ଭୁବନେଶ୍ୱର,୦୪/୧୧: ରାଜ୍ୟରେ  କଂଗ୍ରେସ କମିଟି ଭାଙ୍ଗିବାର ୧୦୫ ଦିନ ବିତିବା  ପରେ ଏବେ ଆଶା ସଞ୍ଚାର ହୋଇଛି । ଶୀଘ୍ର  ରାଜ୍ୟକୁ ନୂଆ ପିସିସି ସଭାପତି ମିଳିବ ବୋଲି କଂଗ୍ରେସ ନେତା ବେଶ ତତ୍ପର ହୋଇ ପଡ଼ିଛନ୍ତି ।  ଜଣେ କିମ୍ବା ଦୁଇ ଜଣ ନୁହଁ, ଏକାଧିକ ନେତା ପିସିସି ସଭାପତି ଦୌଡ଼ରେ ଅଛନ୍ତି । ସେଥିମଧ୍ୟରୁ ସାଂସଦ ସପ୍ତଗିରି ଉଲାକା, ପୂର୍ବତନ ସାଂସଦ ଶ୍ରୀକାନ୍ତ ଜେନା, ଭକ୍ତଚରଣ ଦାସ, ରାମଚନ୍ଦ୍ର  ଖୁଣ୍ଟିଆ, ପୂର୍ବତନ ବିଧାୟକ ମହମ୍ମଦ ମୋକିମ, ଦେବାଶିଷ ପଟ୍ଟନାୟକ ଓ ଶରତ ରାଉତ ପ୍ରମୁଖଙ୍କ ନାମ ରହିଛି । ଦୌଡ଼ରେ ଥିବା କିଛି ସଭାପତି ଆଶାୟୀ ନିଜ ସପକ୍ଷରେ ଲବି କରିବା  ପାଇଁ କଂଗ୍ରେସ ନେତାଙ୍କୁ ତାରକା ହୋଟେଲରେ  ଆଲୋଚନା କରିବା  ସହିତ ମୋଟା ଅଙ୍କର  ହାତଗୁଞ୍ଜା ମଧ୍ୟ ଦେଉଥିବା ଚର୍ଚ୍ଚା ହେଉଛି । ତେବେ ଏସବୁ କାମ ଦେବ କିମ୍ବା ଯାହା ହାତରେ ବାସ୍ତବ  ସଙ୍ଗଠନ ରହିଛି, ସେହି ନେତାଙ୍କୁ ସୁଯୋଗ  ମିଳିବ । ଏହା ପର୍ଯ୍ୟବେକ୍ଷକଙ୍କ ହାତରେ ରହିଛି ।  ଏଆଇସିସି ରାଜ୍ୟ କଂଗ୍ରେସ ନେତା ବାଛିବା ପାଇଁ ପର୍ଯ୍ୟବେକ୍ଷକ ଭାବେ ପୂର୍ବତନ କେନ୍ଦ୍ରମନ୍ତ୍ରୀ  ଚରଣ ଦାସ ମହନ୍ତ ଓ ଛାତ୍ରକଂଗ୍ରେସର ପୂର୍ବତନ  ରାଷ୍ଟ୍ରୀୟ ସଭାପତି ମିନାକ୍ଷୀ ନଟରାଜନ୍‌ଙ୍କୁ ଦାୟିତ୍ୱ ଦେଇଛନ୍ତି । ଉଭୟ ନେତା ସୋମବାର ଦିନ ୧୨ଟାରେ କଂଗ୍ରେସ ଭବନରେ ପହଞ୍ଚିବେ । ଅପରାହ୍ନ ୧ଟାରେ ଓଡ଼ିଶା କଂଗ୍ରେସର ଷ୍ଟିୟରିଂ କମିଟି ସଦସ୍ୟ, ବିଧାୟକ ଓ ସାଂସଦଙ୍କ ସହ ବୈଠକ କରିବେ ।  

ସେହିପରି ଅପରାହ୍ନ ୩ଟାରେ କଂଗ୍ରେସ  ଭବନରେ ଜିଲ୍ଲା କଂଗ୍ରେସ ସଭାପତିଙ୍କ  ସହ ଆଲୋଚନା କରିବେ ଏଆଇସିସିର  ପର୍ଯ୍ୟବେକ୍ଷକ । ପରେ ଉଭୟ ୪ ଓ ୫  ତାରିଖରେ ବିଭିନ୍ନ କଂଗ୍ରେସ ନେତାଙ୍କ ସହ  ବ୍ୟକ୍ତିଗତ ଭାବେ ଆଲୋଚନା କରିବେ ବୋଲି  ବିଶ୍ୱସ୍ତ ସୂତ୍ରରୁ ସୂଚନା ମିଳିଛି । ସେପଟେ  ଦୌଡ଼ରେ ଥିବା ନେତାମାନଙ୍କ ମଧ୍ୟରୁ କିଛି  ନେତା ପୂର୍ବରୁ ଦିଲ୍ଲୀ ଯାଇ ଆସିଛନ୍ତି । ଅନ୍ୟ  କିଛି ଜଣ ଝାଡ଼ଖଣ୍ଡ ଯାଇ ଚରଣଦାସଙ୍କୁ  ଭେଟିଥିବା ବେଳେ ଏବେ ପୁଣି  ନେତାଙ୍କୁ ଏକଜୁଟ କରିବାରେ ଲାଗି  ପଡିଛନ୍ତି । ହେଲେ ଉଭୟ ପର୍ଯ୍ୟବେକ୍ଷକ  ଯାହା ସପକ୍ଷରେ ରିପୋର୍ଟ ଦେବେ,  ସେ ହିଁ ପିସିସି ସଭାପତି ହେବା ଏକ  ପ୍ରକାର ଚୂଡାନ୍ତ । ତେବେ ଯିଏ ହୁଅନ୍ତୁ ନା  କାହିଁକି, ମାତ୍ର ତୁରନ୍ତ ପିସିସି ସଭାପତି  ନିଯୁକ୍ତ କରାଯାଉ ବୋଲି ପୂର୍ବତନ ପିସିସି  ସଭାପତି ଜୟଦେବ ଜେନା ଓ ବରିଷ୍ଠ  କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି  ପ୍ରମୁଖ ଯୁକ୍ତି ବାଢ଼ିଛନ୍ତି ।