ରାଉରକେଲା,୦୨/୦୨ (କୁମାର ବିମଳ): ହକିର ଗଡ଼ରେ ଲିଗରୁ ଫାଇନାଲ ପର୍ଯ୍ୟନ୍ତ ଅବିଶ୍ୱସନୀୟ ପ୍ରଦର୍ଶନ କରି ହିରୋ ଏଚ୍ଆଇଏଲରେ ଚାମ୍ପିଅନ ହେବାର ଗୌରବ ଲାଭ କରିଛି ବେଙ୍ଗଲ ଟାଇଗର୍ସ । ହାଇଦ୍ରାବାଦ ତୁଫାନ୍ସକୁ ଦଳ ୪-୩ ଗୋଲରେ ହରାଇଥିଲା । ବିର୍ସା ମୁଣ୍ଡା ହକି ଷ୍ଟାଡିୟମରେ ୨୦ ହଜାରରୁ ଊଦ୍ଧ୍ୱର୍ ଦର୍ଶକ ଫାଇନାଲ ମ୍ୟାଚର ରୋମାଞ୍ଚ ନେଇଥିଲେ ।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି, କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୂରଜ ସମ୍ମାନିତ ଅତିଥି ଓ ହକି ଇଣ୍ଡିଆ ସଭାପତି ପଦ୍ମଶ୍ରୀ ଦିଲ୍ଲୀପ ତିର୍କୀ ପ୍ରମୁଖ ପୁରସ୍କାର ବିତରଣ ଉତ୍ସବରେ ଉପସ୍ଥିତ ରହିଥିଲେ । ମୁଖ୍ୟମନ୍ତ୍ରୀ ଚାମ୍ପିଅନ ଦଳକୁ ଟ୍ରଫି ପ୍ରଦାନ କରିଥିଲେ । ପୁରସ୍କାର ସ୍ୱରୂପ ଟ୍ରଫି ବିଜେତାଙ୍କୁ ୩ କୋଟି, ରନର୍ସଅପ ଦଳକୁ ୨ କୋଟି ଟଙ୍କା ପ୍ରଦାନ କରାଯାଇଥିଲା ।
ଟାଇଗର୍ସର ଯୁଗରାଜ ସିଂ ସର୍ବାଧିକ ଗୋଲ୍ (୧୨) ସ୍କୋରର, ସୁଖଜିତ ସିଂ ପ୍ଲେୟାର ଅଫ୍ ଦ ଟୁର୍ଣ୍ଣାମେଣ୍ଟ ଏବଂ ବିକ୍ରମଜିତ ସିଂ (ତୁଫାନ୍ସ) ଶ୍ରେଷ୍ଠ ଗୋଲକିପର ବିବେଚିତ ହୋଇଥିଲେ । ଫାଇନାଲ ଲଢ଼େଇ ବେଶ ଚିତାକର୍ଷକ ହୋଇଥିଲା । ଟାଇଗର୍ସ କିମ୍ବା ତୁଫାନ୍ସ କେହି କାହାକୁ କମ ନଥିଲେ । ତୁଫାନ୍ସ ଗୋଲ ଦେଲେ ଟାଇଗର୍ସ ଏବଂ ଟାଇଗର୍ସ ଦେଲେ ତୁଫାନ୍ସ ଗୋଲ ପରିଶୋଧ କରୁଥିଲା । ତୃତୀୟ କ୍ୱାର୍ଟର ଶେଷ ସୁଦ୍ଧା ସ୍ଥିତି ୩-୩ ଗୋଲ ରହିଥିଲା । ତୁଫାନ୍ସ ପକ୍ଷରୁ ୯ ଓ ୩୯ ମିନିଟରେ ଗୋଞ୍ଜାଲୋ ପେଲାଟ ଏବଂ ୨୬ ମିନିଟରେ ଓଡ଼ିଆ ଖେଳାଳି ଅମନଦୀପ ଲାକ୍ରା ଗୋଲ ସ୍କୋର କରିଥିଲେ । ୨୫, ୩୨ ଓ ୩୫ ମିନିଟରେ ଟାଇଗର୍ସର ଯୁଗରାଜ ସିଂ ହ୍ୟାଟ୍ରିକ ଗୋଲ ଦେଇଥିଲେ । ଉଭୟ ଦଳର ସମସ୍ତ ଗୋଲ ପେନାଲ୍ଟି କର୍ଣ୍ଣରରୁ ହୋଇଥିଲା ।
