ମୁମ୍ବାଇ: ଓ୍ବାଙ୍ଖଡେ ଷ୍ଟାଡିୟମରେ ଅଭିଷେକ ଶର୍ମା ଶୋ’ ଦେଖିବାକୁ ମିଳିଛି । ଇଂଲଣ୍ଡ ବୋଲରଙ୍କୁ ପାଣି ପିଆଇ ବିଶାଳ ସ୍କୋର କରିଛନ୍ତି ଅଭିଷେକ । ସେ ୫୪ ବଲ୍ରେ ୧୩ ଛକା ମାରି ୧୩୫ ରନ୍ କରିଛନ୍ତି । ୩୭ ବଲ୍ରେ ଶତକ କରି ଖେଳପ୍ରେମୀଙ୍କୁ ଚମାକାଇ ଦେଇଥିବା ଅଭିଷେକଙ୍କୁ ନେଇ ଚର୍ଚ୍ଚା ଜାରି ରହିଛି । ସେପଟେ ଇଂଲଣ୍ଡ ବିପକ୍ଷରେ ଭାରତୀୟ ଟିମ୍ ୨୦ ଓଭର ଶେଷ ସୁଦ୍ଧା ୨୪୭ ରନ୍ କରିଛି । ଭ୍ରମଣକାରୀ ଦଳ ଇଂଲଣ୍ଡ ଆଗରେ ୨୪୮ ରନ୍ର ବିଜୟ ଲକ୍ଷ୍ୟ ରଖିଛି ଟିମ୍ ଇଣ୍ଡିଆ ।
ଅଭିଷେକ ଶର୍ମାଙ୍କ ବିସ୍ଫୋରକ ଶତକ ବଳରେ ଓ୍ବାଙ୍ଖଡେରେ ଖେଳା ଯାଉଥିବା ସିରିଜର ଶେଷ ତଥା ପଞ୍ଚମ ଟି-୨୦ରେ ଭାରତ ବିଶାଳ ସ୍କୋର କରିଛି। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତ ୯ ଓ୍ଵିକେଟ୍ ହରାଇ ୨୪୭ ରନ କରିଛି। ମ୍ୟାଚ୍ ଜିତିବା ପାଇଁ ଇଂଲଣ୍ଡ ସମ୍ମୁଖରେ ୨୪୮ ରନର ବିଜୟ ଲକ୍ଷ୍ୟ ରହିଛି। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଭାରତକୁ ୨୧ ରନ ସ୍କୋରରେ ପ୍ରଥମ ଝଟକା ଲାଗିଥିଲା। ସଞ୍ଜୁ ସାମସନ(୧୬) ପୁଣି ସଟ୍ ବଲ୍ରେ ଆଉଟ୍ ହୋଇଥିଲେ। ଏହା ପରେ ଆରମ୍ଭ ହୋଇଥିଲା ଅଭିଷେକ ଶର୍ମାଙ୍କ ପାଓ୍ଵାର ଶୋ’।
ତିଳକ ବର୍ମା ୨୪ ରନ କରିଥିଲେ। ଅଧିନାୟକ ସୂର୍ଯ୍ୟକୁମାର ଯାଦବ(୨) ପୁଣି ଥରେ ଖରାପ ପ୍ରଦର୍ଶନ କରି ଆଉଟ୍ ହୋଇଥିଲେ । ଅନ୍ୟପଟେ ଅଭିଷେକ ଶର୍ମା ନିଜର ଧୂଆଁଧାର ବ୍ୟାଟିଂ ଜାରି ରଖି ଇଂଲଣ୍ଡ ବୋଲରଙ୍କୁ ପ୍ରହାର କରି ଚାଲିଥିଲେ । ମଧ୍ୟକ୍ରମରେ ଶିବମ ଦୁବେ ୩୦ରନ୍ କରି ଦଳୀୟ ସ୍କୋରକୁ ବଢ଼ାଇଥିଲେ । ଅଭିଷେକ ୩୭ ବଲ୍ରୁ ଅନ୍ତର୍ଜାତୀୟ ଟି-୨୦ରେ ତୃତୀୟ ଦ୍ରୁତ ତମ ଶତକ ହାସଲ କରିଥିଲେ। ଭାରତ ପକ୍ଷରୁ ରୋହିତ ଶର୍ମାଙ୍କ ପରେ ଅଭିଷେକ ଦ୍ଵିତୀୟ ଦ୍ରୁତତମ ଶତକ ଅର୍ଜନ କରିଛନ୍ତି।
