ନୂଆଦିଲ୍ଲୀ, ୧୨/୧୦ : ଏବେ ସବୁଆଡେ ପାର୍ବଣ ସେଲିବ୍ରେଶନ । ଇ-କମର୍ସ ପ୍ଲାଟ୍ଫର୍ମଗୁଡ଼ିକରେ ଜୋରଦାର ବିକ୍ରି ଚାଲିଛି । ଲୋକେ ଅନ୍ଲାଇନ୍ରେ ପୋଷାକ, ଗହଣା, ଆସବାବପତ୍ର ଏବଂ ଇଲେକ୍ଟ୍ରୋନିକ୍ସ ଆଦି ସାମଗ୍ରୀ କ୍ରୟରେ ବ୍ୟସ୍ତ । ତେବେ ଫେଷ୍ଟିଭ୍ ସେଲ୍ର ପ୍ରଥମ ସପ୍ତାହରେ ଲୋକେ ପ୍ରାୟ ୫୫,୦୦୦ କୋଟି ଟଙ୍କା ଉଡ଼ାଇସାରିଲେଣି । ଗତବର୍ଷ ତୁଳନାରେ ଏ କ୍ଷେତ୍ରରେ ୨୬% ଅଭିବୃଦ୍ଧି ଦେଖିବାକୁ ମିଳିଥିବା ଏକ ରିପୋର୍ଟରୁ ଜଣାପଡ଼ିଛି । ମୋଟ ବିକ୍ରିରେ ମୋବାଇଲ ଫୋନ୍, ଇଲେକ୍ଟ୍ରୋନିକ୍ସ, ଦୀର୍ଘସ୍ଥାୟୀ ଖାଉଟି ଉତ୍ପାଦ, ଗୃହପୋକରଣ ଏବଂ ପୋଷାକ ଆଦି ସେଗ୍ମେଣ୍ଟ୍ର ତିନି ଚତୁର୍ଥାଂଶ ଯୋଗଦାନ ରହିଥିବା ଜଣାପଡ଼ିଛି । ଡାଟମ୍ ଇଣ୍ଟେଲିଜେନ୍ସର ଆକଳନ ଅନୁସାରେ, ଇ-କମର୍ସ ପ୍ଲାଟ୍ଫର୍ମଗୁଡ଼ିକ ୨୦୨୩ ପାର୍ବଣ ତୁଳନାରେ ଚଳିତ ପାର୍ବଣର ପ୍ରଥମ ସପ୍ତାହରେ ୨୬% ଅଧିକ ବିକ୍ରି ଅଭିବୃଦ୍ଧି ହାସଲ କରିଛନ୍ତି । ସ୍ମାର୍ଟଫୋନ୍ ଏବଂ ଟିଭି ବିକ୍ରିରେ ଟିୟର-୨ ଏବଂ ଟିୟର-୩ ସହରଗୁଡ଼ିକର ଯୋଗଦାନ ୭୦%ରୁ ଅଧିକ ରହିଛି ।
ପ୍ରକାଶଯୋଗ୍ୟ, ପାର୍ବଣ ସେଲ୍ର ପ୍ରଥମ ସପ୍ତାହରେ ବିକ୍ରି ଅଧିକ ରହିଥାଏ । କାରଣ ଫେଷ୍ଟିଭ୍ ସେଲ୍ରେ ଗ୍ରାହକଙ୍କୁ ଆକର୍ଷଣୀୟ ଅଫର ଏବଂ ରିହାତି ମିଳିଯାଏ । ଶିଳ୍ପ ସହ ଜଡ଼ିତ ଜଣେ ଅଧିକାରୀଙ୍କ କହିବାନୁସାରେ, କ୍ଷୁଦ୍ର ସହରରେ ଥିବା ବଡ଼ ଭାଗ ଗ୍ରାହକ ହାୟର ଆଭେରେଜ୍ ସେଲିଂ ପ୍ରାଇସ୍(ଏଏସ୍ପି) ଦେଇ ସାମଗ୍ରୀ କିଣୁଛନ୍ତି । ସେହିଭଳି କିଛି ଗ୍ରାହକ ଇଏମ୍ଆଇ ବିକଳ୍ପ ବାଛୁଛନ୍ତି । ଚାହିଦା ଏତେ ମାତ୍ରାରେ ଅଧିକ ରହିଛି ଯେ ଯୋଗାଣଜନିତ ସମସ୍ୟାକୁ ନେଇ ଅନେକ ବ୍ରାଣ୍ଡ୍ ଏବେ ଚିନ୍ତିତ । ସେପ୍ଟେମ୍ବର ଅନ୍ତିମ ସପ୍ତାହରୁ ଇ-କମର୍ସ ପ୍ଲାଟ୍ଫର୍ମ ଫ୍ଲିପ୍କାର୍ଟ ଏବଂ ଆମାଜନ ଇଣ୍ଡିଆ ସେମାନଙ୍କ ବାର୍ଷିକ ଫେଷ୍ଟିଭ୍ ସେଲ୍ ଯଥାକ୍ରମେ ବିଗ୍ ବିଲିୟନ ଡେଜ୍ ଏବଂ ଗ୍ରେଟ୍ ଇଣ୍ଡିଆନ୍ ଫେଷ୍ଟିଭାଲ ଆରମ୍ଭ କରିଛନ୍ତି । ପାର୍ବଣ ଋତୁର ଆରମ୍ଭ ସେପ୍ଟେମ୍ବର ୨୬ରୁ ହୋଇଛି । ଏହା ନଭେମ୍ବର ୩ ପର୍ଯ୍ୟନ୍ତ ଚାଲିବ । ଏଥର ପାର୍ବଣରେ ୧ ଲକ୍ଷ କୋଟି ଟଙ୍କାର ବିକ୍ରି ଆଶା ରହିଛି । ସଫ୍ଟବ୍ୟାଙ୍କ ସମର୍ଥନପ୍ରାପ୍ତ ମିସୋ ଏହାର ମିସୋ ମେଗା ବ୍ଲକ୍ବଷ୍ଟର ସେଲ୍ ଆରମ୍ଭ କରିଛି । ଅର୍ଡର କ୍ଷେତ୍ରରେ ୪୦% ରୁ ଊଦ୍ଧ୍ୱର୍ ବୃଦ୍ଧି ଦେଖିବାକୁ ମିଳିଛି । ଟିୟର୨ ସହରରୁ ମଜଭୁତ ଚାହିଦା ଦେଖିବାକୁ ମିଳୁଛି । ଟିୟର-୪ ଏବଂ ଅନ୍ୟାନ୍ୟ ସ୍ଥାନରୁ ପାଖାପାଖି ୪୫% କ୍ରେତା ରହିଛନ୍ତି ।
ମିସୋ ସହ-ପ୍ରତିଷ୍ଠାତା ତଥା ମୁଖ୍ୟ କାର୍ଯ୍ୟନିର୍ବାହୀ ଭିଦିତ୍ ଆତ୍ରୈ କୁହନ୍ତି ଯେ, ଯୋଜନା ଅନୁସାରେ ଆମର ପ୍ରଥମ ସପ୍ତାହ ସେଲ୍ ଅତ୍ୟନ୍ତ ଆକର୍ଷଣୀୟ ରହିଛି । କାରଣ ଲୋକେ ଚାହାନ୍ତି ଯେ, ପୂଜାର ଯଥେଷ୍ଟ ପୂର୍ବରୁ ସେମାନଙ୍କ ନିକଟରେ ପ୍ରଡକ୍ଟ ପହଞ୍ଚିଯାଉ । ତେଣୁ ଆଗୁଆ ଅର୍ଡର ସଂଖ୍ୟା ବୃଦ୍ଧି ପାଇଛି । ଫ୍ଲିପ୍କାର୍ଟର ଜଣେ ଅଧିକାରୀ କହିଛନ୍ତି ଯେ, କମ୍ପାନି ଦେଶର ସମସ୍ତ ପିନ୍କୋଡ୍ରେ ତ୍ୱରିତ ଡେଲିଭରୀ ଉପରେ ଧ୍ୟାନ ଦେଇଆସୁଛି । ଏପରିକି ସମାନ ଦିନ ଏବଂ ପରବର୍ତ୍ତୀ ଦିନ ଡେଲିଭରୀ ସିଷ୍ଟମ୍କୁ ଏହା ସମ୍ପ୍ରସାରଣ କରିଛି । ନୂଆଦିଲ୍ଲୀ, କୋଲକାତା, ହାଇଦ୍ରାବାଦ ଏବଂ ବେଙ୍ଗାଲୁରୁରେ ଚାହିଦା ଢ଼େର ରହିଥିବାବେଳେ ମେଦିନପୁର, ହିସାର, ବ୍ରହ୍ମପୁର, ବଙ୍କୁରା ଏବଂ ଅଗର୍ତାଲା ଭଳି ଟିୟର-୨୍ମ ସହରଗୁଡ଼ିକରେ ବି ଚାହିଦା ମଜଭୁତ ରହିଛି । ରିପୋର୍ଟ ଅନୁସାରେ, ଫ୍ୟାଶନ୍, ଗ୍ରୋସେରି, ବିଉଟି ଏବଂ ପର୍ସନାଲ କେୟାର ସହ ଜଡ଼ିତ ସାମଗ୍ରୀ ବିକ୍ରିରେ ୨ରୁ ୩ ଗୁଣା ବୃଦ୍ଧି ଦେଖିବାକୁ ମିଳିଛି । ସ୍ମାର୍ଟ ଟିଭି, ଏୟାର୍ ଫ୍ରାୟର, ଲଗେଜ୍, ସୁରକ୍ଷା କ୍ୟାମେରା, ୱାଟର ପ୍ୟୁରିଫାୟର, ଲାପ୍ଟପ୍, ଏୟାର୍ କଣ୍ଡିଶନର, ୱାଟର ହିଟର, ୱାଶିଂ ମେଶିନ୍ ଆଦିର ଚାହିଦା ମଧ୍ୟ ଢ଼େର ଅଧିକ ରହିଛି ।
