ନୂଆଦିଲ୍ଲୀ,୧୫/୧: ସେମାନେ ସୀମାରେ ଅଛନ୍ତି ବୋଲି ଆମେ ସୁରକ୍ଷିତ । ଖରା, ବର୍ଷା, ଶୀତ ସବୁବେଳେ ସୀମାର ଜାଗ୍ରତ ପ୍ରହରୀ ସାଜିଥିବା ସେନାଙ୍କ ପାଇଁ ଆମେ ଶାନ୍ତିରେ ଶୋଇ ପାରୁଛୁ । ସେହି ବୀର ଯବାନଙ୍କୁ ସମ୍ମାନ ଜଣାଇବାକୁ ପ୍ରତିବର୍ଷ ଜାନୁଆରୀ ୧୫ ତାରିଖକୁ ଭାରତୀୟ ସେନା ଦିବସ ଭାବେ ପାଳନ କରାଯାଏ ।
ସୀମା ରକ୍ଷା କରିବା ନେଇ ଭାରତୀୟ ସେନାଙ୍କୁ ସମ୍ମାନ ଜଣାଇ ଚଳିତ ବର୍ଷ ୭୭ତମ ଭାରତୀୟ ସେନା ଦିବସ ପାଳନ କରାଯାଉଛି । ଏହି ଦିନ ସେନାର ବୀରତ୍ବ, ସାହସିକତା ଓ ବଳିଦାନକୁ ସ୍ମରଣ କରାଯାଏ । ସେନା ଦିବସ ଅବସରରେ ପୁଣେରେ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ ହୋଇଛି । ଏହି ଅବସରରେ ଦେଶରେ ବିଭିନ୍ନ ସାମିରକ ମୁଖ୍ୟାଳୟରେ ସାମରିକ ପରେଡ ଆୟୋଜିତ ହୋଇଛି ।
ଭାରତୀୟ ସେନା ଦିବସ- ପ୍ରତିବର୍ଷ ଜାନୁଆରୀ ୧୫ ତାରିଖ ପ୍ରତିଟି ଭାରତୀୟଙ୍କ ପାଇଁ ସ୍ବତନ୍ତ୍ର । ଏହି ଦିନ ଭାରତ ଇତିହାସ ପାଇଁ ଗର୍ବ ଓ ଗୌରବର ଦିନ । ଏହି ଗୌରବକୁ ବଢାଇବାକୁ ସୀମା ସୁରକ୍ଷାରେ ମୁଖ୍ୟ ଭୂମିକା ତୁଲାଉଥିବା ସୈନିକଙ୍କୁ ସମ୍ମାନିତ କରାଯାଇଥାଏ । ନୂଆଦିଲ୍ଲୀ ଓ ଦେଶର ବିଭିନ୍ନ ସେନା ମୁଖ୍ୟାଳୟରେ ସାମରିକ ପରେଡ ଓ ସାମରିକ ପ୍ରଦର୍ଶନ ଓ ଅନ୍ୟାନ ରଙ୍ଗାରଙ୍ଗ କାର୍ଯ୍ୟକ୍ରମ ଅନୁଷ୍ଠିତ ହେବ । ସେନାର ଶୌର୍ଯ୍ୟ, ବଳିଦାନ ଓ ସାହାସକୁ ମନେ ପାଇବାକୁ ଭାରତୀୟ ସେନା ଦିବସ ପାଳନ କରାଯାଏ । ଦେଶର ପ୍ରଥମ ସେନା ମୁଖ୍ୟ ଫିଲ୍ଡ ମାର୍ଶଲ କେଏମ୍ କାରିଆପ୍ପା ଜାନୁଆରୀ ୧୫ ତାରିଖରେ ତାଙ୍କର ପଦ ଗ୍ରହଣ କରିଥିବାରୁ ପ୍ରତିବର୍ଷ ଏହି ଦିନ ସେନା ଦିବସ ପାଳନ କରାଯାଏ । ଭାରତ ଓ ପାକିସ୍ତାନ ମଧ୍ୟରେ ଯେବେ ଯୁଦ୍ଧ ଆରମ୍ଭ ହେଲା ସେବେ କେଏମ୍ କାରିଆପ୍ପା ଭାରତୀୟ ସେନାର ନେତୃତ୍ବ ନେଇଥିଲେ।
