ନୂଆଦିଲ୍ଲୀ,୦୬/୧୦: ରବିବାର ଦିନ ଡେନମାର୍କର କୋପେନ୍ହେଗେନ୍ ବିମାନବନ୍ଦରରେ ଏୟାର ଇଣ୍ଡିଆ ବିମାନର ଜରୁରୀ ଅବତରଣ ସମ୍ପର୍କରେ ଏୟାରଲାଇନ୍ସ କହିଛି ଯେ ଡାକ୍ତରୀ ଜରୁରୀକାଳୀନ ପରିସ୍ଥିତି କାରଣରୁ ଅକ୍ଟୋବର ୬ ରେ ଦିଲ୍ଲୀ-ଲଣ୍ଡନ ବିମାନ AI111 କୁ ଡେନମାର୍କର କୋପେନ୍ହେଗେନ୍ ବିମାନବନ୍ଦରରେ ଅବତରଣ କରିବାକୁ ନିର୍ଦ୍ଦେଶ ଦିଆଯାଇଥିଲା।
ଏୟାର ଇଣ୍ଡିଆ କହିଛି ଯେ ବିମାନରେ ଥିବା ଜଣେ ଯାତ୍ରୀଙ୍କ ସ୍ବାସ୍ଥ୍ୟବସ୍ଥା ବିଗିଡ଼ିଯିବାରୁ ବିମାନଟିକୁ କେପେନ୍ହେଗନ୍ରେ ଅବତରଣ କରିବାକୁ ପଡ଼ିଥିଲା ଏବଂ ତାଙ୍କୁ ତୁରନ୍ତ ସ୍ଥାନୀୟ ଡାକ୍ତରଖାନାକୁ ଚିକିତ୍ସା ପାଇଁ ନିଆଯାଇଥିଲା। ଏହି କାରଣରୁ ସମସ୍ତ ଯାତ୍ରୀ ଯେପରି କୌଣସି ପ୍ରକାର ସମସ୍ୟା ଅନୁଭବ ନକରନ୍ତୁ, ସେଥିପାଇଁ କୋପେନ୍ହେଗନ୍ ବିମାନବନ୍ଦରରେ ଆମର ଗ୍ରାଉଣ୍ଡ ସହକର୍ମୀମାନେ ସମସ୍ତ ପ୍ରକାର ଉଦ୍ୟମ କରିଛନ୍ତି ବୋଲି ଏୟାରଲାଇନ୍ସ କହିଛି।
ଏହି ବିମାନ କୋପେନ୍ହେଗନ୍ରୁ ଉଡ଼ାଣ ଭରି ଲଣ୍ଡନରେ ଅବତରଣ କରିବ ବୋଲି ଆଶା କରାଯାଉଛି। ଏୟାର ଇଣ୍ଡିଆ କହିଛି ଯେ, ଆମେ ପୁଣିଥରେ କହିବାକୁ ଚାହୁଁଛୁ ଯେ 'ଯାତ୍ରୀ ଏବଂ କର୍ମଚାରୀମାନଙ୍କ କଲ୍ୟାଣ ଆମର ପ୍ରମୁଖ ପ୍ରାଥମିକତା।'
