ବେଙ୍ଗାଲୁରୁ,୨୪/୧୦: ଗୁରୁବାର ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଦ୍ୱିତୀୟ ଟେଷ୍ଟ । ପ୍ରଥମ ଟେଷ୍ଟ ପରାଜିତ ହେବା ପରେ ଭାରତୀୟ ଦଳ ପାଇଁ ଏହି ଟେଷ୍ଟ ‘କର ବା ମର’ ପରିସ୍ଥିତି ସୃଷ୍ଟି କରିଛି । ଫଳରେ ସବୁ ଶକ୍ତି ଲଗାଇ ଭାରତ ଏହି ଟେଷ୍ଟ ଜିତିବା ସହ ସିରିଜକୁ ଫେରିବାକୁ ଲକ୍ଷ୍ୟ ରଖିଛି । ସେହିପରି ବିଜୟ ସୂତ୍ର ପାଇ ସାରିଥିବା ନ୍ୟୁଜିଲାଣ୍ଡ ମଧ୍ୟ କଡ଼ା ଚ୍ୟାଲେଞ୍ଜ ଦେବାକୁ ପ୍ରସ୍ତୁତ ରହିଛି । ଦ୍ୱିତୀୟ ଟେଷ୍ଟ ପାଇଁ ପ୍ରସ୍ତୁତ ପିଚ୍ ସମ୍ପ୍ରତି ଫୋକସ୍ରେ ରହିଥିବା ବେଳେ ଉଭୟ ଦଳରେ ରହିଥିବା ଦକ୍ଷ ସ୍ପିନରଙ୍କ ମଧ୍ୟରେ ଅସଲ ପ୍ରତିଦ୍ୱନ୍ଦ୍ୱିତା ହେବା ଆଶା କରାଯାଉଛି ।
ଚିନ୍ନାସ୍ୱାମୀ(ବେଙ୍ଗାଲୁରୁ) ଷ୍ଟାଡ଼ିୟମ୍ରେ ମଧ୍ୟ ସ୍ପିନରଙ୍କୁ ସହାୟତା କରିବା ଭଳି କଳା ମାଟିରେ ପିଚ୍ ପ୍ରସ୍ତୁତ କରାଯାଇଥିଲା । ମାତ୍ର ନିୟମିତ ବର୍ଷା ଓ କୋହଲା ପାଗ ଯୋଗୁଁ ପିଚ୍ ପ୍ରାରମ୍ଭରୁ ପେସ୍ ବୋଲରଙ୍କୁ ସୁହାଇଥିଲା । ପ୍ରଥମ ଦିନରେ ହିଁ ମ୍ୟାଚ୍ର ଫଳାଫଳ ସ୍ପଷ୍ଟ ହୋଇଯାଇଥିଲା । ମାତ୍ର ପୁନେରେ ବର୍ଷା ନାହିଁ । ଶୁଷ୍କ ପିଚ୍ ଶୁଷ୍କ ଓ ସୁପର ଫାଷ୍ଟ ଆଉଟ୍ ଫିଲ୍ଡ ଉଭୟ ଦଳକୁ ଏକାଦଶରେ ପରିବର୍ତ୍ତନ କରିବାକୁ ବାଧ୍ୟ କରି ଦେଇଛି । ସ୍ପିନ୍ ବୋଲିଂ ହିଁ ମ୍ୟାଚ୍ର ଫଳାଫଳ ନିର୍ଣ୍ଣୟ କରିବ । ତେଣୁ ଉଭୟ ଦଳ ଅତିରିକ୍ତ ସ୍ପିନର ନେଇ ଗ୍ରାଉଣ୍ଡକୁ ଓହ୍ଲାଇବା ନିଶ୍ଚିତ ।
