ପୁରୀ,୦୪/୧୧: ଦୁଇ ବନ୍ଧୁ ଆତ୍ମହତ୍ୟା ଘଟଣା ନେଇଛି ଭିନ୍ନ ମୋଡ଼ । ବନ୍ଧୁଙ୍କ ମୃତ୍ୟୁ ଖବର ପାଇ ଆଉ ଜଣେ ବନ୍ଧୁ ଆତ୍ମହତ୍ୟା କଲା ନା ବନ୍ଧୁକୁ ହତ୍ୟା କରି ନିଜେ ଆତ୍ମହତ୍ୟା କରିଛି ନା ଉଭୟଙ୍କୁ ହତ୍ୟା କରାଯାଇଛି । ଏଭଳି କିଛି ତଥ୍ୟକୁ ନେଇ ଦ୍ୱନ୍ଦରେ ପଡ଼ିଛି ପୁଲିସ । ଆଗପଛ ହୋଇ ଦୁଇ ବନ୍ଧୁ ବଳଙ୍ଗା ଥାନା ଅଧୀନ ସମୟପୁର ଗ୍ରାମର ଅଭିଜିତ ମହାରଣା ଓ ସଦର ଥାନା ଅଧୀନ ବାଲିପୁଟ ଗ୍ରାମର ମନୋଜ ପ୍ରଧାନଙ୍କ ମୃତଦେହ ମିଳିବା ପରେ ଅପମୃତ୍ୟୁ ମାମଲା ରୁଜୁ କରିଥିଲା ପୁଲିସ । କୁମ୍ଭାରପଡ଼ା ଓ ଜିଆର୍ପି ଥାନାରେ ୨ଟି ଅପମୃତ୍ୟୁ ମାମଲା ରୁଜୁ କରାଯାଇ ୨ ବନ୍ଧୁଙ୍କ ଶବ ବ୍ୟବଚ୍ଛେଦ କରାଯାଇଛି । ଉଭୟ ଆତ୍ମହତ୍ୟା କରିଛନ୍ତି ବୋଲି ଖବର ପ୍ରଚାରିତ ହୋଇଥିବା ବେଳେ ଏବେ ଏହା ଭିତରେ ଆଉ କିଛି ରହସ୍ୟ ଥିବା ଜଣାପଡ଼ିଛି । ଯାହାକୁ ନେଇ ପୁଲିସ ଖୋଳତାଡ଼ କରିବାରୁ ଏହାକୁ ଚର୍ଚ୍ଚା ଆରମ୍ଭ ହୋଇଛି । ଏହା ମଧ୍ୟରେ ବ୍ୟବଚ୍ଛେଦ ରିପୋର୍ଟ ସହ ସିଡିଆର୍ (କଲ୍ ଡିଟେଲ୍ସ ରେକର୍ଡ) କୁ ଅପେକ୍ଷା କରିଛି ପୁଲିସ । ମାମଲା ପଛର ରହସ୍ୟ ସିଡିଆର୍ ଖୋଲିବ ବୋଲି ପୁଲିସ କହିଛି ।
ପୁଲିସ ତଥ୍ୟ ଅନୁସାରେ ୫ ବର୍ଷ ତଳୁ କୁମ୍ଭାରପଡ଼ା ଥାନା ଅଧୀନ ଫ୍ରେଣ୍ଡ୍ସ୍ କ୍ଲବ୍ ଲେନ୍ରେ ସୁରେଶ ଦାସଙ୍କ ଘରେ ଭଡ଼ାରେ ରହୁଥିଲେ ମନୋଜ । ଏବେ ନର୍ସିଂ ପାଠ ପଢ଼ୁଥିବା ବେଳେ ଅଭିଜିତ୍ଙ୍କୁ ଆଣି ପାଖରେ ରଖିଥିଲେ । ଏକା ରହିବାକୁ ଭଲ ଲାଗୁ ନଥିବାରୁ ଅଭିଜିତ୍ଙ୍କୁ ପାଖରେ ରଖିଥିବା ଘର ମାଲିକଙ୍କୁ କହିଥିଲେ ମନୋଜ । ପୁରୀ ସହରରେ କାଠ କାମ କରନ୍ତି ଅଭିଜିତ । କିଛିଦିନ ତଳୁ ଉଭୟଙ୍କ ମଧ୍ୟରେ କୌଣସି କାରଣକୁ କେନ୍ଦ୍ର କରି ଝଗଡ଼ା ଲାଗିଥିଲା ବୋଲି ସୂଚନା ପାଇଛି ପୁଲିସ । ଶନିବାର ଅପରାହ୍ନରେ ମନୋଜ ଅଭିଜିତ୍ଙ୍କ ବାପା ଭୀମସେନ ମହାରଣାଙ୍କୁ ଫୋନ୍ କଲ୍ କରି ପୁଅ ଆତ୍ମହତ୍ୟା କରିଦେବ ବୋଲି ଧମକ ଦେଉଥିବା କହିଥିଲେ । ସେ ଭୁବନେଶ୍ୱର ଆସିଥିବାରୁ ତୁରନ୍ତ ଭଡ଼ାଘରକୁ ଯାଇ ଦେଖିବା ପାଇଁ ଭୀମସେନଙ୍କୁ କହିଥିଲେ ।