ତେଲକୋଇ, ୦୮/୧୦ : ହାତୀପଲଙ୍କୁ ଘଉଡାଇବା ବେଳେ କୂଅରେ ପଡ଼ିଲା ମାଈ ହାତୀ। ତେଲକୋଇ ରେଞ୍ଜ୍ ବିମଳା ଫରେଷ୍ଟ ବିଟ୍ ପାଟଖଳି ଗାଁରେ ସୋମବାର ବିଳମ୍ଵିତ ରାତିରେ ଏଭଳି ଘଟଣା ଘଟିଛି। ଖବର ପାଇ ବନ ବିଭାଗ କର୍ମଚାରୀ ପହଞ୍ଚି ହାତୀକୁ ଉଦ୍ଧାର କରିଛି।
ସୂଚନାନୁଯାୟୀ, ସୋମବାର ତେଲକୋଇ ରେଞ୍ଜ୍ ବିମଳା ଫରେଷ୍ଟ ବିଟ୍ ପାଟଖଳି ଗାଁ ନିକଟରେ ୮ ଟିକିଆ ହାତୀପଲ ବୁଲୁଥିଲେ। ଗାଁ ଲୋକେ ହାତୀପଲଙ୍କୁ ଘଉଡାଇବା ବେଳେ ଏକ ମାଈ ହାତୀ ନାଏକ ସାହିରେ ଥିବା ପରିତ୍ୟକ୍ତ କୂଅରେ ପଡିଯାଇଥିଲା। ଏହାପରେ ହାତୀପଲ କିଛି ଦୂରକୁ ଚାଲିଯାଇଥିଲେ। ଏନେଇ ଗାଁର ଜଣେ ୱାଇଲ୍ଡଲାଇଫ୍ କର୍ମଚାରୀ ବନ ବିଭାଗକୁ ଖବର ଦେଇଥିଲେ। ବନ ବିଭାଗ କର୍ମଚାରୀ ଓ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଜେସିବି ସହାୟତାରେ ହାତୀକୁ ଉଦ୍ଧାର କରିଛନ୍ତି। ହାତୀଟିକୁ କୂଅରେ ପଡିବାର ୨ ଘଣ୍ଟା ପରେ ଉଦ୍ଧାର କରାଯାଇଛି। ହାତୀଟି ଜଙ୍ଗଲକୁ ଚାଲିଯାଇଛି।
