କୋକସରା, ୧୮।୭: ସୋସିଆଲ ମିଡିଆରେ ଚାକିରି ପାଇଁ ପ୍ରଲୋଭନ ଦେଖାଇଥିଲେ । ପରେ ନିଯୁକ୍ତି ବାହାନାରେ ରାଜସ୍ଥାନକୁ ଡାକି ଯୁବତୀଙ୍କୁ ନିର୍ଯାତନା ଦେଉଥିଲେ । ଏନେଇ ଯୁବତୀଙ୍କ ପରିବାର ଲୋକ ଅଭିଯୋଗ କରିବା ପରେ କଳାହାଣ୍ଡି ଜିଲ୍ଲା ପ୍ରଶାସନର ସହଯୋଗରେ କୋକସରା ବ୍ଲକ୍ ଉପାଧ୍ୟକ୍ଷ ଦ୍ବାରା ଯୁବତୀଙ୍କୁ ସୁରକ୍ଷିତ ଉଦ୍ଧାର କରାଯାଇଛି । ପରେ ଯୁବତୀ ଜଣଙ୍କ ନିଜ ଘରକୁ ଫେରିଛନ୍ତି ।
ସୂଚନାନୁସାରେ, କଳାହାଣ୍ଡି ଜିଲ୍ଲା କୋକସରା ଥାନା ଅଞ୍ଚଳର ଜଣେ ଯୁବତୀ ଫେସବୁକରେ ଜଣେ ଯୁବକଙ୍କ ସହ ପରିଚୟ ହୋଇଥିଲା । ମାସେ ଧରି ସେ ଯୁବକଙ୍କ ସମ୍ପର୍କରେ ଥିଲେ । ପରବର୍ତ୍ତୀ ସମୟରେ ଯୁବକ ଜଣକ ନିଯୁକ୍ତି ପ୍ରଲୋଭନ ଦେଖାଇ ତାଙ୍କୁ ରାଜସ୍ଥାନ ଆସିବାକୁ କହିଥିଲେ । ଅଭିଯୁକ୍ତ ଯୁବକ ଜଣକ ଉଦୟପୁର ଜିଲ୍ଲା ପ୍ରତାପନଗର ଥାନାଞ୍ଚଳର ରତନ ଶର୍ମା ବୋଲି ଜଣାପଡ଼ିଛି । ଘରର ଆର୍ଥିକ ଅବସ୍ଥା ସ୍ୱଚ୍ଛଳ ନଥିବାରୁ ଚାକିରି ଆଶାରେ ଯୁବତୀ ଜଣକ ରାଜସ୍ଥାନ ପଳାଇଯାଇଥିଲେ । ସେଠାରେ ପହଞ୍ଚିବା ପରେ ଯୁବକ ତାଙ୍କୁ ବନ୍ଦୀ ଭାବେ ରଖି ନିର୍ଯାତନା ଦେବା ଆରମ୍ଭ କରିଥିଲା । ଯୁବତୀ ଜଣକ କୌଣସି ମତେ ବନ୍ଦ କୋଠରୀରୁ ଖସି ଆସି ସ୍ଥାନୀୟ ପ୍ରତାପନଗର ଥାନାରେ ପହଞ୍ଚିଥିଲେ । ତାଙ୍କ ଜୀବନ ପ୍ରତି ବିପଦ ଥିବା କହିଥିଲେ ।
ଯୁବତୀ ନିଜ ଘରକୁ ଖବର ଦେବା ପରେ ତାଙ୍କ ମା’ କୋକସରା ବ୍ଲକ ଉପାଧ୍ୟକ୍ଷଙ୍କୁ ଏ ସମ୍ପର୍କରେ ଜଣାଇବା ସହ ଝିଅକୁ ଓଡ଼ିଶାକୁ ଫେରାଇ ଆଣିବାକୁ ଅନୁରୋଧ କରିଥିଲେ । ବ୍ଲକ୍ ଉପାଧ୍ୟକ୍ଷ ଜିଲ୍ଲା ପ୍ରଶାସନ ସହଯୋଗରେ ରାଜସ୍ଥାନ ପ୍ରତାପନଗର ଥାନାରେ ପହଞ୍ଚି ଯୁବତୀଙ୍କୁ ସୁରକ୍ଷିତ ଭାବେ ଉଦ୍ଧାର କରିଛନ୍ତି । ତାଙ୍କୁ ଫ୍ଲାଇଟ୍ରେ ଆଣିବା ସହ ଶୁକ୍ରବାର କୋକସରା ଥାନାରେ ତାଙ୍କ ପରିବାରକୁ ହସ୍ତାନ୍ତର କରିଛନ୍ତି ।
