ନୂଆଦିଲ୍ଲୀ,୨୧/୦୯: ଭାରତର ଅନ୍ୟତମ ଅଗ୍ରଣୀ ସ୍ୱାସ୍ଥ୍ୟ ବୀମା କମ୍ପାନି ଷ୍ଟାର୍ ହେଲ୍ଥର ଲକ୍ଷ ଲକ୍ଷ ଗ୍ରାହକଙ୍କ ସମ୍ବେଦନଶୀଳ ତଥ୍ୟ ଚୋରି ହୋଇଯାଇଛି । ରିପୋର୍ଟ ଅନୁସାରେ, ହ୍ୟାକର୍ ଦ୍ୱାରା ଚୋରି ହୋଇଥିବା ଗ୍ରାହକଙ୍କ ଏ ତଥ୍ୟ ଇନ୍ଷ୍ଟାଣ୍ଟ ମେସେଜିଂ ପ୍ଲାଟ୍ଫର୍ମ ଟେଲିଗ୍ରାମରେ ଚାଟ୍ବଟ ମାଧ୍ୟମରେ ସର୍ବସାଧାରଣରେ ଉପଲବ୍ଧ ରହିଛି । ଟେଲିଗ୍ରାମ ମେସେଜିଂ ଆପ୍କୁ ଅପରାଧିକ କାର୍ଯ୍ୟରେ ବ୍ୟବହାର ଲାଗି ଅନୁମତି ଦିଆଯାଉଥିବା ଅଭିଯୋଗରେ କିଛି ସପ୍ତାହ ତଳେ ଏହାର ପ୍ରତିଷ୍ଠାତା ପାଭେଲ ଦୁରୋଭଙ୍କୁ ଗିରଫ କରାଯାଇଥିଲା ।ବର୍ତ୍ତମାନ ଏ ରିପୋର୍ଟ ଏହି ମେସେଜିଂ ଆପ୍ ପାଇଁ ଅଡୁଆକୁ ଆହୁରି ବଢ଼ାଇଦେଇଛି ।
ରିପୋର୍ଟରେ କୁହାଯାଇଛି ଯେ, ଗ୍ରାହକଙ୍କ ଏ ଡାଟାରେ ନାଁ, ଠିକଣା ଏବଂ ଇ-ମେଲ ସହିତ ମେଡିକାଲ ରିପୋର୍ଟ ଭଳି ସମ୍ବେଦନଶୀଳ ତଥ୍ୟ ରହିଛି । ଚାଟ୍ବଟ୍ର ଜଣେ କଥିତ କ୍ରିଏଟର ଜଣେ ସୁରକ୍ଷା ଗବେଷକଙ୍କୁ କହିଛନ୍ତି ଯେ, ଲକ୍ଷ ଲକ୍ଷ ଲୋକଙ୍କ ବ୍ୟକ୍ତିଗତ ତଥ୍ୟ ବିକ୍ରି ପାଇଁ ରହିଛି ଏବଂ ଚାଟ୍ବୋଟକୁ ତଥ୍ୟ ମାଗିବା ପରେ ନମୂନା ମିଳିଯାଉଛି ।
ରୟଟର୍ସ ପ୍ରକାଶ କରିଛି ଯେ, ଚାଟ୍ବଟ୍କୁ ବ୍ୟବହାର କରି ପଲିସି ଏବଂ କ୍ଲେମ୍ର ଦସ୍ତାବିଜ୍ଗୁଡ଼ିକୁ ଡାଉନ୍ଲୋଡ୍ କରାଯାଇପାରିବ । ଏହି ଡାଟାରେ ଷ୍ଟାର୍ ହେଲ୍ଥ ୟୁଜରଙ୍କ ନାଁ, ଫୋନ ନମ୍ବର, ଠିକଣା, ଟିକସ ବିବରଣୀ, ପରିଚୟପତ୍ର, ଟେଷ୍ଟ ରିପୋର୍ଟ ଏବଂ ରୋଗର ଚିକିତ୍ସା ସହ ଜଡ଼ିତ ତଥ୍ୟ ବି ସାମିଲ ଅଛି ।
ଷ୍ଟାର୍ ହେଲ୍ଥ ଆଣ୍ଡ୍ ଆଲାଏଡ୍ ଇନ୍ସ୍ୟୁରାନ୍ସ, ଯାହାର ବଜାର ମୂଲ୍ୟ ୪୦୦ କୋଟି ଡଲାରରୁ ଅଧିକ କମ୍ପାନି ଏକ ବିବୃତିରେ କହିଛି ଯେ, ଏହା ସ୍ଥାନୀୟ ଅଧିକାରୀମାନଙ୍କୁ କଥିତ ଅନଧିକୃତ ଡାଟା ଆକ୍ସେସ୍ର ସୂଚନା ଦେଇଛି । ପ୍ରାରମ୍ଭିକ ଯାଞ୍ଚରୁ ଜଣାପଡ଼ିଛି ଯେ, ଡାଟାର କୌଣସି ବ୍ୟାପକ ଅପବ୍ୟବହାର କରାଯାଇନାହିଁ ଏବଂ ଗ୍ରାହକଙ୍କ ସମ୍ବେଦନଶୀଳ ଡାଟା ସୁରକ୍ଷିତ ଅଛି । ତେବେ ଚାଟ୍ବଟ୍ ଜରିଆରେ ଉପଲବ୍ଧ ଡାଟାରୁ କମ୍ପାନିର ଦାବି ଭୁଲ ପ୍ରମାଣିତ ହେଉଛି ।
