ନୂଆଦିଲ୍ଲୀ,୦୧/୦୮: ପହିଲାରୁ ଫୁଟିଲା ଟ୍ରମ୍ପଙ୍କ ଟାରିଫ୍ ବୋମା । ଯାହା କହୁଥିଲେ ତାହା କରି ଦେଖାଇଲେ । ଭାରତ ସମେତ ଏକାଧିକ ଦେଶ ଉପରେ ଶୁଳ୍କ ବୋଝ ଲଦିଛନ୍ତି ଟ୍ରମ୍ପ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବଡ଼ ନିଷ୍ପତ୍ତି ନେଇ ଏକାଧିକ ଦେଶ ଉପରେ ୧୦ରୁ ୪୧ ପ୍ରତିଶତ ଯାଏ ନୂଆ ରେସିପ୍ରୋକାଲ ଟାରିଫ୍ ଲଗାଇବା ଆଦେଶ ଉପରେ ହସ୍ତାକ୍ଷର କରିଛନ୍ତି । ଭାରତ ସମେତ ୭୦ରୁ ଅଧିକ ଦେଶ ଉପରେ ଏହାର ପ୍ରଭାବ ପଡିବ । ଏହି ନିଷ୍ପତ୍ତି ଉପରେ ସାଇନ୍ କରି ସେ କହିଛନ୍ତି ଏହି ପଦକ୍ଷେପ ବର୍ଷ ବର୍ଷ ଧରି ଚାଲି ଆସୁଥିବା ବ୍ୟବସାୟିକ ଅସୁନ୍ତଳନକୁ ଦୂର କରିବ ଏବଂ ଆମେରିକା ଆର୍ଥିକ ସୁରକ୍ଷାକୁ ମଜବୁତ କରିବାକୁ ନିଆଯାଇଛି । ନୂଆ ଟାରିଫ୍ ନିର୍ଦ୍ଦେଶରେ ସାଇନ୍ କରିଥିଲେ ବି ସାମାନ୍ୟ ଆଶ୍ୱସ୍ତି ମିଳିଛି । ୭ ଦିନ ସମୟ ମିଳିଛି ।
ହ୍ୱାଇଟ୍ ହାଉସ୍ରୁ ଜାରି ହୋଇଥିବା ଏକ ବିବୃତ୍ତି ଅନୁସାରେ, ଆଦେଶରେ କେବଳ ଶୁଳ୍କ ଦରରେ ପରିବର୍ତ୍ତନ କରିବ ନାହିଁ, ବରଂ ଟାରିଫ୍ ଲାଗୁ ହେବାର ତାରିଖ ବି ସ୍ଥିର କରିବ । ନୂଆ ଟାରିଫ୍ ଲାଗୁ ନେଇ ଅଗଷ୍ଟ ୧ ତାରିଖ ସ୍ଥିର ହୋଇଥିଲା । ସେବେ ଯାଏ ସମସ୍ତ ଦେଶ ସହିତ ବ୍ୟବସାୟ ବୁଝାମଣା ସମ୍ପୂର୍ଣ୍ଣ ହୋଇଯାଇଥିବ । ହେଲେ ଏବେ ଯେଉଁ ୭୦ ଦେଶ ଉପରେ ନୂଆ ଟାରିଫ୍ ଲାଗୁ ହୋଇଛି ସେମାନଙ୍କ ଉପରେ ୭ ଦିନ ପରେ ଲାଗୁ ହେବାକୁ ନିଷ୍ପତ୍ତି ହୋଇଛି । ଅର୍ଥାତ୍ ଅଗଷ୍ଟ ୭ରୁ ଆଦେଶ ଲାଗୁ ହେବ ।
ନୂଆ ଶୁଳ୍କ ହାରରେ ଭାରତରୁ ରପ୍ତାନୀ ଉପରେ ୨୫% ଶୁଳ୍କ, ତାଇୱାନରୁ ଆସୁଥିବା ସାମଗ୍ରୀ ଉପରେ ୨୦% ଏବଂ ଦକ୍ଷିଣ ଆଫ୍ରିକାରୁ ଆସୁଥିବା ସାମଗ୍ରୀ ଉପରେ ୩୦% ଶୁଳ୍କ ଅନ୍ତର୍ଭୁକ୍ତ ରହିଛି। ପାକିସ୍ତାନ ଉପରେ ୧୯ ପ୍ରତିଶତ ଏବଂ ଜାପାନ ଉପରେ ୧୫ ପ୍ରତିଶତ ଶୁଳ୍କ ଲାଗୁ କରାଯାଇଛି । ସେହିପରି ଇସ୍ରାଏଲ ଉପରେ ୧୫ ପ୍ରତିଶତ ଏବଂ ଇରାକ୍ ଉପରେ ୩୫% ଶୁଳ୍କ ଲାଗୁ କରାଯାଇଛି। ଟ୍ରମ୍ପ ଦକ୍ଷିଣ ଆଫ୍ରିକା ଉପରେ ୩୦ ପ୍ରତିଶତ, ଦକ୍ଷିଣ କୋରିଆ ଉପରେ ୧୫ ପ୍ରତିଶତ ଏବଂ ଶ୍ରୀଲଙ୍କା ଉପରେ ୨୦ ପ୍ରତିଶତ ଶୁଳ୍କ ଲାଗୁ କରିଛନ୍ତି ।