ନ୍ୟୁଜିଲାଣ୍ଡ ବାମ ହାତି ସ୍ପିନର ମିଚେଲ ସାଣ୍ଟନରଙ୍କୁ ଏକାଦଶକୁ ଫେରାଇ ଆଣିବା ଆଶା କରାଯାଉଛି । ଫଳରେ ୱିଲ ଓ’ରୁର୍କ କିମ୍ବା ମାଟ୍ ହେନରୀଙ୍କ ମଧ୍ୟରୁ ଜଣେ ବାଦ ପଡ଼ିବେ । ଗ୍ଳେନ ଫିଲିପ୍ସ ଓ ରଚିନ ରବିନ୍ଦ୍ର କାମଚଳା ସ୍ପିନର ଭାବେ କିଛି ଓଭର ବୋଲିଂ କରିବେ । ଭାରତ ସ୍ପିନ୍ ବିଭାଗରେ ପରିବର୍ତ୍ତନ କରିବା ସମ୍ଭାବନା ନାହିଁ । ତଥାପି କୁଲଦୀପ ଯାଦବଙ୍କ ସ୍ଥାନରେ ୱାସିଂଟନ ସୁନ୍ଦର ଖେଳିପାରନ୍ତି ।
ନ୍ୟୁଜିଲାଣ୍ଡ ଦଳରେ ୫ଜଣ ବାମ ହାତି ବ୍ୟାଟର ରହିଥିବାରୁ ସୁନ୍ଦରଙ୍କ ଶୃଙ୍ଖଳିତ ବୋଲିଂ ରନ୍ ଗତିକୁ ମନ୍ଥର କରିବାରେ ସହାୟକ ହେବ । ପେସ୍ ବୋଲିଂ ବିଭାଗରେ ମଧ୍ୟ ଭାରତ ପରିବର୍ତ୍ତନ କରିପାରେ । କ୍ଳାନ୍ତ ମହମ୍ମଦ ସିରାଜଙ୍କ ସ୍ଥାନରେ ଆକାଶ ଦୀପ ଏକାଦଶକୁ ପ୍ରତ୍ୟାବର୍ତ୍ତନ କରିବାର ଯଥେଷ୍ଟ ସମ୍ଭାବନା ରହିଛି ।
ସର୍ଫରାଜ ବନାମ ରାହୁଲ
ଏହି ମ୍ୟାଚ୍ ପାଇଁ ଭାରତୀୟ ଦଳର ଏକାଦଶ ଚୟନ କଷ୍ଟକର । ଶୁଭମନ ଗିଲ୍ ଫିଟ୍ ହୋଇ ସାରିଥିବାରୁ ଦ୍ୱିତୀୟ ଟେଷ୍ଟ ଖେଳିବା ଏକ ପ୍ରକାର ନିଶ୍ଚିତ । ତେଣୁ ସର୍ଫରାଜ ଖାନ କିମ୍ବା କେ ଏଲ ରାହୁଲଙ୍କ ମଧ୍ୟରୁ ଜଣଙ୍କୁ ଏକାଦଶରୁ ବାଦ ଦିଆଯିବ । ସର୍ଫରାଜ ପ୍ରଥମ ଟେଷ୍ଟରେ ଶତକ ଅର୍ଜନ କରିଥିବାରୁ ରାହୁଲ ବାଦ ପଡ଼ିବାର ଯଥେଷ୍ଟ ସମ୍ଭାବନା ରହିଛି ।
-: କିଛି ରେକର୍ଡ :-
ଭାରତ ୨୦୧୩ରୁ ୨୦୨୨ ମଧ୍ୟରେ ଘରୋଇ ଗ୍ରାଉଣ୍ଡରେ ମାତ୍ର ୨ଟି ଟେଷ୍ଟ ପରାଜିତ ହୋଇଥିଲା । ମାତ୍ର ପରବର୍ତ୍ତୀ ୨ ବର୍ଷ(୨୦୨୨ରୁ ୨୦୨୪) ମଧ୍ୟରେ ଦଳ ଘରୋଇ ଗ୍ରାଉଣ୍ଡ୍ରେ ୩ଟି ଟେଷ୍ଟ ପରାଜିତ ହୋଇ ସାରିଛି ।
