ରାଞ୍ଚି: ଝାଡ଼ଖଣ୍ଡ ହାଇକୋର୍ଟ ଜମି ଦୁର୍ନୀତି ସଂପର୍କିତ ମନି ଲଣ୍ଡରିଂ ମାମଲାରେ ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଜାମିନ ଦେଇଛନ୍ତି । ଦୀର୍ଘ ୫ ମାସ ପରେ ବିର୍ସା ମୁଣ୍ଡା ଜେଲ୍ରୁ ମୁକୁଳିଛନ୍ତି ହେମନ୍ତ ସୋରେନ । ଜେଲ୍ରୁ ବାହାରିବା ପରେ ସୋରେନଙ୍କ ପ୍ରଥମ ପ୍ରତିକ୍ରିୟା ସାମ୍ନାକୁ ଆସିଛି । ହେମନ୍ତ ସୋରେନ୍ କହିଛନ୍ତି ଯେ, ‘ମୋ ଉପରେ ମିଥ୍ୟା ଅଭିଯୋଗ ଲଗାଇ ଜେଲ୍ରେ ବନ୍ଦ କରିଥିଲେ । ସାଧାରଣ ଲୋକଙ୍କ ସ୍ବର ଚପାଇ ଦେବାକୁ ଉଦ୍ୟମ କରାଯାଉଛି । ନ୍ୟାୟାଳୟ ନିଜର ନ୍ୟାୟ ଶୁଣାଇଛନ୍ତି, ତେଣୁ ମୁଁ ଆଜି ବାହାରକୁ ଆସିଛି ।’
ସେ ଆହୁରି ମଧ୍ୟ କହିଛନ୍ତି, ନ୍ୟାୟର ପ୍ରକ୍ରିୟା ଦୀର୍ଘ ହୋଇଯାଇଛି । ଆଜି ଦେଶରେ ରାଜନେତା, ସାମ୍ବାଦିକ ଏବଂ ସାଧାରଣ ଜନତାଙ୍କ ସ୍ବରକୁ ଚପାଇ ଦିଆଯାଉଛି । ଦିଲ୍ଲୀର ମୁଖ୍ୟମନ୍ତ୍ରୀଙ୍କୁ ମଧ୍ୟ ଜେଲ ପଠାଇ ଦିଆଯାଇଛି । ଯେଉଁ ସଂକଳ୍ପ ଆମେ ନେଇଛୁ ତାକୁ ଆମେ ନିଶ୍ଚିତ ରୂପେ ପୂରଣ କରିବୁ । ମୋତେ କିଭଳି ଷଡ଼ଯନ୍ତ୍ର କରି ଜେଲରେ ପୂରାଗଲା ତାର ଗୋଟିଏ ସନ୍ଦେଶ ମିଳିଛି ବୋଲି ହେମନ୍ତ ସୋରେନ କହିଛନ୍ତି ।
#WATCH | Ranchi | On his bail, former Jharkhand CM Hemant Soren says, "I was kept behind bars for 5 months...We are seeing how the judicial process is taking years not just days or months...Today, it is a message for the whole country that how a conspiracy was hatched against… pic.twitter.com/6dVkrGvotg
— ANI (@ANI) June 28, 2024
ଏହା ବ୍ୟତୀତ ହେମନ୍ତ ସୋରେନ୍ ସାମ୍ବାଦିକଙ୍କୁ କହିଛନ୍ତି ଯେ, ନ୍ୟାୟପାଳିକାର ଆଦେଶକୁ ସମୀକ୍ଷା କରନ୍ତୁ ଏବଂ ଦେଶର ଲୋକମାନଙ୍କ ପାଖରେ ପହଞ୍ଚାନ୍ତୁ । ଏହା ପୂର୍ବରୁ ଜେଲ୍ରୁ ବାହାରିବା ପରେ ହେମନ୍ତ ସୋରେନଙ୍କୁ ଜେଏମଏର ବହୁ ସଂଖ୍ୟକ ସମର୍ଥକ ସ୍ବାଗତ କରିଥିଲେ । ଏଥିପାଇଁ ହେମନ୍ତ ସୋରେନ ଏବଂ ପତ୍ନୀ କଳ୍ପନା ସୋରେନ୍ ନ୍ୟାୟପାଳିକା ଏବଂ ଲୋକଙ୍କୁ ଧନ୍ୟବାଦ ଜଣାଇଛନ୍ତି । ଆଜିର ଦିନ ଭାବୁକ କଲା ଭଳି ବୋଲି ହେମନ୍ତ ସୋରେନ କହିଛନ୍ତି ।