ଭୁବନେଶ୍ୱର, ୦୩/୦୩: ସୋମବାର କ୍ରାଇମ୍ବ୍ରାଞ୍ଚ୍ରେ ହାଜର ହୋଇଥାନ୍ତେ ପୂର୍ବତନ ଝାରସୁଗୁଡ଼ା ବିଧାୟିକା ଦୀପାଳି ଦାସ ଓ ତାଙ୍କ ଭାଇ ବିଶାଲ ଦାସ । ହେଲେ କୌଣସି ବ୍ୟକ୍ତିଗତ କାରଣରୁ ଆସି ପାରିଲେନି ଦୀପାଳି । ଏପରିକି ଦୀପାଳିଙ୍କ ଭାଇ ବିଶାଲ ଦାସ ମଧ୍ୟ କ୍ରାଇମବ୍ରାଞ୍ଚ ନିକଟରେ ଉପସ୍ଥିତ ହେଲେନାହିଁ । ବରଂ ନିଜ ବୟାନ ରେକର୍ଡ କରାଇବା ଲାଗି ଦୀପାଳି ମହଲତ ଲୋଡିଛନ୍ତି ଏବଂ ଝାରସୁଗୁଡାରେ ତାଙ୍କ ବୟାନ ରେକର୍ଡ କରାଯାଉ ବୋଲି ଏହି ତଦନ୍ତକାରୀ ଅଧିକାରୀଙ୍କୁ ଫୋନ ଯୋଗେ ଜଣାଇଛନ୍ତି ଦୀପାଳି ।
ନବ ଦାସ ହତ୍ୟା ମାମଲାରେ ଏବେ ସୁଦ୍ଧା କେବଳ ଗୋପାଳ ଦାସଙ୍କୁ ଅଭିଯୁକ୍ତ ଦର୍ଶାଇଛି କ୍ରାଇମବ୍ରାଞ୍ଚ । ଏହି ମାମଲା ସମ୍ପର୍କିତ ଅନ୍ତରୀଣ ଚାର୍ଜସିଟ ମଧ୍ୟ ଦାଖଲ ହୋଇଛି । ନବ ଦାସ ହତ୍ୟା ମାମଲାର ସିବିଆଇ ତଦନ୍ତ ପାଇଁ ମଧ୍ୟ ବିଭିନ୍ନ ମହଲରୁ ଦାବି ହୋଇଛି । ଏପରିକି ନିଜେ ଦୀପାଳି ମଧ୍ୟ ସିବିଆଇ ତଦନ୍ତ ଦାବି କରିସାରିଛନ୍ତି । ଏହି ହାଇ ପ୍ରୋଫାଇଲ୍ କେସ୍ର ତଦନ୍ତ ଏପର୍ଯ୍ୟନ୍ତ ଶେଷ ହୋଇ ନଥିବାରୁ ଉଭୟ ଦୀପାଳି ଏବଂ ବିଶାଲଙ୍କୁ ନିଜର ପକ୍ଷ ରଖିବା ଲାଗି କ୍ରାଇମବ୍ରାଞ୍ଚ ତରଫରୁ ନୋଟିସ୍ ହୋଇଥିଲା । ଆଜି ନୋଟିସ୍ର ସମୟ ସୀମା ସରିଛି, ହେଲେ ଉଭୟ ଭାଇ ଭଉଣୀ ଦୀପାଳି ଏବଂ ବିଶାଲ ଆଜି କ୍ରାଇମବ୍ରାଞ୍ଚ ନିକଟରେ ହଜାର ହେଲେନାହିଁ ।
