ଭୁବନେଶ୍ୱର, ୨୪/୧୦ : ବାତ୍ୟା ପ୍ରଭାବରେ ଭୁବନେଶ୍ୱରରେ ପବନ ବେଗ ୩୫ ରୁ ୪୦ କିମିରୁ ଅଧିକ ରହିବ। ଏନେଇ ପାଣିପାଗ ସୂଚନା ରହିଛି। ଯାହା ବିମାନ ଉଡିବା ପାଇଁ ସୁରକ୍ଷିତ ନୁହେଁ। ଗତକାଲି ରାତିରେ ଏନେଇ ଜରୁରୀକାଳୀନ ବୈଠକ ବସିଥିଲା। ତେଣୁ ଆଜି ସନ୍ଧ୍ୟା ୫ଟାରୁ ଆସନ୍ତାକାଲି ସକାଳ ୯ଟା ଯାଏଁ ବିମାନ ସେବା ବନ୍ଦ ରହିବ ବୋଲି ସବୁ ଅଂଶୀଦାର ନିଷ୍ପତ୍ତି ନେଇଛନ୍ତି। ଏନେଇ ଭୁବନେଶ୍ୱର ବିମାନ ବନ୍ଦର ନିର୍ଦ୍ଦେଶକ ସୂଚନା ଦେଇଛନ୍ତି। 

ସୂଚନାନୁଯାୟୀ, ଆସନ୍ତାକାଲି ସକାଳେ ପୁଣି ସମୀକ୍ଷା ହେବ। ପାଣିପାଗ ଦେଖି ବିମାନ ଉଡିବା କି ବନ୍ଦ ରହିବା ନେଇ ନିଷ୍ପତ୍ତି ନିଆଯିବ। ଏହାଦ୍ଵାରା ୪୦ ବିମାନ ସେବା ପ୍ରଭାବିତ ହେବ। ଯେଉଁଥିରେ କିଛି ବନ୍ଦ ରହିବ, କିଛି ବିଳମ୍ବ ହେବ, କିଛି ରିସିଡ୍ୟୁଲ ହେବ କି ଟିକେଟ କ୍ୟାନସଲ ହେବ। 

ବିମାନ ବନ୍ଦର ନିର୍ଦ୍ଦେଶକ କହିଛନ୍ତି ଯେ, ଯାତ୍ରୀଙ୍କ ସୁରକ୍ଷା ବଡ଼। ଏବେ ଦିଲ୍ଲୀ ହେଡକ୍ୱାର୍ଟର ଓ ବେସାମାରିକ ବିମାନ ଚଳାଚଳ ମନ୍ତ୍ରାଳୟ ମନିଟରିଂ କରୁଛନ୍ତି। ସେମାନେ ଆମକୁ ବୈଷୟିକ ନିର୍ଦେଶ ଦେଇଛନ୍ତି। ବାତ୍ୟା ପର ଗାଇଡ଼ଲାଇନ ଅନୁସାରେ ପୁଣି ବିମାନ ସେବା ନେଇ ନିଷ୍ପତ୍ତି ନିଆଯିବ। ଅନ୍ତର୍ଜାତୀୟ ବିମାନ ଭାବେ ଆଜି କୁଆଲାମପୁର ବିମାନ ସେବା ବି ବନ୍ଦ ରହିବ। ଯେଉଁମାନେ ଟିକେଟ କରିଛନ୍ତି, ବିମାନ କମ୍ପାନୀ ସମ୍ପୂର୍ଣ୍ଣ ରିଫଣ୍ଡ ଦେବେ ନହେଲେ ଫ୍ଲାଇଟ୍ ରିସ୍ୟୁଡୁଲ କରିବେ।