ନୂଆଦିଲ୍ଲୀ: କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ଏସଏମ କୃଷ୍ଣାଙ୍କ ସୋମବାର ରାତିରେ ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୯୨ ବର୍ଷ ବୟସ ହୋଇଥିଲା। ସେ ବୈଦେଶିକ ମନ୍ତ୍ରୀ ଭାବରେ ମଧ୍ୟ କାମ କରିଛନ୍ତି । ପ୍ରାତଃ ୨.୪୫ ମିନିଟ ସମୟରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ଗଣମାଧ୍ୟମର ରିପୋର୍ଟ ଅନୁସାରେ ଦିର୍ଘ ଦିନ ଧରି ସେ ଅସୁସ୍ଥ ଥିଲେ, ଆଉ ଗତ କିଛି ମାସ ହେବ ତାଙ୍କୁ ବାରମ୍ବାର ହସ୍ପିଟାଲରେ ଭର୍ତ୍ତି ହେବାକୁ ପଡୁଥିଲା।
ବେଙ୍ଗାଲୁରୁକୁ ଟେକ୍ ରାଜଧାନୀ ଭାବେ ବନାଇବାରେ ଗୁରୁତ୍ବପୂର୍ଣ୍ଣ ଭୁମିକା ନିଭାଇଥିବା କୃଷ୍ଣାଙ୍କ ଜନ୍ମ ୧ ମଇ ୧୯୩୨ରେ ମାଣ୍ଡ୍ୟା ଜିଲ୍ଲାର ସୋମନହଲ୍ଲୀରେ ହୋଇଥିଲା। କଂଗ୍ରେସରେ ଦିର୍ଘ ସମୟ ଧରି ରହିବା ପରେ ନିଜ ରାଜନୈତିକ ଜୀବନର ଶେଷ ସମୟ ବିଜେପିରେ କଟିଥିଲା । ସେ ମୈସୁରର ମହାରାଜା ମହାବିଦ୍ୟାଳୟରୁ ଗ୍ରାଜୁଏସନ ଡିଗ୍ରୀ ହାସଲ କରିଛନ୍ତି ଏବଂ ବେଙ୍ଗାଲୁରୁର ଗଭର୍ଣ୍ଣମେଣ୍ଟ ଲ କଲେଜରୁ ଆଇନରେ ଡିଗ୍ରୀ ହାସଲ କରିଛନ୍ତି । ଆଉ ପରେ ଡଲାସରେ ଦକ୍ଷିଣୀ ମେଥୋଡିଷ୍ଟ ୟୁନିଭରସିଟି ଏବଂ ଜର୍ଜ ଓ୍ବାସିଂଟନ ୟୁନିଭରସିଟିରେ ପଢିବାକୁ ଆମେରିକା ଯାଇଥିଲେ।
