ନୂଆଦିଲ୍ଲୀ,୧୧/୦୯ : ହରିଆଣାରେ ସେପ୍ଟେମ୍ବର ୧୨ ତାରିଖ ପୂର୍ବରୁ ବିଧାନସଭାର ମୌସୁମୀ ଅଧିବେଶନ ଡାକିବା ଓ ବିଧାନସଭା ଭଙ୍ଗ କରିବା ନେଇ ସାମ୍ବିଧାନିକ ସଙ୍କଟ ଭିତରେ ହରିଆଣା ସରକାର ବୁଧବାର ଜରୁରି ମନ୍ତ୍ରିମଣ୍ଡଳର ବୈଠକ ଡାକିଛନ୍ତି । ବିଶେଷ ସୂତ୍ରରୁ ମିଳିଥିବା ସୂଚନା ଅନୁସାରେ ଏହି ବୈଠକରେ ବିଧାନସଭା ଭଙ୍ଗ କରିବାକୁ ନିଷ୍ପତ୍ତି ନିଆଯିବ । ମୁଖ୍ୟମନ୍ତ୍ରୀ ନାୟବ ସିଂହ ସୈନିଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ଏହି ବୈଠକରେ ମନ୍ତ୍ରିମଣ୍ଡଳର ଅଧିକାଂଶ ସଦସ୍ୟ ସାମିଲ ହେବେ ।
ସୂଚନା ଅନୁସାରେ ମଙ୍ଗଳବାର ଏହି ବୈଠକ ବସିବାର ଥିଲା । କିନ୍ତୁ ବିଧାନସଭା ନିର୍ବାଚନ ପାଇଁ ପ୍ରାର୍ଥୀ ତାଲିକା ଘୋଷଣା ଯୋଗୁ ତାହା ସମ୍ଭବ ହୋଇପାରି ନଥିଲା । ତେଣୁ ମନ୍ତ୍ରିମଣ୍ଡଳ ବୈଠକ ଆଜିକୁ ଘୁଞ୍ଚାଇ ଦିଆଯାଇଛି । କିନ୍ତୁ କେତେବେଳେ ଏହି ବୈଠକ ବସିବ ତାହା ସ୍ପଷ୍ଟ ହୋଇନାହିଁ । ହେଲେ ବୈଠକରେ ସାମିଲ ହେବାକୁ ମନ୍ତ୍ରୀମାନଙ୍କୁ ଚିଠି କରାଯାଇଛି । କିଛି ମନ୍ତ୍ରୀ ବୈଠକରେ ଉପସ୍ଥିତ ହୋଇପାରିବେ ନାହିଁ ବୋଲି ଦର୍ଶାଇଥିଲା ବେଳେ ସେମାନଙ୍କୁ ଭିଡିଓ କନ୍ଫରେନ୍ସିଂ ଯୋଗେ ସାମିଲ ହେବାକୁ ପରାମର୍ଶ ଦିଆଯାଇଛି । ସମ୍ବିଧାନ ବିଶେଷଜ୍ଞଙ୍କ କହିବାନୁଯାୟୀ ବିଧାନସଭା ଭଙ୍ଗ କରିବା ଜରୁରି ହୋଇପଡିଛି । ସାମ୍ବିଧାନିକ ଦୃଷ୍ଟିରୁ ଶେଷ ଅଧିବେଶନର ୬ମାସ ଭିତରେ ଆଉ ଏକ ଅଧିବେଶନ ବସିବା ବାଧ୍ୟତାମୂଳକ । କିନ୍ତୁ ବିଧାନସଭା ଅଧିବେଶନ ପୂର୍ବରୁ ରାଜ୍ୟରେ ନିର୍ବାଚନ ଲାଗି ତାରିଖ ଘୋଷଣା ହୋଇସାରିଛି ।
ବର୍ତ୍ତମାନ ବିଧାନସଭାର କାର୍ଯ୍ୟକାଳ ଆସନ୍ତା ନଭେମ୍ବର ୩ରେ ଶେଷ ହେବ । ୫ମାସ ତଳେ ୨୦୨୪ ମାର୍ଚ୍ଚ ୧୩ ତାରିଖରେ ଦିନିକିଆ ସ୍ୱତନ୍ତ୍ର ଅଧିବେଶନ ଡକାଯାଇଥିଲା । ସେହି ଅଧିବେଶନରେ ନାୟବ ସିଂହ ସୈନି ସରକାର ଆସ୍ଥାଭୋଟ ଲୋଡିଥିଲେ । ତେଣୁ ପରବର୍ତ୍ତୀ ବିଧାନସଭାର ଅଧିବେଶନ ଦିନେ ପାଇଁ ହେଉ କିମ୍ବା ଅଧାଦିନ ପାଇଁ ସେପ୍ଟେମ୍ବର ୧୨ ତାରିଖ ପୂର୍ବରୁ ବସିବା ବାଧ୍ୟତାମୂଳକ । ସମ୍ବିଧାନରେ ସ୍ପଷ୍ଟ ଉଳ୍ଲେଖ କରାଯାଇଛି କି ଶେଷ ଅଧିବେଶନ ବସିବା ଓ ପରବର୍ତ୍ତୀ ଅଧିବେଶନ ଆରମ୍ଭ ହେବା ମଧ୍ୟରେ ୬ ମାସର ବ୍ୟବଧାନ ରହିବା କଥା ନୁହେଁ । କିନ୍ତୁ ଗତ କ୍ୟାବିନେଟ ବୈଠକରେ ସରକାରଙ୍କ ପକ୍ଷରୁ ବିଧାନସଭା ଅଧିବେଶନ ଡକାଯିବା ନେଇ କୌଣସି ନିଷ୍ପତ୍ତି ନିଆଯାଇ ନଥିଲା । ତେଣୁ ସରକାରଙ୍କ ପାଖରେ ଏକମାତ୍ର ବିକଳ୍ପ ରହିଛି ଯେ ବିଧାନସଭା ଭଙ୍ଗ କରିବା ଲାଗି ରାଜ୍ୟପାଳଙ୍କୁ ସୁପାରିସ କରିବା ।
ରାଜ୍ୟରେ ବିଧାନସଭା ନିର୍ବାଚନ ତାରିଖ ଘୋଷଣା ହେବା ପରେ ସାମ୍ବିଧାନିକ ସଙ୍କଟ ସୃଷ୍ଟି ହୋଇଛି । ତାର କାରଣ ହେଉଛି ସରକାର ୬ମାସ ଭିତରେ ବିଧାନସଭା ଅଧିବେଶନ ଡାକିବା କଥା । ଅର୍ଥାତ ସେପ୍ଟେମ୍ବର ୧୨ ପୂର୍ବରୁ ଅଧିବେଶନ ବସିବା ଅନିବାର୍ଯ୍ୟ । ହେଲେ ତାହା ସମ୍ଭବ ହୋଇନଥିଲା । ତେଣୁ କୁହାଯାଉଛି କି ଏହି ସାମ୍ବିଧାନିକ ସଙ୍କଟ ଐତିହାସିକ । କାରଣ ସ୍ୱାଧୀନତା ପରେ ଏଭଳି ସ୍ଥିତି କେବେ ଆସି ନଥିଲା । କରୋନା ମହାମାରୀ ବେଳେ ହରିଆଣାରେ ଏଭଳି ସଙ୍କଟ ଟାଳିବା ଲାଗି ଦିନିକିଆ ସ୍ୱତନ୍ତ୍ର ଅଧିବେଶନ ଡକାଯାଇଥିଲା । ୬ମାସ ଭିତରେ ବିଧାନସଭାର ଅଧିବେଶନ ନ ଡାକିବା ଭଳି ଉଦାହରଣ ଦେଶରେ ନାହିଁ । ବର୍ତ୍ତମାନ ସରକାରଙ୍କ ପାଖରେ ଦୁଇଟି ବିକଳ୍ପ ରହିଛି । ଗୋଟିଏ ହେଉଛି ବିଧାନସଭା ଅଧିବେଶନ ଡାକିବା । ଦିନେ ନ ହେଲେ ବି ୧ ଘଣ୍ଟା ପାଇଁ ମଧ୍ୟ ଡାକିବାକୁ ପଡିବ । ଦ୍ୱିତୀୟ ବିକଳ୍ପ ହେଲା ବିଧାନସଭା ଭଙ୍ଗ କରିବା ଲାଗି ରାଜ୍ୟ ସରକାର ରାଜ୍ୟପାଳଙ୍କୁ ସୁପାରିସ କରିବା । ବିଧାନସଭା ଭଙ୍ଗ ହେଲେ ସରକାରର ପତନ ଘଟିବ ଏବଂ ରାଜ୍ୟପାଳଙ୍କ ନିର୍ଦ୍ଦେଶରେ ନାୟବ ସିଂହ ସୈନ୍ୟ ରାଜ୍ୟରେ କାମଚଳା ମୁଖ୍ୟମନ୍ତ୍ରୀ ଭାବେ ରହିବେ ।