କାନାଡ଼ା ପାଇଁ ଅଲଗା ନିୟମ-ନ୍ୟୁଜ ଏଜେନ୍ସିଂ ରଏଟର୍ସ ମୁତାବିକ କାନାଡ଼ା ଉପରେ ବି ୩୫ ପ୍ରତିଶତ ଟାରିଫ୍ ଲାଗିଛି । ଯାହା ପ୍ରଥମେ ୨୫ପ୍ରତିଶତ ଥିଲା । କାନାଡ଼ା ଅବୈଧ ନିଶା ଔଷଧ ସଙ୍କଟକୁ ରୋକିବାକୁ ଅସଫଳ ରହିଛି । ଆମେରିକା ନୀତି ବିରୋଧରେ କାର୍ଯ୍ୟାନୁଷ୍ଠାନ ନେଇଛି । କାନାଡ଼ି ଉପରେ ଲାଗୁ ହୋଇଥିବା ୩୫ ପ୍ରତିଶତ ଶୁଳ୍କ ଅନ୍ୟ ଦେଶଠୁ ଅଲଗା ପ୍ରକ୍ରିୟାରେ ଲାଗୁ ହେବ ।
କେଉଁ ଦେଶ ଉପରେ କେତେ ଟାରିଫ୍ ?
ସିରିୟା-୪୧%
ଲାଓସ, ମିଆଁମାର- ୪୦%
ସ୍ୱିଜରଲାଣ୍ଡ-୩୯%
ଇରାକ୍, ସର୍ବିଆ- ୩୫%
ଅଲଜେରିଆ, ଲିବିୟା, ଦକ୍ଷିଣ ଆଫ୍ରିକା-୩୦%
ଭାରତ,ବ୍ରୁନେଇ, କଜାକିସ୍ତାନ,ଟ୍ୟୁନିସିଆ- ୨୫%
ବାଂଲାଦେଶ, ଶ୍ରୀଲଙ୍କା, ତାଇୱାନ, ଭିଏତନାମ-୨୦%
ପାକିସ୍ତାନ, ମାଲେସିୟା, ଇଣ୍ଡୋନେସିଆ, କମ୍ବୋଡ଼ିଆ, ଫିଲିପିନ୍ସ, ଥାଇଲାଣ୍ଡ-୧୯%
ଇସ୍ରାଏଲ,ଜାପାନ, ତୁର୍କୀ, ନାଇଜେରିଆ, ଘାନା- ୧୫%
ବ୍ରାଜିଲ, ବ୍ରିଟେନ୍- ୧୦%
ଚୀନ ସହ ଫାଇନାଲ ହୋଇନି ଡିଲ୍- ଆମେରିକା ଅର୍ଥ ମନ୍ତ୍ରଣାଳୟ ଷ୍ଟାଟ ବେସେଟ ନିକଟରେ କହିଛନ୍ତି କି, ଆମେରିକା ଓ ଚୀନ ମଧ୍ୟରେ ବ୍ୟବସାୟ ବୁଝମଣା ସମ୍ଭାବନା ଅଛି ହେଲେ ଫାଇନାଲ ହୋଇନାହିଁ । ରାଷ୍ଟ୍ରପତିଙ୍କ ମଞ୍ଜୁରୀ ମିଳିବା ବାକି ଅଛି । ଏହି ବୁଝମଣା ନେଇ ଚୀନକୁ ଅଗଷ୍ଟ ୧୨ରେ ଯାଏ ସମୟ ଦିଆଯାଇଛି । ଏହି ଡେଡ୍ଲାଇନ ମେ ଏବଂ ଜୁନ୍ରେ ହୋଇଥିବା ପ୍ରାରମ୍ବିକ ବୁଝାମଣା ପରେ ନିଷ୍ପତ୍ତି ହୋଇଥିଲା ।
ଟ୍ରମ୍ପ କିପରି ନେଲେ ଟାରିଫ୍ ନିଷ୍ପତ୍ତି- ହ୍ୱାଇଟ୍ ହାଉସ୍ ଅନୁସାରେ ଟ୍ରମ୍ପଙ୍କ ଦ୍ୱାରା ପ୍ରଥମେ ଜାରି ହୋଇଥିବା ଏକ୍ୟୁକେଟିଭ୍ ଅର୍ଡର-୧୪୨୫୭ ଉପରେ ଆଧାରିତ । ଯେଉଁଥିରେ କୁହାଯାଇଛି କି, ଆମେରିକା ଲାଗାତାର ତାର ଆର୍ଥିକ ସୁରକ୍ଷା ଓ ବ୍ୟବସାୟିକ ସନ୍ତୁଳନ ରକ୍ଷା କରିବାକୁ ଏପରି ନିଷ୍ପତ୍ତି ନେଇଛି ।