ଚାଟ୍ବଟ୍ ଫିଚର୍ ମାଧ୍ୟମରେ ଦୁବାଇଭିତ୍ତିକ ଟେଲିଗ୍ରାମ ବିଶ୍ୱର ଅନ୍ୟତମ ବୃହତ୍ ମେସେଞ୍ଜର ଆପ୍ ପାଲଟିଛି । ଏହାର ମାସିକ ସକ୍ରିୟ ଉପଭୋକ୍ତା ସଂଖ୍ୟା ୯୦ କୋଟି । କିନ୍ତୁ ଏହାର ରୁଷଜନ୍ମିତ ପ୍ରତିଷ୍ଠାତା ପାଭେଲ ଦୁରୋଭଙ୍କ ଗତ ମାସ ଫ୍ରାନ୍ସରେ ଗିରଫଦାରୀ ପରେ ଟେଲିଗ୍ରାମ ଉପରେ ଯାଞ୍ଚ ବଢ଼ାଇଦିଆଯାଇଛି । ଅଭିଯୋଗ ରହିଛି ଯେ, ଏହି ଆପ୍କୁ ଅପରାଧ କାର୍ଯ୍ୟ ପାଇଁ ବ୍ୟବହାର କରାଯାଉଛି । ତେବେ ଅଭିଯୋଗକୁ ଉଭୟ ଦୁରୋଭ ଏବଂ ଟେଲିଗ୍ରାମ ପକ୍ଷରୁ ଖଣ୍ଡନ କରାଯାଇଛି ।
ଚୋରି ତଥ୍ୟକୁ ବିକ୍ରି କରିବା ପାଇଁ ଟେଲିଗ୍ରାମ ଚାଟ୍ବଟ୍ର ବ୍ୟବହାର ଦର୍ଶାଉଛି ଯେ, ଅପରାଧିକ କାର୍ଯ୍ୟରେ ଜଡ଼ିତ ଏଜେଣ୍ଟମାନଙ୍କୁ ନିୟନ୍ତ୍ରଣ କରିବାରେ ଟେଲିଗ୍ରାମ ବିଫଳ ହୋଇଛି । ଏଜେଣ୍ଟମାନେ ଏହାର ଟେକ୍ନୋଲୋଜିର ଫାଇଦା ଉଠାଇ ଅନୈତିକ କାର୍ଯ୍ୟରେ ଲିପ୍ତ ହେଉଛନ୍ତି । ଏହାସହିତ ଗ୍ରାହକଙ୍କ ତଥ୍ୟକୁ ସୁରକ୍ଷିତ ରଖିବାରେ ଭାରତୀୟ କମ୍ପାନିଗୁଡ଼ିକ ସାମ୍ନା କରୁଥିବା ଚ୍ୟାଲେଞ୍ଜ୍କୁ ଏହା ଦର୍ଶାଉଛି । ତେବେ ବଟ୍କୁ ପରୀକ୍ଷା କରି ରୟଟର୍ସ ଜୁଲାଇ ୨୦୨୪ରେ ଗୁରୁତ୍ୱପୂର୍ଣ୍ଣ ତଥ୍ୟ ଥିବା ୧୫୦୦ରୁ ଅଧିକ ଫାଇଲ୍ ଡାଉନ୍ଲୋଡ୍ କରିଥିବା ପ୍ରକାଶ କରିଛି ।
ଚାଟ୍ବଟ୍ସ ବିବରଣୀକୁ ନେଇ ରୟଟର୍ସ ଟେଲିଗ୍ରାମକୁ ଅବଗତ କରିଥିଲା । ପ୍ରକାଶଯୋଗ୍ୟ, ଚାଟ୍ବଟ ହେଉଛି ଏକ ସଫ୍ଟୱେର୍ ଆପ୍ଲିକେଶନ ବା ୱେବ୍ ଇଣ୍ଟର୍ଫେସ୍, ଯାହାକି ଟେକ୍ସଟ ଏବଂ ଭଏସ୍ ଇଣ୍ଟର୍ଆକ୍ସନ ମାଧ୍ୟମରେ ଗ୍ରାହକଙ୍କ ପ୍ରଶ୍ନର ଉତ୍ତର ଦିଏ । ଏହା ଏକ ୱେବ୍ସାଇଟ୍, ହେଲ୍ପ ସେଣ୍ଟର କିମ୍ବା ଅନ୍ୟାନ୍ୟ ଉତ୍ସଗୁଡ଼ିକୁ ସ୍କାନ୍ କରି ଗ୍ରାହକଙ୍କ ପ୍ରଶ୍ନର ତ୍ୱରିତ ଏବଂ ସଠିକ ଏଆଇ-ସମର୍ଥିତ ଉତ୍ତର ଦେଇଥାଏ ।
