ନୂଆଦିଲ୍ଲୀ: ରୁଷ ରାଜଧାନୀ ମସ୍କୋରେ ଭୟଙ୍କର ବିମାନ ଦୁର୍ଘଟଣା ଘଟିଛି ।  ୟାକ୍‌-18 T ବିମାନ ଦୁର୍ଘଟଣାଗ୍ରସ୍ତ ହେବା ଫଳରେ ଏଥିରେ ଥିବା ସମସ୍ତ ଲୋକଙ୍କ ଜୀବନ ଯାଇଛି । ମିଳିଥିବା ସୂଚନା ଅନୁସାରେ, ଏହି ବିମାନରେ ମୋଟ ୪ ଜଣ ଥିଲେ । ମୃତକଙ୍କ ମଧ୍ୟରେ କ୍ରୁ ସଦସ୍ୟ ଏବଂ ତାଲିମପ୍ରାପ୍ତ ପାଇଲଟମାନେ ସାମିଲ ଅଛନ୍ତି । ଟ୍ରେନିଂ ସମୟରେ  ବିମାନଟି ଦୁର୍ଘଟଣାଗ୍ରସ୍ତ ହୋଇଛି । ରିପୋର୍ଟ ଅନୁସାରେ, ବିମାନଟି ହଠାତ୍ ନିୟନ୍ତ୍ରଣ ହରାଇ ତଳକୁ ଖସି ପଡ଼ିଛି । 

ରୁଷର ଜରୁରିକାଳୀନ ପରିଚାଳନା ମନ୍ତ୍ରଣାଳୟ ଅନୁଯାୟୀ, ବିମାନର ଇଞ୍ଜିନରେ ତ୍ରୁଟି ଯୋଗୁଁ ଦୁର୍ଘଟଣା ଘଟିଛି । ଇଞ୍ଜିନ ଫେଲ୍ ହେବା ପରେ ବିମାନଟି ନିୟନ୍ତ୍ରଣ ବାହାରକୁ ଯାଇ ଏକ ଖୋଲା ପଡ଼ିଆରେ ଖସିପଡ଼ିଲା । ଏହା ପରେ ବିମାନରେ ନିଆଁ ଲାଗି ଯାଇଥିଲା । ଫଳରେ ବିମାନରେ ଥିବା ୪ ଜଣଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି । କିନ୍ତୁ ବାହାରେ କେହି ମୃତାହତ ହୋଇନାହାନ୍ତି । ସେପଟେ କିଛି ରିପୋର୍ଟରେ ଦାବି କରାଯାଇଛି ଯେ, ଉଡ଼ାଣ ପାଇଁ ବିମାନକୁ ସରକାରୀ ଅନୁମତି ମିଳିନଥିଲା। 

ଦୁର୍ଘଟଣା ସଂପର୍କରେ ଆହୁରି ଛାନଭିନ କରିବାକୁ ଏକ ଟିମ୍‌ ଗଠନ କରାଯାଇଛ । ଉଡ଼ାଣ ପୂର୍ବରୁ ଆବଶ୍ୟକୀୟ ସୁରକ୍ଷା ମାନଦଣ୍ଡ ପାଳନ କରାଯାଇଥିଲା କି ନାହିଁ ତାହା ମଧ୍ୟ ଯାଞ୍ଚ କରାଯିବ। ତେବେ Yak-18T ଏକ ହାଲୁକା ଟ୍ରେନିଂ ବିମାନ । ପୂର୍ବତନ ସୋଭିଏତ୍ ୟୁନିଅନ୍ ଦେଶଗୁଡ଼ିକରେ ଫ୍ଲାଇଂ କ୍ଲବ୍ ଏବଂ ତାଲିମ କେନ୍ଦ୍ରଗୁଡ଼ିକରେ ବହୁଳ ଭାବରେ ବ୍ୟବହୃତ ହୁଏ । ଏହି ବିମାନ ଏହାର ଶକ୍ତି ଏବଂ ବେସାମରିକ ବିମାନ ଚଳାଚଳ ପାଇଲଟମାନଙ୍କୁ ତାଲିମ ଦେବାରେ ଉପଯୋଗୀତା ପାଇଁ ଜଣାଶୁଣା । ଏପରି ଦୁର୍ଘଟଣା ବିମାନ ସୁରକ୍ଷା ଉପରେ ପ୍ରଶ୍ନ ଉଠାଇଛି ।