ନୂଆଦିଲ୍ଲୀ,୩୦/ ୦୪: ଭାରତ ଭୟରେ ଥରିଲାଣି ପାକିସ୍ତାନ । ଆକ୍ରମଣ ଭୟରେ ଛାତିରେ ପଶିଲାଣି ଛନକା । ପହଲଗାମ ଆତଙ୍କୀ ଆକ୍ରମଣ ପରେ ଭାରତର ଘନ ଘନ ବୈଠକ ବସୁଛି । ଯାହା ପାକିସ୍ତାନର ନିଦ ହଜାଇ ଦେଇଛି । ୨୬ ରୁ ୩୬ ଘଣ୍ଟା ମଧ୍ୟରେ ଭାରତ ପାକିସ୍ତାନ ଉପରେ ଆଟାକ୍ କରିପାରେ ବୋଲି ରାତିଅଧିଆ ପ୍ରେସ୍ମିଟ୍ କରି କହିଛନ୍ତି ପାକିସ୍ତାନ ସୂଚନା ମନ୍ତ୍ରୀ ଅତାଉଲ୍ଲା ତାରାର ।
ପହଲଗାମ ଆତଙ୍କୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ସମ୍ପର୍କ ଆହୁରି ଖରାପ ହୋଇଛି । ପହଲଗାମ ପ୍ରତିଶୋଧ ନେବାକୁ ଭାରତ ବଡ଼ ପ୍ରସ୍ତୁତି କରୁଛି । ସେପଟେ ପାକିସ୍ତାନକୁ ଆକ୍ରମଣ ଭୟ ଘାରିଛି । ଡରି ଡରି ବଞ୍ଚୁଛି ପାକିସ୍ତାନ । ଭାରତ ସୈନ୍ୟ ଆକ୍ରମଣ ନେଇ ଭୟଭୀତ ହୋଇଛି ଆତଙ୍କୀ ଦେଶ । ଏହାକୁ ନେଇ ରାତି ଅଧିଆ ପ୍ରେସ୍ ମିଟ କରିଛନ୍ତି ପାକ୍ ସୂଚନା ମନ୍ତ୍ରୀ ଅତାଉଲ୍ଲା ତାରାର । ସେ କହିଛନ୍ତି, ବିନା ପ୍ରମାଣରେ ଭାରତ ଆମ ଉପରେ ମିଥ୍ୟା ଆରୋପ ଲଗାଉଛି । ଭାରତ ପାକିସ୍ତାନ ଉପରେ ସୈନ୍ୟ ଆକ୍ରମଣ କରିବାକୁ ପ୍ରସ୍ତୁତି କରୁଛି । ପାକିସ୍ତାନ ଏହି ଆକ୍ରମଣର ଜବାବ୍ ଦେବାକୁ ପ୍ରସ୍ତୁତ ଅଛି । ଭାରତ ନିଜକୁ ଜଜ୍, ଜୁରୀ ଏବଂ ଜଲ୍ଲାହ ଭାବୁଛି ଯାହାକି ଭୟଙ୍କର ଏବଂ ଦାୟିତ୍ୱହୀନତାର ପ୍ରମାଣ ।''
ଅଧିକ ପଢନ୍ତୁ...ପହଲଗାମ ଆକ୍ରମଣ: ଉଚ୍ଚସ୍ତରୀୟ ବୈଠକ ପରେ ମୋଦୀଙ୍କୁ ଭେଟିଲେ ଅମିତ ଶାହ ଏବଂ ମୋହନ ଭାଗବତ
ପାକ୍ ସୂଚନା ମନ୍ତ୍ରୀ ଅତାଉଲ୍ଲା ତାରାର ଦାବି କରିଛନ୍ତି କି, ଭାରତ ଆଗାମୀ ୨୪ରୁ ୩୬ ଘଣ୍ଟା ମଧ୍ୟରେ ପାକିସ୍ତାନ ଉପରେ ସୈନ୍ୟ ଆକ୍ରମଣ କରିପାରେ । ଭାରତ କୌଣସି ନିରପେକ୍ଷ ତଦନ୍ତ ନକରି ସିଧା ସୈନ୍ୟ ରାସ୍ତା ଆପଣେଇବାକୁ ପ୍ରସ୍ତୁତି କରିଛି । ଯାହା କ୍ଷେତ୍ରୀୟ ଶାନ୍ତି ପାଇଁ ଘାତକ ପ୍ରମାଣିତ ହୋଇପାରେ । ପାକିସ୍ତାନ ସରକାର ମାମଲାରେ ନିରପେକ୍ଷ, ସ୍ୱତନ୍ତ୍ର ଏବଂ ଅନ୍ତର୍ଜାତୀୟ ବିଶେଷଜ୍ଞ ସହାୟତା ନେଇ ଯାଞ୍ଚ କରିବାକୁ କହିଛି । ଭାରତ ଏହାକୁ ନମାନି ଆକ୍ରମଣର ରାସ୍ତା ବାଛିଛି ।''
