ନୂଆଦିଲ୍ଲୀ, ୨୨।୫: ପ୍ରମାଦ ଗଣୁଛନ୍ତି ସିଙ୍ଗଲ୍ ସ୍କ୍ରିନ୍ ସିନେମା ହଲ୍ । ଆୟ ନାହିଁ ଆଉ ଖର୍ଚ୍ଚ ବଢ଼ିଚାଲିଛି । ହାଉସ୍ଫୁଲ୍ ବୋର୍ଡ ଲଗାଇବାର ଯୁଗ ଶେଷ । ବର୍ଷ ପାର୍ ବର୍ଷ ଏହି ସିନେମା ହଲ୍ଗୁଡ଼ିକ ଖାଁ ଖାଁ ହୋଇଚାଲିଛି । ଏପରିକି କିରାଣା ଦୋକାନଗୁଡ଼ିକର ଆୟ ବି ଏହି ହଲ୍ଗୁଡ଼ିକ ତୁଳନାରେ ଅଧିକ । ମାଲିକମାନେ ହଲ୍ ବନ୍ଦ ରଖିବାକୁ ପସନ୍ଦ କରୁଛନ୍ତି । କାରଣ ହଲ୍ ଖୋଲିଲେ ଦିନକୁ ଆୟ ହେଉଛି ୪,୦୦୦ ଟଙ୍କା । ବିଜୁଳି, ରକ୍ଷଣାବେକ୍ଷଣ ଏବଂ ଅନ୍ୟ ପରିଚାଳନା ବ୍ୟୟ ମିଶିଲେ ଦୈନିକ ଖର୍ଚ୍ଚ ପ୍ରାୟ ୭,୦୦୦ ଟଙ୍କା । ତେଣୁ ହଲ୍ ଖୋଲିବା ଅର୍ଥ କ୍ଷତି ।
ତେଲଙ୍ଗାନାରେ ପରିସ୍ଥିତି ଏଭଳି ଯେ, ଅନେକ ସିଙ୍ଗଲ୍ ସ୍କ୍ରିନ୍ ସିନେମା ହଲ୍ ଆଗାମୀ ୧୦ ଦିନ ପର୍ଯ୍ୟନ୍ତ ଥିଏଟର ବନ୍ଦ ରଖିବା ପାଇଁ ନିଷ୍ପତ୍ତି ନେଇଛନ୍ତି । ଏହା ଉକ୍ତ ଥିଏଟର, ଯେଉଁଠି ଏକଦା ଦର୍ଶକ ଫିଲ୍ମ ରିଲିଜ୍ ହେବାକୁ ଅପେକ୍ଷା କରି ରହୁଥିଲେ । ଥିଏଟରରେ ତାଳି ଏବଂ ସିଟି ଜୋର୍ଦାର ଶୁଣିବାକୁ ମିଳୁଥିଲା । ପ୍ରଥମ ଦିନ ପ୍ରଥମ ସୋ’ ଟ୍ରେଣ୍ଡ୍ ଜୋର ଧରିଥିଲା । ଟିକଟଘର ଆଗରେ ଲମ୍ବା ଲାଇନ୍ ଦେଖିବାକୁ ମିଳୁଥିଲା । ଟିକଟଘର ଆଗରେ ବହୁଥର ହାଉସ୍ଫୁଲ୍ ବୋର୍ଡ ଦେଖିବାକୁ ମିଳୁଥିଲା । କଳାରେ ଟିକଟ ଚଢ଼ାରେ ବିକ୍ରି ହେଉଥିଲା । ଏବେ କିନ୍ତୁ ସ୍ଥିତି ସମ୍ପୂର୍ଣ୍ଣ ବଦଳିଯାଇଛି । ଅତିବେଶିରେ ୧୦-୧୨ ଜଣ ଦର୍ଶକ ବସି ଫିଲ୍ମ ଦେଖୁଛନ୍ତି । ହଲ୍ଗୁଡ଼ିକରେ ଧୂଳିମଳି ଜମା । ପୁରୁଣା ଚେୟାର ଏବଂ ଫଟା ସିଟ୍ । ବେପାର ନ ଥିବାରୁ ମେଣ୍ଟେନାନ୍ସରେ ଖର୍ଚ୍ଚ କରୁନାହାନ୍ତି ହଲ୍ ମାଲିକ ।
ସମଗ୍ର ଦେଶରେ ସମାନ ସ୍ଥିତି । ଘରେ ଘରେ ଟେଲିଭିଜନର ଲୋକପ୍ରିୟତା ବଢ଼ିବା ପରଠାରୁ ସିଙ୍ଗଲ୍ ସ୍କ୍ରିନ୍ ସିନେମା ହଲ୍ଗୁଡ଼ିକୁ ଆହ୍ୱାନର ସାମ୍ନା କରିବାକୁ ପଡୁଛି । ସାଟେଲାଇଟ୍ ଟିଭି ଲୋକଙ୍କୁ ସମଗ୍ର ବ୍ରହ୍ମାଣ୍ଡର ଫିଲ୍ମ ଦେଖିବାକୁ ସମର୍ଥ କରିଛି । ଏଭଳି କ୍ଷେତ୍ରରେ ଲୋକଙ୍କୁ ମନୋରଞ୍ଜନ ପାଇଁ ସ୍ଥାନୀୟ ସିନେଲା ହଲ୍ ଯିବାକୁ ପଡୁନାହିଁ । ଆଜି ଓଟିଟି ପ୍ଲାଟ୍ଫର୍ମ ଏବଂ ମଲ୍ଟିପ୍ଲେକ୍ସ ସିଙ୍ଗିଲ୍ ସ୍କ୍ରିନ୍ ସିନେମା ହଲ୍ଗୁଡ଼ିକୁ ବଡ଼ ଆକାରରେ ପ୍ରଭାବିତ କରିଛି । ପ୍ରତିବର୍ଷ ଖୋଲୁଥିବା ୨୦୦ ନୂଆ ମଲ୍ଟିପ୍ଲେକ୍ସ ଯୋଗୁ ପ୍ରାୟ ୧୫୦ ସିଙ୍ଗଲ୍ ସ୍କ୍ରିନ୍ ସିନେମା ହଲ୍ ବନ୍ଦ ହେଉଥିବା ଶିଳ୍ପ ସୂତ୍ରରୁ ଜଣାପଡ଼ିଛି ।