକରେ ଅତ୍ୟାଧୁନିକ ଉଦ୍ଭାବନ, ଉନ୍ନତ ଜ୍ଞାନକୌଶଳ ଏବଂ ଉଦୀୟମାନ ଧାରା ପ୍ରଦର୍ଶିତ ହେବ, ଯାହା ନେଟୱର୍କିଂ, ଶିକ୍ଷଣ ଏବଂ ଶିଳ୍ପ ନେତୃବୃନ୍ଦଙ୍କ ସହ ସହଯୋଗ ପାଇଁ ଏକ ଅତୁଳନୀୟ ପ୍ଲାଟଫର୍ମ ପ୍ରଦାନ କରିବ ।
ରାଜ୍ୟ ଏମଏସଏମଇଗୁଡିକ ପାଇଁ ବି୨ବି, ବି୨ସି ଏବଂ ବି୨ଜି ପାଇଁ ଏହା ଏକ ଉତ୍ତମ ପ୍ଲାଟଫର୍ମ ଯାହା ପ୍ରଦର୍ଶକ ଏବଂ ପର୍ଯ୍ୟଟକଙ୍କ ପାଇଁ ଉନ୍ନତ ନେଟୱର୍କିଂ ସୁଯୋଗ ସୃଷ୍ଟି ଉପରେ ଧ୍ୟାନ ଦେବ । ଏଥିରେ ଅନେକ ରାଜ୍ୟସ୍ତରୀୟ ଆଲୋଚନାଚକ୍ର ଓ ବୈଷୟିକ ଅଧିବେଶନର ଆୟୋଜନ କରାଯିବ । ଅନ୍ୟମାନଙ୍କ ମଧ୍ୟରେ ଫ୍ୟୁଚରେକ୍ସର ନିର୍ଦ୍ଦେଶକ ନମିତ୍ ଗୁପ୍ତା, ମେକାଟ୍ରୋନିକ୍ସ ମେସିନାରୀ ଆଣ୍ଡ ଟୁଲ୍ସ ଇଣ୍ଡିଆର ପରିଚାଳନା ନିର୍ଦ୍ଦେଶକ ଏସ୍ ଏସ୍ ଚୌହାନ ଏବଂ ଓଏଏସଏମଇର ଜ୍ୟୋତିର୍ମୟୀ ମହାନ୍ତି, ପ୍ରତିଶ୍ରୁତି ଜେନା, ରଞ୍ଜିତ ସାହୁ, ସବ୍ୟସାଚୀ ବେହେରା, ପରେଶ ସାହୁ, ସରୋଜ ପାତ୍ର ପ୍ରମୁଖ ଉପସ୍ଥିତ ଥିଲେ ।