ନୂଆଦିଲ୍ଲୀ,୨୦/୦୯: ୨୦୩୦-୩୧ ସୁଦ୍ଧା ଭାରତ ପାଲଟିବ ବିଶ୍ୱର ତୃତୀୟ ବୃହତ୍ ଅର୍ଥବ୍ୟବସ୍ଥା । ଏଥିପାଇଁ ଏହା ଟ୍ରାକ୍ରେ ରହିଥିବା ଏସ୍ ଆଣ୍ଡ୍ ପି ଗ୍ଲୋବାଲ ଏହାର ରିପୋର୍ଟରେ ପ୍ରକାଶ କରିଛି । ଚଳିତ ଆର୍ଥିକବର୍ଷ ଦେଶର ଅର୍ଥବ୍ୟବସ୍ଥା ୬.୭% ହାରରେ ବଢ଼ିବ ବୋଲି ଏହା ଉଲ୍ଲେଖ କରିଛି । ରିପୋର୍ଟରେ କୁହାଯାଇଛି ଯେ, ୨୦୨୩- ୨୪ରେ ୮.୨% ଅଭିବୃଦ୍ଧି ହାସଲ କରିଛି ଭାରତ । ବ୍ୟବସାୟିକ ନେଣଦେଣ ଏବଂ ଲଜିଷ୍ଟିକ୍ସରେ ଉନ୍ନତି ଆଣିବା ପାଇଁ ନିରନ୍ତର ସଂସ୍କାର ଲୋଡ଼ା ବୋଲି ଏସ୍ ଆଣ୍ଡ୍ ପି ଗ୍ଲୋବାଲ ପ୍ରକାଶ କରିଛି । ଏହା ଦ୍ୱାରା ଘରୋଇ ନିବେଶ ବଢ଼ିବା ସହିତ ସରକାରୀ ପୁଞ୍ଜି ଉପରେ ନିର୍ଭରଶୀଳତା କମିବ ବୋଲି ଏହା କହିଛି ।
ମଜଭୁତ ଅଭିବୃଦ୍ଧି ସମ୍ଭାବନା ଏବଂ ଉତ୍ତମ ନିୟମାବଳୀ ଯୋଗୁ ଆଗକୁ ଭାରତୀୟ ଇକ୍ୱିଟି ବଜାରରେ ଉତ୍ସାହ ଦେଖିବାକୁ ମିଳିବ । ଦେଶ ପ୍ରମୁଖ ବିକାଶମୁଖୀ ବଜାର ସୂଚକାଙ୍କ ମଧ୍ୟରେ ସାମିଲ ହେବା ପରଠାରୁ ଭାରତୀୟ ସରକାରୀ ବଣ୍ଡ୍ଗୁଡ଼ିକରେ ବିଦେଶୀ ନିବେଶ ବଢୁଛି । ଏଥିରେ ଆହୁରି ଉନ୍ନତି ଦେଖିବାକୁ ମିଳିପାରେ ବୋଲି ଏସ୍ ଆଣ୍ଡ୍ ପି ଗ୍ଲୋବାଲ ଏହାର ରିପୋର୍ଟରେ ପ୍ରକାଶ କରିଛି ।
ଭାରତର ପାଖାପାଖି ୯୦% କାରବାର ସମୁଦ୍ରପଥରେ ହେଉଛି । ଏଣୁ ବନ୍ଦର ଭିତ୍ତିଭୂମିକୁ ମଜଭୁତ କରିବାର ଆବଶ୍ୟକତା ରହିଛି । ବର୍ଦ୍ଧିତ ରପ୍ତାନି ଏବଂ ପ୍ରଚୁର ପରିମାଣର ସାମଗ୍ରୀ ଆମଦାନି ଲାଗି ମଜଭୁତ ବନ୍ଦର ଭିତ୍ତିଭୂମିର ଆବଶ୍ୟକତା ରହିଥିବା ରିପୋର୍ଟରେ କୁହାଯାଇଛି ।
ରିପୋର୍ଟରେ ଆହୁରି ଉଲ୍ଲେଖ କରାଯାଇଛି ଯେ, କୃଷି ଅତ୍ୟାଧୁନିକ ଟେକ୍ନୋଲୋଜି ଉପରେ ନିର୍ଭର କରିବ ଏବଂ ନୂତନ ନୀତି ଭିତ୍ତିଭୂମିକୁ ମଜଭୁତ କରିବା ସହିତ ଉତ୍ପାଦକତା ବଢ଼ାଇବ । ଭାରତ ଏବେ ବର୍ଦ୍ଧିତ ଘରୋଇ ଶକ୍ତି ଚାହିଦାର ସାମ୍ନା କରୁଛି । ଏଭଳି କ୍ଷେତ୍ରରେ ନିରନ୍ତର ପ୍ରଯୁକ୍ତି ଯେପରି ଅକ୍ଷୟ ଶକ୍ତି ଏବଂ ନିମ୍ନ ପ୍ରଦୁଷଣକାରୀ ଇନ୍ଧନ ଉପରେ ଧ୍ୟାନ ଦିଆଯାଇପାରିବ । ଏହା ଦ୍ୱାରା ଏନର୍ଜି ଟ୍ରାଞ୍ଜିସନ ଯୋଜନାଗୁଡ଼ିକ ସହିତ ଶକ୍ତି ସୁରକ୍ଷାର ସନ୍ତୁଳନ ରକ୍ଷା କରାଯାଇପାରିବ ବୋଲି ରିପୋର୍ଟରେ କୁହାଯାଇଛି ।
