ନୂଆଦିଲ୍ଲୀ,୧୫/୦୧: ପାଖେଇ ଆସୁଛି ଦିଲ୍ଲୀ ବିଧାନସଭା ନିର୍ବାଚନ । ଏନେଇ ସରଗରମ ରାଜନୀତି । ଏହାରି ମଧ୍ୟରେ ଆମ ଆଦମୀ ପାର୍ଟିର ସଂଯୋଜକ ତଥା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଗୁଇନ୍ଦା ଏଜେନ୍ସି ପକ୍ଷରୁ ଆଲର୍ଟ ଜାରି । ଦିଲ୍ଲୀ ନିର୍ବାଚନ ସମୟରେ ଅରବିନ୍ଦ କେଜ୍ରିୱାଲଙ୍କ ସମେତ ଅନେକ ନେତାଙ୍କୁ ଆକ୍ରମଣ କରାଯାଇପାରେ ବୋଲି  ଗୁଇନ୍ଦା ଏଜେନ୍ସି ଏକ ସତର୍କ ସୂଚନା ଜାରି କରିଛି। 

ତେବେ ଦିଲ୍ଲୀ ପୋଲିସ ସୂତ୍ର ଅନୁଯାୟୀ, ଖାଲିସ୍ତାନୀ ଆତଙ୍କବାଦୀମାନେ ନିର୍ବାଚନୀ ମାହୋଲ ନଷ୍ଟ କରିବା ପାଇଁ ଦିଲ୍ଲୀର ନେତାଙ୍କ ଉପରେ ଆକ୍ରମଣ କରିପାରନ୍ତି।   ଦିଲ୍ଲୀ ନିର୍ବାଚନ ସମୟରେ ଅନେକ ନେତା ଟାର୍ଗେଟରେ ରହିପାରନ୍ତି। ପ୍ରକାଶ ଥାଉକି, ନିର୍ବାଚନୀ ରାଲି  କିମ୍ବା ସାଧାରଣ ସଭାରେ ନେତାଙ୍କ ସୁରକ୍ଷା ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି ଏବଂ ସତର୍କତା ଅନୁଯାୟୀ ସମୟ ସମୟରେ ସୁରକ୍ଷା ସମୀକ୍ଷା କରାଯାଉଛି।  

ଏହା ମଧ୍ୟ ପଢନ୍ତୁ-ଦିଲ୍ଲୀ ନିର୍ବାଚନ ; ତେଜିଲା ଆପ୍-ବିଜେପି ପୋଷ୍ଟର ୱାର, 'ଗାଲିବାଜ୍' ବନାମ୍ 'ଆପ୍ ଦା-ଏ- ଆଜମ୍'

ତେବେ ଫେବୃଆରୀ  ୫ ରେ ଦିଲ୍ଲୀରେ ବିଧାନସଭା ନିର୍ବାଚନ ହେବାକୁ ଯାଉଛି। ଏଭଳି ପରିସ୍ଥିତିରେ ନେତାଙ୍କ ଦ୍ୱାରା ଅନେକ ରାଲିର ଆୟୋଜନ କରାଯାଉଛି। ମଙ୍ଗଳବାର ଅର୍ଥାତ୍ ଗତକାଲି ୫୬ ଜଣ ପ୍ରାର୍ଥୀ ସେମାନଙ୍କ ନାମାଙ୍କନପତ୍ର ଦାଖଲ କରିଥିଲେ। ଏପର୍ଯ୍ୟନ୍ତ ୮୫ଟି ନାମାଙ୍କନପତ୍ର ଦାଖଲ କରାଯାଇଛି, ସେଥିମଧ୍ୟରୁ ଜାନୁଆରୀ ୧୩ ରେ ୨୦ ଟି ନାମାଙ୍କନପତ୍ର ଦାଖଲ କରାଯାଇଛି  । ସେହିପରି ଜାନୁଆରୀ ୧୦ ରେ ୯ ଜଣ ନାମାଙ୍କନପତ୍ର ଦାଖଲ କରିଛନ୍ତି। ଫେବୃଆରୀ ୮ ରେ ଦିଲ୍ଲୀ ବିଧାନସଭା ନିର୍ବାଚନର ଫଳାଫଳ ଆସିବ।