ଅନ୍ତିମ କ୍ୱାର୍ଟର ସଂଘର୍ଷପୂର୍ଣ୍ଣ ରହିଥିଲା । ୫୪ ମିନିଟରେ ସାମ ଲେନ ଏକ ପେନାଲ୍ଟି କର୍ଣ୍ଣରକୁ (ପିସି) ଗୋଲରେ ରୂପାନ୍ତରିକ କରି ଦଳକୁ ୪-୩ରେ ଅଗ୍ରଣୀ କରାଇଥିଲେ । ଗୋଲ ପରିଶୋଧ କରିବା ନେଇ ତୁଫାନ୍ସ ତୁଫାନି ଆକ୍ରମଣ କରି ୫୬ ମିନିଟରେ ପିସି ପାଇଥିଲା । କିନ୍ତୁ ଟାଇଗର୍ସ ଗୋଲକିପର ଜେମି କାର ଗୋଞ୍ଜାଲୋଙ୍କ ପ୍ରୟାସକୁ ବିଫଳ କରି ଦେଇଥିଲେ । ବହୁ ପ୍ରୟାସ କରି ତୁଫାନ୍ସ ଏହି ଗୋଲ ପରିଶୋଧ କରିପାରି ନଥିଲା । ଯଦିଓ ଶେଷ ମୁହୂର୍ତ୍ତରେ ଜୋରଦାର ଆକ୍ରମଣ କରିଥିଲା । ସୁରମା ହକି କ୍ଲବ ତୃତୀୟ ତୃତୀୟ ସ୍ଥାନ (ବ୍ରୋଞ୍ଜ) ଲଢ଼େଇରେ ସୁରମା ହକି କ୍ଲବ୍ ବିଜୟୀ ହୋଇଥିଲା । ଦଳ ୩-୨ ଗୋଲରେ ଓଡ଼ିଆ ଅଲିମ୍ପିଆନ ଅମିତ ରୋହିଦାସଙ୍କ ନେତୃତ୍ୱାଧୀନ ତାମିଲନାଡୁ ଡ୍ରାଗନ୍ସକୁ ପରାଜିତ କରିଥିଲା ।
ସୁରମା କ୍ଲବ ତୃତୀୟ ସ୍ଥାନ ସହ ୧ କୋଟି ଟଙ୍କାର ପୁରସ୍କାର ପାଇଥିଲା । ପ୍ରଥମ କ୍ୱାର୍ଟରରେ ୨ଟି ଗୋଲ ହୋଇଥିଲା । ୧୨ ମିନିଟରେ ସୁରମା ଦଳର ଗୁରଜନ୍ତ ସିଂ ପ୍ରଥମ ଗୋଲ ଦେଇଥିଲେ । ୧୫ ମିନିଟରେ (ଗୋଭର୍ସ ବ୍ଲେକ) ଡ୍ରାଗନ୍ସ ଗୋଲ ପରିଶୋଧ କରି ସ୍ଥିତିକୁ ୧-୧ କରିଥିଲା । ଦ୍ୱିତୀୟ କ୍ୱାର୍ଟରରେ ସୁରମା ଦ୍ୱିତୀୟ ଗୋଲ ଦେଇ ୨-୧ରେ ଅଗ୍ରଣୀ ହୋଇଥିଲା । ୧୯ ମିନିଟରେ ହର୍ଜିତ ସିଂ ଏହି ଗୋଲ ସ୍କୋର କରିଥିଲେ । ତୃତୀୟ କ୍ୱାର୍ଟର ଗୋଲଶୂନ୍ୟ ରହିଥିଲା । ୫୭ ମିନିଟରେ ପ୍ରଭଜୋତ ସିଂ ଗୋଲ ଦେବା ପରେ ୩-୧ରେ ଆଗୁଆ ରହି ସୁରମା ବିଜୟ ନିଶ୍ଚିତ କରିଥିଲା । ଶେଷ ମୁହୂର୍ତ୍ତରେ ଡ୍ରାଗନ୍ସ (୫୯) ଦ୍ୱିତୀୟ ଗୋଲ ଦେଇଥିଲା ।
