ନୂଆଦିଲ୍ଲୀ,୧୬।୪: ଚୀନ୍ ସହ ବିବାଦ ଭିତରେ ଭାରତୀୟ ସେନା ଦେଖାଇଲା ପରାକ୍ରମ। ଉତ୍ତର ସିକିମରେ ହିମାଳୟ ପାର କରି ତିବ୍ଦତୀୟ ମାଳଭୂମିରେ କଲା ଶକ୍ତି ପ୍ରଦର୍ଶନ। ୧୫ ହଜାର ଫୁଟ୍ ଉଚ୍ଚତା ଓ ମାଇନସ୍ ୪୦ ଡିଗ୍ରୀ ତାପମାତ୍ରାରେ ବରଫରେ ଚାଲିଲା ଟ୍ୟାଙ୍କ। କେବଳ ସେତିକି ନୁହେଁ ରକେଟ ଫାୟାରିଂ କରି ପରୀକ୍ଷଣ କରିଥିଲା ନିଜର ପ୍ରସ୍ତୁତି ।
ଏହି ଅଞ୍ଚଳରେ ୨୦୨୦ ରେ ଭାରତ ଓ ଚୀନ୍ ସୈନିକଙ୍କ ମଧ୍ୟରେ ସଂଘର୍ଷ ହୋଇଥିଲା। ଏପରିକି ତା ପୂର୍ବରୁ ୨୦୧୭ ରେ ୭୩ ଦିନ ମୁହଁ ଧରି ମୁହାଁମୁହିଁ ସ୍ଥିତିରେ ଥିଲେ ଦୁଇ ଦେଶର ସେନା। ଉତ୍ତର ସିକ୍କିମରେ ଭାରତୀୟ ସେନାର ବ୍ରିଗେଡ୍କୁ ‘ଫ୍ଲେଟୁ ବ୍ରିଗେଡ’ ବୋଲି କୁହାଯାଏ। ପ୍ରଥମ ଥର ହିମାଳୟ ପାର କରି ସେନା ତିବ୍ଦତକୁ ଲାଗିଥିବା ଅଞ୍ଚଳରେ କରିଛି ଶକ୍ତିପ୍ରଦର୍ଶନ। ପୂର୍ବ ହିମାଳୟରେ ଥିବା ଏହି ଅଞ୍ଚଳ ଦେଶର ଉଚ୍ଚତମ ଓ ସବୁଠାରୁ ଥଣ୍ଡା ଯୁଦ୍ଧକ୍ଷେତ୍ର ମଧ୍ୟରୁ ଅନ୍ୟତମ।
ଭାରତୀୟ ସେନାର ସୂଚନା ଅନୁଯାୟୀ, ଶକ୍ତି ପ୍ରଦର୍ଶନ ସମୟରେ ଟ୍ୟାଙ୍କ, ତୋପ, ଆଣ୍ଟି-ଟ୍ୟାଙ୍କ ଗାଇଡେଡ୍ ମିସାଇଲ ଏବଂ ଡ୍ରୋନ ମଧ୍ୟ ବ୍ୟବହାର କରାଯାଇଥିଲା। ରକେଟ ଫାୟାରିଂ ମାଧ୍ୟମରେ କରାଯାଇଥିଲା ପ୍ରସ୍ତୁତି ପରୀକ୍ଷଣ। ପ୍ରଥମ ଥର ନଦୀ, ଝରଣା ଏବଂ ବରଫ ଜମିଥିବା ହ୍ରଦ ପାର ହେବା ପାଇଁ ସ୍ୱତନ୍ତ୍ର ବାହନର ମଧ୍ୟ ବ୍ୟବହାର କରାଯାଇଥିଲା। ଏହି ସମୟରେ, ଟାଟା କମ୍ପାନୀଠାରୁ ନିକଟରେ ଅଧିଗ୍ରହଣ କରାଯାଇଥିବା ଇନଫାନଟ୍ରି କମ୍ବାଟ ଭେଇକିଲ୍ରର ମଧ୍ୟ ବ୍ୟବହାର କରାଯାଇଥିଲା।ଉତ୍ତର ସିକ୍କିମର ଏହି ଅଞ୍ଚଳରୁ ତିସ୍ତା ନଦୀର ଉତ୍ପତ୍ତି ହୋଇଛି। ଶିଖ ଏବଂ ବୌଦ୍ଧ ଧର୍ମର ପବିତ୍ର ଗୁରୁଡୋଙ୍ଗମାର ହ୍ରଦ ମଧ୍ୟ ଏହି ଅଞ୍ଚଳରେ ଅବସ୍ଥିତ।