ଭାରତୀୟ ସେନାର ସଫଳତା- ଦେଶର ସୁରକ୍ଷା କବଜ ସେନା । ଯେବେଯେବେ ଦେଶ ଉପରେ ଶତ୍ରୁର ନଜର ପଡିଛି ତାକୁ ଜବାବ ଦେଇଛି ଭାରତୀୟ ସେନା । ଅନେକ ଯୁଦ୍ଧରେ ଶତ୍ରୁକୁ ମାତ ଦେଇ ସଫଳତା ହାସଲ କରିଛି । ୧୯୪୭-୪୮ରେ ଯେବେ ପାକିସ୍ତାନ ସେନା କାଶ୍ମୀରକୁ ଛଡାଇ ନେବା ପାଇଁ ଯୁଦ୍ଧ ହୋଇଥିଲା । ତେବେ କାଶ୍ମୀରକୁ ଭାରତୀୟ ସେନା ଉଦ୍ଧାର କରିଥିଲା । ସେହିପରି ୧୯୬୨ରେ ଚୀନ ଭାରତୀୟ ହିମାଳୟ ସୀମା ଉପରେ ଆକ୍ରମଣ କରିଥିଲା । ସେବେ ଭାରତୀୟ ସେନା ଚୀନ ବିରୋଧରେ ସତର୍କତା ବଢାଇ ଏହାର ଜବାବ ଦେଇଥିଲା । ୧୯୬୫ରେ ଭାରତ-ପାକିସ୍ତାନ ମଧ୍ୟରେ ଯୁଦ୍ଧ ହୋଇଥିଲା । ଭାରତୀୟ ସେନା ପାକିସ୍ତାନକୁ ମୁହଁତୋଡ ଜବାବ ଦେଇ ପରାସ୍ତ କରିଥିଲା । ୧୯୯୧ରେ ପାକିସ୍ତାନୀ ସେନା ବିରୋଧରେ ଅପରେସନ ବିଜୟ କରାଯାଇଥିଲା । ଏଥିରେ ଭାରତୀୟ ସେନାର ବିଜୟ ହୋଇଥିଲା । ଏହା କାର୍ଗିଲ ଯୁଦ୍ଧ ନାମରେ ପ୍ରସିଦ୍ଧ ।
ଏହା ବି ପଢନ୍ତୁ...ବଢିବ ଭାରତୀୟ ନୌସନାଙ୍କ ବଳ, ସାମିଲ ହେବ ୩ ଯୁଦ୍ଧଜାହଜ
ଚଳିତବର୍ଷର ଥିମ୍- ଭାରତୀୟ ସେନାଙ୍କୁ ସମ୍ମାନ ଜଣାଇ ସେମାନଙ୍କ ବଳିଦାନକୁ ମନେପକାଇବାକୁ ଚଳିତ ବର୍ଷ ୭୭ତମ ଭାରତୀୟ ସେନା ଦିବସ ପାଳନ କରାଯାଉଛି । ଚଳିତ ବର୍ଷ ଦିବସର ଥିମ୍ ବା ବିଷୟବସ୍ତୁ ରହିଛି 'ସମର୍ଥ ଭାରତ,ସକ୍ଷମ ସେନା' । ଦିଲ୍ଲୀ କାରିଆପା ପରେଡ ଗ୍ରାଉଣ୍ଡରେ ସ୍ବତନ୍ତ୍ର ପରେଡ କରିବେ ସେନା । ପରେଡ, ନୃତ୍ୟ ଓ ମିଲିଟାରୀ ଡ୍ରିଲ ସହିତ ଅନ୍ୟାନ କାର୍ଯ୍ୟକ୍ରମ ରହିଛି ।
