ନୂଆଦିଲ୍ଲୀ, ୧ ୮: ବ୍ରିଟେନର ଏକ ସଂସଦୀୟ ସମିତି ଏକ ରିପୋର୍ଟ ଜାରି କରିଛି । ଏହି ରିପୋର୍ଟରେ କୁହାଯାଇଛି ଯେ, କିଛି ବିଦେଶୀ ସରକାର ବ୍ରିଟେନରେ ଥିବା ଲୋକଙ୍କୁ ଧମକାଇ ତାଙ୍କୁ ଦବାଇବାକୁ ଚେଷ୍ଟା କରୁଛନ୍ତି । ଏହି ରିପୋର୍ଟର ନାଁ ‘ଟ୍ରାନ୍ସନ୍ୟାସନାଲ ଅନ ଦ ୟୁକେ’ ରହିଥିବା ବେଳେ ଏଥିରେ ସିମିତି ପ୍ରମାଣ ମଧ୍ୟ ଦିଆଯାଇଛି । । ବ୍ରିଟେନ ସରକାର ଏହା ଉପରେ କାର୍ଯ୍ୟାନୁଷ୍ଠାନ ନେବାକୁ ଦାବି କରୁଛି । ୧୨ ଦେଶରେ ଭାରତ ସମେତ ଚୀନ, ପାକିସ୍ତାନ, ଇରାନ, ଇଜିପ୍ଟ, ରୁଷ, ବାହାରିନ, ୟୁଏଇ, ସାଉଦି ଆରବ, ତୁର୍କୀ, ରାୱାଣ୍ଡା ଓ ଇରିଟ୍ରିଆର ନାଁ ସାମିଲ । ଭାରତ ଏହି ରିପୋର୍ଟ ଉପରେ ବର୍ତ୍ତମାନ ପର୍ଯ୍ୟନ୍ତ ଅଧିକାରିକ କୌଣସି ପ୍ରତିକ୍ରିୟା ଦେଇନାହିଁ ।
ରିପୋର୍ଟରେ ଭାରତୀୟ ଶିଖ୍ ଫର୍ ଜଷ୍ଟିସ ବିଷୟରେ ଉଲ୍ଲେଖ ଅଛି । ଏହା ଏକ ଖଲିସ୍ତାନୀ ସମର୍ଥକ ସଙ୍ଗଠନ । ଏହାର ବେଆଇନ କାର୍ଯ୍ୟକଳାପ ଯୋଗୁଁ ଭାରତରେ ଏହାକୁ ଏକ ଅବୈଧ ସଙ୍ଗଠନ ବୋଲି ଘୋଷଣା କରାଯାଇଛି । ଏହି ସଂସଦୀୟ ସମିତିରେ ବ୍ରିଟେନର ଅନେକ ଦଳର ସଂସଦ ସାମିଲ ଅଛନ୍ତି ଓ ଏହି ସମିତି ବ୍ରିଟେନର ମାନବଧିକାର ସହ ଜଡ଼ିତ ମାମଲାର ଯାଞ୍ଚ କରେ । ସମିତି ରିପୋର୍ଟରେ ଦାବି କରିଛି ଯେ, ଏକ ବିଶ୍ୱସନୀୟ ସୂତ୍ରରୁ ତାକୁ ଏହି ପ୍ରମାଣ ମିଳିଛି । ବ୍ରିଟେନର ସୁରକ୍ଷା ଏଜେନ୍ସି ଏମ୍ଆଇ୫ର ଯାଞ୍ଚରେ ଏଭଳି ମାମଲାରେ ୨୦୨୨ ପରଠୁ ୪୮ ପ୍ରତିଶତର ବୃଦ୍ଧି ଘଟିଛି । ଏହା ମଧ୍ୟ କୁହାଯାଉଛି ଯେ, କିଛି ଦେଶ ଇଣ୍ଟରପୋଲ ନିୟମଗୁଡ଼ିକର ଅପବ୍ୟବହାର କରୁଛନ୍ତି । ଏଥିମଧ୍ୟରୁ ଚୀନ, ରୁଷ ଓ ତୁର୍କୀର ନାଁ ତାଲିକାର ଶୀର୍ଷରେ ରହିଛି । କିନ୍ତୁ, ଭାରତ ଓ ଅନ୍ୟ କିଛି ଦେଶ ଉପରେ ମଧ୍ୟ ଏଭଳି ଆରୋପ ଲଗାଯାଇଛି । ସମିତି ବ୍ରିଟେନ ସରକାରକୁ ଏହି ମାମଲାରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି, ଯାହା ଫଳରେ ମାନବଧିକାରକୁ ସୁରକ୍ଷା ମିଳିପାରିବ ।
