ମୁମ୍ବାଇ: ମହାରାଷ୍ଟ୍ରରେ ବିଧାନସଭା ନିର୍ବାଚନକୁ ନେଇ ରାଜନୈତିକ ବୟାନବାଜି ଜୋର ଧରିଛି । ଅଜିତ ପାଓ୍ବାରଙ୍କ ଗୋଷ୍ଠୀର ନେତା ନଓ୍ବାବ ମଲିକ ନିଜ ନାଁକୁ ଅଣ୍ଡରଓ୍ବାର୍ଲଡ୍ ଡନ ଦାଉଦ ଇବ୍ରାହିମ ସହ ଯୋଡ଼ାଯିବାରୁ ଅସନ୍ତୋଷ ପ୍ରକାଶ କରିଛନ୍ତି । ଯଦି କୌଣସି ବ୍ୟକ୍ତି ମୋ ନାଁକୁ ଦାଉଦ ସହ ଯୋଡ଼ିବ ତା ବିରୋଧରେ ମାନହାନୀ ମାମଲା କରିବି ବୋଲି ଚେତାବନୀ ଦେଇଛନ୍ତି ନଓ୍ବାବ ମଲିକ ।
ଏନସିପି ନେତା ମଲିକ ପିଟିଆଇକୁ ପ୍ରତିକ୍ରିୟା ଦେଇ କହିଛନ୍ତି, ଯେଉଁଭଳି ମୋ ନାଁ ଦାଉଦ ସହ ଯୋଡ଼ାଯାଉଛି, ମୋତେ ଆତଙ୍କବାଦୀ ବୋଲି କହିବାକୁ ଚେଷ୍ଟା କରାଯାଉଛି । ଯେତେବଡ଼ ସାମ୍ବାଦିକ କିମ୍ବା ମିଡିଆ ହାଉସ୍ ହେଉ, ସମସ୍ତଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ହେବ । ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାଓ୍ବାରଙ୍କ ନେତୃତ୍ବାଧୀନ ଏନସିପିର ନେତା ନଓ୍ବାବ ମଲିକ ଆହୁରି କହିଛନ୍ତି, ମୋ ଛବି ଖରାପ କରୁଥିବା ଲୋକଙ୍କ ବିରୋଧରେ ମାନହାନୀ ମକୋଦ୍ଦମା କରିବି । ସେମାନଙ୍କୁ ବୁଝିବାକୁ ପଡ଼ିବ ଯେ, ମୁଁ କାର୍ଯ୍ୟାନୁଷ୍ଠାନ ନେବି ।
ସେପଟେ ଅଜିତ ପାଓ୍ବାରଙ୍କ ଏନସିପି ଆଗାମୀ ବିଧାନସଭା ନିର୍ବାଚନ ଲାଗି ନଓ୍ବାବ ମଲିକଙ୍କୁ ମାନଖୁର୍ଦ ଶିବାଜୀ ନଗରରୁ ଟିକେଟ ଦେଇଛି । ନଓ୍ବାବ ମଲିକଙ୍କ ନାଁ ଉପରେ ଶେଷ ମୁହୂର୍ତ୍ତରେ ମୋହର ଲାଗିଥିଲା । ପ୍ରଥମେ ତାଙ୍କୁ ଦଳ ପକ୍ଷରୁ ଏବି ଫର୍ମ ମିଳିନଥିବାରୁ ସେ ସ୍ବାଧୀନ ପ୍ରାର୍ଥୀ ଭାବରେ ନାମାଙ୍କନ ଭରିଥିଲେ । ପରେ ତାଙ୍କୁ ଦଳ ପକ୍ଷରୁ ଏବି ଫର୍ମ ମିଳିବାରୁ ସେ ଏବେ ଦଳୀୟ ଚିହ୍ନରେ ନିର୍ବାଚନ ଲଢ଼ିବେ । ସୂଚନାଯୋଗ୍ୟ, ୨୦୨୨ରେ ରାଜ୍ୟର ବରିଷ୍ଠ ନେତା ନଓ୍ବାବ ମଲିକଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମନି ଲଣ୍ଡରିଂ ମାମଲାରେ ଗିରଫ କରିଥିଲା । ସେ ଏବେ ସ୍ବାସ୍ଥ୍ୟ ସମସ୍ୟା ଯୋଗୁ ଜାମିନ ପାଇ ବାହାରେ ଅଛନ୍ତି ।
