ଗାଜିପୁର : ଗଙ୍ଗା ନଦୀରେ ବୁଡ଼ିଗଲା ୫ବର୍ଷ ବୟସର ଏକ କୋମଳମତି କୁନି ଝିଅ। ଆଈ ଘରକୁ ବୁଲି ଆସି ଥିବା ଏହି ଝିଅଟିର ନିଜ ମାଆ ସାମ୍ନାରେ ହିଁ ଚାଲିଗଲା ଜୀବନ। ଘଟଣାଟି ସୋମବାର ସକାଳେ ଉତ୍ତର ପ୍ରଦେଶର ଗାଜିପୁରର ସୈଦପୁର ନଗର ସ୍ଥିତ ପକ୍କା ଘାଟରେ ଘଟିଛି। ବୁଡି ଯାଉଥିବା ଝିଅଟିକୁ ନ ଦେଖି ମାଆ ମୋବାଇଲରେ ରିଲ୍ କରୁ ଥିଲେ। ଏଥିରେ କୁନି ଝିଅଟିର ବୁଡି ଯାଉ ଥିବାର ଭିଡ଼ିଓ ମଧ୍ୟ ରେକର୍ଡ ହୋଇଛି। ସ୍ଥାନୀୟ ଉଦ୍ଧାରକାରୀଙ୍କ ସାହାଯ୍ୟରେ ଦୁଇ ଘଣ୍ଟାର ଖୋଜା ଖୋଜି ପରେ କୁନି ଝିଅର ମୃତଦେହକୁ ଉଦ୍ଧାର କରାଯାଇ ଥିଲା। ଏହାପରେ ପୋଲିସ ପୋଷ୍ଟମର୍ଟମ କରି ମୃତଦେହକୁ ପରିବାର ଲୋକଙ୍କୁ ପ୍ରଦାନ କରିଛି।
ବାରଣାସୀର ଚୌବେପୁର ଥାନା ଅଞ୍ଚଳର ଉମରହା ଗାଁ ନିବାସୀ ସନ୍ଦୀପ ପାଣ୍ଡେୟଙ୍କ ପତ୍ନୀ ଅଙ୍କିତା ପାଣ୍ଡେୟ, ନିଜ ୫ ବର୍ଷିୟା ଏକମାତ୍ର ଝିଅ ତାନ୍ୟା ସହ ଛଟ୍ ପୂଜା ପାଇଁ ବାପାଙ୍କ ଘରକୁ ଆସିଥିଲେ। ସୋମବାର ଛଟ୍ ପୂଜାକୁ ନେଇ ଗଙ୍ଗା ସ୍ନାନ କରିବାକୁ ଅଙ୍କିତା ନିଜ ୫ବର୍ଷିୟା ଝିଅ ସହ ମାଆ ଲକ୍ଷ୍ମୀନା , ଭଉଣୀ ଓ ଅନ୍ୟ ପରିଜନଙ୍କ ସହ ସୈଦପୁର ନଗର ସ୍ଥିତ ପକ୍କା ଘାଟକୁ ଆସିଥିଲେ। ସେଠାରେ ପରିବାରର ଅନ୍ୟ ପିଲାଙ୍କ ସହ ତାନ୍ୟା , ତାର ମାଉସୀ ଓ ଆଈ ଗଙ୍ଗା ନଦୀରେ ସ୍ନାନ କରୁ ଥିଲେ। ତାନ୍ୟାଙ୍କର ମାଆ ଅଙ୍କିତା ବାହାରେ ଠିଆ ହୋଇ , ସମସ୍ତଙ୍କର ସ୍ନାନ ଭିଡ଼ିଓ , ରିଲ୍ କରୁଥିଲେ।
ସ୍ନାନ କରୁଥିବା ବେଳେ ହଠାତ୍ ତାନ୍ୟା ଗଭୀର ପାଣିକୁ ଚାଲିଗଲା ଏବଂ ବୁଡିବାକୁ ଲାଗିଲା। ଦେଖୁ ଦେଖୁ ତାନ୍ୟା ଗଙ୍ଗାରେ ମିଶି ଗଲା। ଯେଉଁ ସମୟରେ ତାନ୍ୟା ବୁଡ଼ି ଯାଉ ଥିଲା ,ସେହି ସମୟରେ ମାଆ ଅଙ୍କିତା ନିଜ ଭଉଣୀ ଓ ଅନ୍ୟ ଲୋକଙ୍କର ଭିଡ଼ିଓ କରୁଥିଲେ। ଏହି ଭିଡ଼ିଓରେ ଝିଅଟି ବୁଡ଼ିବାର ମଧ୍ୟ ଦେଖା ଯାଉଛି , କିନ୍ତୁ କାହାର ଧ୍ୟାନ ସେ ଆଡ଼କୁ ଯାଇ ନଥିଲା। ଯେବେ ପରିବାର ଲୋକଙ୍କୁ ବହୁ ସମୟ ଯାଏ ତାନ୍ୟାଖୁ ଦେଖିବାକୁ ପାଇଲେ ନାହିଁ। ତାକୁ ସେତେବେଳ ଖୋଜିବାକୁ ଲାଗିଲେ। ଦେଖୁ ଦେଖୁ ପରିଜନଙ୍କ ମଧ୍ୟରେ ହୋ ହାଲା ଚିତ୍କାର ଆରମ୍ଭ ହୋଇ ଗଲା। ଯେବେ ସମସ୍ତେ ଭିଡ଼ିଓକୁ ଦେଖିଲେ ତ ଏଥିରେ ତାନ୍ୟା ବୁଡ଼ି ଯାଉ ଥିବାର ନଜର ଆସିଲା।
ଏହାପରେ ତୁରନ୍ତ ସ୍ଥାନୀୟ ଲୋକଙ୍କ ଦ୍ୱାରା ଘଟଣାର ସୂଚନା ପୋଲିସକୁ ଦିଆଗଲା। କିଛି ସମୟ ପରେ ଘଟଣା ସ୍ଥଳରେ ପହଞ୍ଚି ସ୍ଥାନୀୟ ଡାଇଭର ଓ ପୋଲିସର ସାହାଯ୍ୟରେ ତାନ୍ୟାଙ୍କର ମୃତଦେହକୁ ଘଟଣାର ଦୁଇ ଘଣ୍ଟା ପରେ ବାହାର କରାଗଲା। ଏହାପରେ ତାନ୍ୟାଙ୍କୁ ତୁରନ୍ତ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଗଲା , ସେଠାରେ ଡାକ୍ତର ତାଙ୍କୁ ମୃତ ଘୋଷିତ କରିଥିଲେ ।
ଏହାପରେ ମାଆ ଅଙ୍କିତାଙ୍କ ସହ ପରିଜନମାନେ ଦୁଃଖରେ ଭାଙ୍ଗି ପଡ଼ିଛନ୍ତି। ସଂପୃକ୍ତ ଅଞ୍ଚଳରେ ଶୋକର ଛାୟା ଖେଳି ଯାଇଛି।
