ନୂଆଦିଲ୍ଲୀ,୧୩/୦୧: ଟ୍ରାଭେଲ ଇଣ୍ଡଷ୍ଟ୍ରୀର ବିଶେଷଜ୍ଞମାନେ ମତ ରଖିଛନ୍ତି ଯେ, ଏସୀୟ ରାଷ୍ଟ୍ରଗୁଡ଼ିକ ପର୍ଯ୍ୟଟନ କ୍ଷେତ୍ରରେ ଦିନକୁ ଦିନ ଅଗ୍ରଗତି କରୁଛନ୍ତି ଏବଂ ଆଗାମୀ ବର୍ଷଗୁଡ଼ିକରେ ଗୁରୁତ୍ୱପୂର୍ଣ୍ଣ ଅଭିବୃଦ୍ଧି ପାଇଁ ମଧ୍ୟ ପ୍ରସ୍ତୁତି ଜାରି ରଖିଛନ୍ତି। ଭାରତ, ଇଣ୍ଡୋନେସିଆ ଏବଂ ଭିଏତନାମ ଭଳି ଦେଶଗୁଡ଼ିକ ଗ୍ରାହକଙ୍କ ପସନ୍ଦ ଏବଂ ଦ୍ରୁତଗତିରେ ବଢ଼ୁଥିବା ମଧ୍ୟବିତ୍ତଙ୍କ ପ୍ରଭାବକୁ ନଜରରେ ରଖି ଥାଇଲାଣ୍ଡ ଓ ସିଙ୍ଗାପୁର ଭଳି ପ୍ରତିଷ୍ଠିତ ପ୍ରର୍ଯ୍ୟଟନ ରାଷ୍ଟ୍ରଗୁଡ଼ିକ ଠାରୁ ଆଗକୁ ବଢ଼ିବାକୁ ପ୍ରସ୍ତୁତ ହେଉଛନ୍ତି।
ପର୍ଯ୍ୟଟନ କ୍ଷେତ୍ରରେ ଭାରତ, ଇଣ୍ଡୋନେସିଆ ଏବଂ ଭିଏତନାମ ଭଳି ରାଷ୍ଟ୍ର ପ୍ରମୁଖ ଉନ୍ନତିର ସାକ୍ଷୀ ପାଲଟିଛନ୍ତି। ତେବେ ଏହି ଉନ୍ନତି ତଥା ଅଭିବୃଦ୍ଧି ପଛରେ ପ୍ରମୁଖ ପ୍ରାଥମିକ କାରଣ ହେଉଛି ମଧ୍ୟବିତ୍ତ ପରିବାରଙ୍କ ବୃଦ୍ଧି, ଯେଉଁମାନେ କି ନିଜର ଭୌତିକ ସମ୍ପତ୍ତି ଅପେକ୍ଷା ଜୀବନକୁ ଉପଭୋଗ କରିବାକୁ ଅଧିକ ପ୍ରାଧାନ୍ୟ ଦେଉଛନ୍ତି। ବିଶେଷଜ୍ଞମାନେ ଭବିଷ୍ୟବାଣୀ କରିଛନ୍ତି ଯେ, ନିକଟ ଭବିଷ୍ୟତରେ ଏହି ଦେଶ ଗୁଡ଼ିକର ପର୍ଯ୍ୟଟନ କ୍ଷେତ୍ରରେ ଉଲ୍ଲେଖନୀୟ ବିକାଶ ହେବ।
ବଦଳୁଛି ଗ୍ରାହକଙ୍କ ପସନ୍ଦ:
କୋଭିଡ୍ ମହାମାରୀ ପରେ ଏମିତି ଏକ ଟ୍ରେଣ୍ଡ୍ ଆସିଛି, ଯେଉଁଥିରେ ଲୋକମାନଙ୍କର ବ୍ୟବହାର ଓ ପସନ୍ଦରେ ପରିବର୍ତ୍ତନ ହେବା ସହିତ ସେମାନେ ଭୌତିକ ସମ୍ପତ୍ତି ତଥା ବସ୍ତୁ ଅପେକ୍ଷା ଜୀବନକୁ ଅନୁଭବ କରିବା ଏବଂ ସେବାପ୍ରତି ମନ ବଳାଇବାକୁ ଅଧିକ ଇଛାପ୍ରକାଶ କରୁଛନ୍ତି। ଦକ୍ଷିଣ ଏସିଆ ଏବଂ ଭାରତରେ ପର୍ଯ୍ୟଟନ ଅଭିବୃଦ୍ଧିର ଯଥେଷ୍ଟ ସମ୍ଭାବନା ରହିଥିବା ବେଳେ ଭିଏତନାମ ଏବଂ ଇଣ୍ଡୋନେସିଆ ଆଦି ରାଷ୍ଟ୍ର ସିଙ୍ଗାପୁର, ଥାଇଲାଣ୍ଡ ଏବଂ ଜାପାନ୍ ସହିତ ସମକକ୍ଷ ହେବାକୁ ଚାହାନ୍ତି।
ମାହାମାରୀ ଭିତରେ ଯାତ୍ରା ଏବଂ ଆତିଥ୍ୟ କ୍ଷେତ୍ର ଆଗରେ ଆସିଥିବା ଚ୍ୟାଲେଞ୍ଜ କୁ ନଜରରେ ରଖି ବିଶେଷଜ୍ଞମାନେ ଏବେ ମଧ୍ୟ ଏହି କ୍ଷେତ୍ରରେ ଭବିଷ୍ୟତକୁ ନେଇ ଆଶବାଦୀ ଅଛନ୍ତି। ସାରା ବିଶ୍ବରେ ୬୦୦୦ରୁ ଅଧିକ ହୋଟେଲ୍ ଏବଂ ୪୫ଟି ବ୍ରାଣ୍ଡ୍ ଖୋଲିଥିବା ଏକ ଉଦ୍ୟୋଗ ଏବେ ବାର୍ଷିକ ୩ ରୁ ୪ ପ୍ରତିଶତ ଶିଳ୍ପ ବୃଦ୍ଧି କରିବାକୁ ଯୋଜନା କରୁଛି। ଏହାର ନୂଆ ଖୋଲାଯାଇଥିବା ସାଇଟ୍ର ପ୍ରାୟ ଅଧା ଦକ୍ଷିଣ ପୂର୍ବ ଏସିଆ ଏବଂ ଭାରତରେ ହେବ ବୋଲି ଆଶା କରାଯାଉଛି, ଯାହା ବିଶ୍ୱ ପର୍ଯ୍ୟଟନରେ ଏହି କ୍ଷେତ୍ରର ଗୁରୁତ୍ୱକୁ ରେଖାଙ୍କିତ କରିବ।