ଏହି ଟେଷ୍ଟ ଖେଳିଲେ ରାହୁଲଙ୍କ ପାଇଁ ଏକ ମାଇଲଖୁଣ୍ଟ ଅତିକ୍ରମ କରିବାର ସୁଯୋଗ ରହିଛି । ସେ ଆଉ ୧୯ ରନ୍ କଲେ ଟେଷ୍ଟ କ୍ରିକେଟ୍ରେ ୩୦୦୦ ରନ୍ ପୂରଣ କରିବେ ।
ମାଟ୍ ହେନରୀ କ୍ୟାରିୟର୍ର ପ୍ରଥମ ୧୭ଟି ଟେଷ୍ଟରେ ନେଇଥିଲେ ମାତ୍ର ୫୩ଟି ୱିକେଟ୍ । ମାତ୍ର ଏହାପରେ ୨୦୨୩ରୁ ଇତି ମଧ୍ୟରେ ସେ ମାତ୍ର ୯ଟି ଟେଷ୍ଟ ଖେଳି ୫୦ଟି ୱିକେଟ୍ ଅକ୍ତିଆର କରିସାରିଛନ୍ତି ।
ଟସ୍ ଜିତିଲେ ବ୍ୟାଟିଂ
ମହାରାଷ୍ଟ୍ର କ୍ରିକେଟ୍ ଆସୋସିଏସନ୍ ପିଚ୍ ସ୍ପିନରଙ୍କୁ ସହାୟତା କରିବା ନିଶ୍ଚିତ । ଫଳରେ ଟସ୍ ନିର୍ଣ୍ଣାୟକ ଭୂମିକା ଗ୍ରହଣ କରିବ । ଟସ୍ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ । କାରଣ ମ୍ୟାଚ୍ ଆଗେଇବା ସହ ବଲ୍ ଅଧିକ ଟର୍ଣ୍ଣ କରିବ ଓ ତୃତୀୟ ଓ ଚତୁର୍ଥ ଇନିଂସରେ ବ୍ୟାଟିଂ କଷ୍ଟକର ହେବ । ପ୍ରଥମ ୨ଦିନରେ ପିଚ୍ ବ୍ୟାଟିଂ ପାଇଁ ଯଥେଷ୍ଟ ଅନୁକୂଳ ରହିବ ।
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା(ଅଧିନାୟକ), ଯଶସ୍ୱୀ ଜୈସ୍ୱାଲ୍, ଶୁଭମନ ଗିଲ୍, ବିରାଟ କୋହଲି, ରିଷଭ ପନ୍ତ, କେ ଏଲ ରାହୁଲ/ସର୍ଫରାଜ ଖାନ, ରବିନ୍ଦ୍ର ଜାଡେଜା, ରବି ଚନ୍ଦ୍ରନ ଅଶ୍ୱିନ, କୁଲଦୀପ ଯାଦବ/ ୱାସିଂଟନ ସୁନ୍ଦର, ଯଶପ୍ରୀତ ବୁମରା, ଆକାଶ ଦୀପ/ମହମ୍ମଦ ସିରାଜ ।
ନ୍ୟୁଜିଲାଣ୍ଡ: ଟମ ଲାଥମ(ଅଧିନାୟକ), ଡେମନ କନୱେ, ୱିଲ ୟଙ୍ଗ, ରଚିନ ରବିନ୍ଦ୍ର, ଡାରିଲ ମିଚେଲ, ଟମ ବ୍ଲଣ୍ଡେଲ, ଗ୍ଲେନ ଫିଲିପ୍ସ, ମିଚେଲ ସାଣ୍ଟନର, ଟିମ ସାଉଦି, ୱିଲ ଓ’ରୁର୍କ/ ମାଟ ହେନରୀ, ଅଜାଜ ପଟେଲ ।
