ମାଲକାନଗିରି ୨୦/୧୦ ମାଲକାନଗିରିରୁ ଛତିଶଗଡ଼କୁ ଚୋରା ଚାଲାଣ ପାଇଁ ଜଙ୍ଗଲରେ ଗଞ୍ଜେଇ ପ୍ୟାକିଂ ଚାଲୁଥିବା ବେଳେ ପୁଲିସ ଚଢ଼ାଉ କରି ୭୫କେଜି ଗଞ୍ଜେଇ, ପ୍ରେସ ମେସିନ ଓ ଜ୍ୟାକ ଜବତ କରିବା ସହିତ ଜଣଙ୍କୁ ଗିରଫ କରିବାରେ ସଫଳ ହୋଇଛି । ଏହା ବ୍ୟତୀତ ଏହି ଘଟଣାରେ ୭ଜଣ ଫେରାର ହୋଇଯାଇଥିବା ସୂଚନା ରହିଛି ।
ପୁଲିସ ସୂଚନା ଅନୁଯାଇ ଶନିବାର ସନ୍ଧ୍ୟାରେ ମାଲକାନଗିରି ଥାନାସ୍ଥ ପଦ୍ମଗିରି ପଞ୍ଚାୟତ ଛତିଶଗଡ଼ ସୀମାନ୍ତକୁ ଲାଗିଥିବା ତଣ୍ଡାପାଲି ଗ୍ରାମ ଜଙ୍ଗଲରେ କିଛି ଗଞ୍ଜେଇ ଚୋରା ବେପାରୀ ଛତିଶଗଡ଼କୁ ଚୋରା ଚାଲାଣ ନିମନ୍ତେ ଗଞ୍ଜେଇ ପ୍ୟାକିଙ୍ଗ କରୁଥିବାର ପୁଲିସ ଖବର ପାଇଥଲେ।
ମାଲକାନଗିରି ଆଦର୍ଶ ଥାନା ଆଇଆଇସି ରିଗନ କିଣ୍ଡୋଙ୍କ ନିର୍ଦ୍ଦେଶ କ୍ରମେ ଏସଆଇ ପ୍ରଭାତ ଗୌଡ଼ଙ୍କ ନେତୃତ୍ୱରେ ହାବିଲଦାର ମିହିରି ସାମଲ, କନେଷ୍ଟବଳ ଲକ୍ଷ୍ମଣ ମାରାଣ୍ଡି, ପଦ୍ମନାୟକ ପ୍ରମୁଖ ପୁଲିସ ସଦଳବଳ ସେ ଜଙ୍ଗଲରେ ପହଁଚି ଚଢାଉ କରିଥିଲେ । ପୁଲିସକୁ ଦେଖି ଗଞ୍ଜେଇ ଛାଡ଼ି ଦେଇ ଦୌଡ଼ି ପଳାଇ ଥିବାବେଳେ ଜଣଙ୍କୁ ପୁଲିସ ମାଡି ବସିଥିଲା । ଅନ୍ୟ ୭ଜଣ ଘଞ୍ଚ ଜଙ୍ଗଲରେ ଲୁଚିପଳାଇ ଯାଇଥିଲେ । ଘଟଣା ସ୍ଥଳରୁ ୭୫ କେଜି ଗଞ୍ଜେଇ, ପ୍ରେସର ମେସିନ, ଜ୍ୟାକ ମେସିନ ଜବତ କରିଛନ୍ତି । ଏହି ଗଞ୍ଜେଇ ଚୋରା ଚାଲାଣ ଅଭିଯୋଗରେ ଝରାପାଲୀ ପଞ୍ଚାୟତ ମୁରିଆପାଲି ଗ୍ରାମର କୃଷ୍ଣ ମାଡକାମୀଙ୍କୁ ଗିରଫ କରାଯାଇଛି । ଏହି ଗଞ୍ଜେଇ ଗୁଡିକୁ ଚିତ୍ରକୋଣ୍ଡା ଅଞ୍ଚଳରୁ ଆଣି ତଣ୍ଡାପାଲି ଜଙ୍ଗଲରେ ପ୍ରେସର ମେସିନ ଜ୍ୟାକ ମେସିନ ଦ୍ୱାରା କେକ ପରି ପ୍ୟାକିଙ୍ଗ କରୁଥିଲେ । ଏହାକୁ ଛତିଶଗଡ଼ ରାଜ୍ୟକୁ ଚୋରାଚାଲାଣ କରାଯାଇଥାନ୍ତା । ଅଭିଯୁକ୍ତ କୃଷ୍ଣକୁ ରବିବାର କୋର୍ଟ ଚାଲାଣ କରାଯାଇଛି ବୋଲି ଥାନା ଅଧିକାରୀ ଶ୍ରୀ ଆର କିଣ୍ଡୋ ସୂଚନା ଦେଇଛନ୍ତି।