ଆଳି, ୧୮।୭: ଆଳି ବ୍ଲକରେ ବନ୍ୟା ପାଣିରେ ହନ୍ତସନ୍ତ ଲୋକେ । ବ୍ରାହ୍ମଣୀ ଓ ଖରସ୍ରୋତା ନଦୀରେ ବନ୍ୟା ଆସିବା ଫଳରେ ଗତ ଚାରି ଦିନ ହେବ ୭୦ ହଜାର ଲୋକ ପାଣି ଘେରରେ ରହିଛନ୍ତି । ବନ୍ୟା ପୀଡ଼ିତଙ୍କ ନିକଟରେ ଏଯାଏଁ ପ୍ରଶାସନ କିମ୍ବା କୌଣସି ଶାସକ ଦଳ ନେତା ପହଞ୍ଚି ନାହାନ୍ତି । ଏଯାଏଁ ରିଲିଫ୍ ସାମଗ୍ରୀ ପହଞ୍ଚି ନାହିଁ । ଯାହା ଆଳି ବ୍ଳକ୍ ପ୍ରଶାସନର ଉଦାସୀନତାକୁ ଦର୍ଶାଉଛି । ଏନେଇ ସାମ୍ବାଦିକ ସମ୍ମିଳନୀ କରି କ୍ଷୋଭ ପ୍ରକାଶ କରିଛନ୍ତି ଆଳି ବିଧାୟକ ପ୍ରତାପ କେଶରୀ ଦେବ l 

ବନ୍ୟା ଯୋଗୁଁ ମାନପୁର-ଗୋବିନ୍ଦପୁର ରାସ୍ତାର ଡିମିରିପାଳ ନିକଟରେ ରାସ୍ତାରେ ୬ ଫୁଟ୍‌ର ବନ୍ୟାଜଳ ପ୍ରବାହିତ ହୋଇ ଧୋୟାଞ୍ଚଳର ୧୦ ପଞ୍ଚାୟତ ଆଳି ସହିତ ଯୋଗାଯୋଗରୁ ବିଚ୍ଛିନ୍ନ ହୋଇଯାଇଛି l ସେଠାରେ ପ୍ରଶାସନ ପକ୍ଷରୁ ଡଙ୍ଗାର ବ୍ୟବସ୍ଥା ହୋଇନାହିଁ l ବନ୍ୟାରେ ଲୋକମାନେ ଜଳବନ୍ଦୀ ହୋଇ ରହିଥିବା ବେଳେ ପ୍ରଶାସନ ପକ୍ଷରୁ ରିଲିଫ୍ ମଧ୍ୟ ଯୋଗାଇ ଦିଆଯାଉନି l ତୁରନ୍ତ ରାଜ୍ୟ ସରକାର ଆଳି ବ୍ଲକକୁ ବନ୍ୟାଞ୍ଚଳ ଘୋଷଣା କରିବା ସହ ସରକାରୀ ସହାୟତା ଯୋଗାଇ ଦେବାକୁ ଦାବି କରିଛନ୍ତି l ଏହି ସାମ୍ବାଦିକ ସମ୍ମିଳନୀରେ ପଞ୍ଚାୟତ ସମିତି ଅଧ୍ୟକ୍ଷ ମନୋରଞ୍ଜନ ସାମଲ, ଜିଲ୍ଲା ପରିଷଦ ଉପାଧକ୍ଷ ଭୀଷ୍ମ ମହାନ୍ତି ଯୋଗ ଦେଇଥିଲେ l