ଭୁବନେଶ୍ବର, ୧୯।୯ : ବର୍ବରତାର ସବୁ ସୀମା ଟପିଯାଇଛି ଭରତପୁର ଥାନା ପୋଲିସ।  ଥାନାରେ ଦିଆଯାଇଥିଲା ମେଜରଙ୍କ ବାନ୍ଧବୀଙ୍କୁ  ଅକଥନୀୟ ନିର୍ଯାତନା। ଅଭିଯୋଗ କରିବାକୁ ଆସି ଥାନା ଭିତରେ ଖାଇବାକୁ ପଡିଥିଲା ଗୋଇଠା ଓ ମାଡ଼।  ରାତିତମାମ ଦିଆଯାଇଥିଲା ନିର୍ଯାତନା । ଏମ୍ସ ହସ୍ପିଟାଲରୁ ଡିସଚାର୍ଜ ପରେ ସେ ବଖାଣିଛନ୍ତି ସେଦିନ ରାତିର କଥା।  ଯାହାକୁ ଶୁଣିବା ପରେ  ଛାତି ଥରାଇ ଦେଇଥିଲା।  ପୋଲିସ୍ ବିରୋଧରେ ସଙ୍ଗୀନ ଅଭିଯୋଗ କରିବା ବେଳେ ସେ କାନ୍ଦି ପକାଇଥିଲେ। 

ଶନିବାର ରାତିର ଘଟଣା ସମ୍ପର୍କରେ କାନ୍ଦି କାନ୍ଦି ଗଣମାଧ୍ୟମ ଆଗରେ ସେ କହିଥିଲେ  । ସେଦିନ ରାତିରେ କିଭଳି ଭରତପୁର ଥାନାରେ ନିର୍ଯାତନା ଦିଆଯାଇଥିଲା ତାହା ବଖାଣିଥିଲେ। ପ୍ରଥମେ  ଚୁଟି ଧରି ତାଙ୍କୁ ଘୋଷାଡି ନେଇଥିଲେ। ତା’ ପରେ ଜଣେ ମହିଳା କନେଷ୍ଟବଳ ତାଙ୍କ ବେକ ଧରିଥିବା ବେଳେ ଅନ୍ୟ ଜଣେ କନେଷ୍ଟବଳ ଜ୍ୟାକେଟରେ ତାଙ୍କ ହାତ ବାନ୍ଧି ଦେଇଥିଲେ।  ଅନ୍ୟ ଜଣେ ମହିଳା କନେଷ୍ଟବଳ ତାଙ୍କ ଗୋଡ଼ ବାନ୍ଧି ଦେଇ ରୁମ୍ ରେ ବନ୍ଦ କରିଦେଇଥିଲେ । ନିଜର ପ୍ରତିରକ୍ଷା ପାଇଁ ସେ ଚିତ୍କାର କରିଥିଲେ। କିନ୍ତୁ ପୁରୁଷ କନେଷ୍ଟବଳ ଏବଂ ମହିଳା କନେଷ୍ଟବଳ ମିଶିକି ମାଡ଼ ମାରିଥିଲେ । ପରେ ଭୋରୁ ୨ କନେଷ୍ଟବଳଙ୍କ ସହ  ଆଇଆଇସି ଆସି  ତାଙ୍କୁ ଦୁର୍ବ୍ୟବହାର କରିବାକୁ ଚେଷ୍ଟା କରିଥିଲେ ବୋଲି ସେ କହିଛନ୍ତି।  ଜଣେ ଓକିଲ ହିସାବରେ ପୋଲିସ ସମ୍ମୁଖରେ ନିଜ ଉପରେ ହୋଇଥିବା ନିର୍ଯାତନାକୁ ଏଫଆଇଆରରେ ରଖିବାକୁ ଦାବି କରୁଥିବା ବେଳେ ପୋଲିସର ତାଙ୍କ ପ୍ରତି ଏବଂ ତାଙ୍କ   ବନ୍ଧୁଙ୍କ ପ୍ରତି ହୋଇଥିବା ଅକଥନୀୟ ଅତ୍ୟାଚାର କେଉଁ ଭଳି ଆଇନ ବୋଲି ସେ ପ୍ରଶ୍ନ କରିଛନ୍ତି। 

ସେପ୍ଟେମ୍ବର ୧୪ ତାରିଖ  ଶନିବାର ବିଳମ୍ବିତ ରାତିରେ ମେଜର ଓ ତାଙ୍କ ବାନ୍ଧବୀ ପଟିଆର ଏକ ରେସ୍ତୋରୋରୁ ଆସୁଥିଲେ। ରାସ୍ତାରେ ଏକ କାରକୁ ଓଭରଟେକ କରିବା ପରେ ପଛରୁ ଆସୁଥିବା ଗାଡ଼ିରୁ କିଛି ଯୁବକ ସେମାନଙ୍କୁ ଅଟକାଇ ଧକ୍କା ମାରିବା ସହ ଧମକ ଦେଇଥିଲେ । ଏନେଇ ମେଜର ଓ ତାଙ୍କ ବାନ୍ଧବୀ ଭରତପୁର ଥାନାକୁ ଅଭିଯୋଗ କରିବାକୁ ଯାଇଥିଲେ । ଜଣେ ମହିଳା ଅଫିସର ବିନା ୟୁନିଫର୍ମରେ ତାଙ୍କ ନିକଟକୁ ଆସିଥିଲେ । ଅଭିଯୋଗ ରଖିବାକୁ ତାଙ୍କୁ କହିବାପରେ ସେ ଶୁଣିନଥିଲେ । ଏନେଇ ଉଭୟଙ୍କ ମଧ୍ଯରେ ଯୁକ୍ତିତର୍କ ହୋଇଥିଲା । ଏହା ପରେ ପୋଲିସ ପକ୍ଷରୁ ଥାନାରେ ତାଙ୍କୁ ନିର୍ଯାତନା ଦିଆଯାଇଥିଲା। ପରବର୍ତ୍ତି ସମୟରେ ମେଜରଙ୍କ ବାନ୍ଧବୀଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିଲା। ଏହି ଘଟଣାରେ ଆଇଆଇସିଙ୍କ ସମେତ ୫ ଜଣଙ୍କୁ ନିଲମ୍ବନ କରାଯାଇଛି।