ଭୀମସେନ ଭଡ଼ାଘରେ ପହଞ୍ଚିବା ବେଳେ କବାଟ ଖୋଲା ଥିଲା, ଭିତରେ ପୁଅ ଅଭିଜିତ୍ ବେକରେ ଗାମୁଛା ବାନ୍ଧି ଝୁଲୁଥିଲା । ପୁଲିସ ସହଯୋଗରେ ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସେପଟେ ଭୀମସେନଙ୍କ ସହ ଫୋନ୍ କଲ୍ରେ ଯୋଗାଯୋଗ କରିଥିଲେ ମନୋଜ । ଅଭିଜିତ୍ଙ୍କ ମୃତ୍ୟୁ ଖବର ପାଇବାର କିଛି ସମୟ ପରେ ସାକ୍ଷୀଗୋପାଳ ରେଳ ଷ୍ଟେସନ୍ ନିକଟରେ ମନୋଜଙ୍କ କ୍ଷତାକ୍ତ ମୃତଦେହ ରେଳ ଧାରଣାରେ ପଡ଼ିଥିବା ଦେଖିବାକୁ ମିଳିଥିଲା । ଏକ ଟ୍ରେନ୍ ଇଞ୍ଜିନ୍ର ଡ୍ରାଇଭର୍ ମୃତଦେହ ପଡ଼ିଥିବା ଦେଖି ଜିଆର୍ପିକୁ ଖବର ଦେଇଥିଲେ । ଏହାପରେ ଶବ ଜବତ କରିଥିଲା ଜିଆର୍ପି । ରବିବାର ଉଭୟଙ୍କ ଶବ ବ୍ୟବଚ୍ଛେଦ କରାଯାଇଛି ।
ଜିଆର୍ପି ଥାନା ଓଆଇସି ସନ୍ତୋଷ କୁମାର ବାହିନୀପତି କହିଛନ୍ତି ଯେ, ମନୋଜଙ୍କ ପାଖରୁ କିଛି ବି ମିଳିନି । ତାଙ୍କ ମୋବାଇଲ୍ ପାଇନି ପୁଲିସ । ତାଙ୍କ ପକେଟ୍ରୁ ଟ୍ରେନ୍ ଟିକଟ୍ ବି ମିଳିନି । ତେଣୁ ସେ ଟ୍ରେନ୍ରେ ବିନା ଟିକଟ୍ରେ ଯାଉଥିଲେ ନା ଅନ୍ୟ କେହି ଆଣି ଏଠାରେ ପହଞ୍ଚାଇଛି ତାହା ଜଣାପଡିନାହିଁ । ଏପରିକି ସେ ଭୁବନେଶ୍ୱରୁ ପୁରୀ ଆସୁଥିଲେ ନା ପୁରୀରୁ ଭୁବନେଶ୍ୱର ଯାଉଥିଲେ ତାହା ବି ଜଣାପଡ଼ିନି। ତେଣୁ ସିଡିଆର୍ ରିପୋର୍ଟ ଆସିଲେ ଘଟଣା ସମୟରେ ସେମାନଙ୍କ ଗତିବିଧି ସମ୍ପର୍କରେ ଜଣାପଡ଼ିବ ବୋଲି କହିଛନ୍ତି ଓଆଇସି ଶ୍ରୀ ବାହିନୀପତି ।
ସେହିପରି ଅଭିଜିତ୍ କେଉଁ ସମୟରେ ମନୋଜଙ୍କ ସହ କଥା ହୋଇଥିଲେ, ମନୋଜ ସେତେବେଳେ କେଉଁଠାରେ ଥିଲେ, କେତେଥର ଓ କେତେ ସମୟ ଲେଖାଏଁ ଉଭୟ କଥା ହୋଇଥିଲେ ତାହାର ତଦନ୍ତ ଆରମ୍ଭ କରିଛି କୁମ୍ଭାରପଡ଼ା ଥାନା ପୁଲିସ । ଟିକଟ୍ ନଥିଲା । ବ୍ୟବଚ୍ଛେଦ ରିପୋର୍ଟରୁ ମୃତ୍ୟୁର ସମୟ ଜଣାପଡ଼ିବ । ତେବେ ସେହି ସମୟରେ ସତରେ ମନୋଜ ଭୁବନେଶ୍ୱରରେ ଥିଲେ ନା ଅନ୍ୟ କେଉଁଠି ଥିଲେ ତାହା ସିଡିଆର୍ ରିପୋର୍ଟରୁ ଜଣାପଡ଼ିବ ବୋଲି କହିଛନ୍ତି କୁମ୍ଭାରପଡ଼ା ଥାନା ଆଇଆଇସି ଜୟଦୀପ ମହାନ୍ତି । ଏଭଳି ସ୍ଥିତିରେ ପୁଅର ମୃତ୍ୟୁ ପଛରେ ଅଭିଜିତ୍ଙ୍କ ହାତ ଥିବା ନେଇ ବାପା ଭୀମସେନ ଅଭିଯୋଗ କରୁଛନ୍ତି । ତାଙ୍କ ସମ୍ପର୍କୀୟଙ୍କ କହିବା ଅନୁସାରେ ଅଭିଜିତ୍ଙ୍କୁ ହତ୍ୟା କରି ଆତ୍ମହତ୍ୟାର ରୂପ ଦିଆଯାଉଛି । ତେବେ ଏହା ହତ୍ୟା ନା ଆତ୍ମହତ୍ୟା କିମ୍ବା ମୃତ୍ୟୁ ପଛର ରହସ୍ୟ ଖୁବ୍ଶୀଘ୍ର ଉନ୍ମୋଚନ ହୋଇଯିବ । ଯଦି ହତ୍ୟା ବୋଲି ସୁରାକ୍ ମିଳେ ତେବେ ମାମଲା ଟର୍ଣ୍ଣ କରିବ ବୋଲି କହିଛନ୍ତି ଆଇଆଇସି ଶ୍ରୀ ମହାନ୍ତି ।
