ନୂଆଦିଲ୍ଲୀ: ପ୍ଲେସମେଣ୍ଟ କ୍ଷେତ୍ରରେ ବଡ଼ ରେକର୍ଡ କରିଛି ଆଇଆଇଟି(ବିଏଚୟୁ) ବାରଣାସୀ । ୨୦୨୧ ପରେ ଆଇଆଇଟି ଏବେ ବିଏଚୟୁ ଛାତ୍ରଙ୍କୁ ସର୍ବାଧିକ ୨.୨୦ କୋଟି ଟଙ୍କା ପ୍ୟାକେଜ୍ର ଚାକିରି ମିଳିଛି । ତେବେ ସବୁ ଆଇଆଇଟି ପ୍ରତିଷ୍ଠାନ ଅପେକ୍ଷା ଏହି ପ୍ୟାକେଜ୍ ଅଧିକ । ଏହା ପୂର୍ବରୁ ୨୦୨୧ରେ ଜଣେ ଛାତ୍ରଙ୍କୁ ସର୍ବାଧିକ ୨.୧୫ କୋଟି ଟଙ୍କାର ପ୍ୟାକେଜ୍ ମିଳିଥିଲା। ଏହି ସିଜିନରେ ୧୧୨୮ ଛାତ୍ରଙ୍କୁ ଜବ୍ ଅଫର ହୋଇଥିବା ବେଳେ ୪୨୪ ଜଣଙ୍କୁ ଇଣ୍ଟର୍ଣ୍ଣଶିପ୍ ପାଇଁ ସୁଯୋଗ ମିଳିଛି । ଗତ ଏକ ଦଶନ୍ଧୀରେ ଆଇଆଇଟିର ସବୁଠୁ ଉନ୍ନତ ପ୍ରଦର୍ଶନ । ଆଇଆଇଟି ବିଏଚୟୁ ପକ୍ଷରୁ ଜାରି ତଥ୍ୟ ଅନୁଯାୟୀ, ଚଳିତ ବର୍ଷ ଛାତ୍ରଛାତ୍ରୀଙ୍କୁ ମିଳିଥିବା ହାରାହାରି ପ୍ୟାକେଜ୍ ୨୨.୭୯ ଲକ୍ଷ ଟଙ୍କା ପର୍ଯ୍ୟନ୍ତ ପହଞ୍ଚି ଯାଇଛି । ଗତ କିଛି ବର୍ଷ ହେବ ପ୍ୟାକେଜରେ ଲଗାତାର ବୃଦ୍ଧି ଘଟିଛି।
ସର୍ବାଧିକ ପ୍ୟାକେଜ୍
୨୦୨୪-୨୫: ୨.୨୦ କୋଟି
୨୦୨୩-୨୪: ୧.୬୮ କୋଟି
୨୯୨୨-୨୩: ୧.୨୦ କୋଟି
୨୦୨୧-୨୨: ୨.୧୫ କୋଟି
ଚଳିତ ସିଜିନରେ ୧୧ ଛାତ୍ରଙ୍କୁ ଏକ କୋଟିରୁ ଅଧିକ ଟଙ୍କାର ପ୍ୟାକେଜ ମିଳିଛି । ନିର୍ଦ୍ଦେଶକ ପ୍ରୋ. ଅମିତ ପାତ୍ର ସଂସ୍ଥାର ଏହି ଉପଲବ୍ଧିକୁ ନେଇ କହିଛନ୍ତି, ଏହି ବର୍ଷ ପ୍ଲେସମେଣ୍ଟ ପରିମାଣ ଆଇଆଇଟି ବିଏଚୟୁର ପ୍ରତିଷ୍ଠାକୁ ଏକ ପ୍ରମୁଖ ସଂସ୍ଥା ଭାବରେ ସ୍ଥାପିତ କରିଛି । ଆମ ଛାତ୍ରଙ୍କ ପ୍ରତିଭା ଓ ସଂସ୍ଥାର ଉଚ୍ଚମାନର ଶିକ୍ଷା ପଦ୍ଧତି ଏବଂ ଅନୁସନ୍ଧାନ ବଡ଼ ବଡ଼ ନିଯୁକ୍ତିଦାତାଙ୍କୁ ଆକର୍ଷିତ କରୁଛି। ପ୍ରମୁଖ ନିଯୁକ୍ତିଦାତାଙ୍କ ମଧ୍ୟରେ ଗୁଗଲ, ମାଇକ୍ରୋସଫ୍ଟ, ଗୋଲ୍ଡମ୍ୟାନ ସ୍ୟାକ୍ସ, ଟାଟା ଷ୍ଟିଲ ଓ ଓ୍ଵାଲକମ ଆଦି ସାମିଲ ।
