ନୂଆଦିଲ୍ଲୀ, ୨୮/୧୧ : ଜିନ୍ଦେଗି ମେଁ ଅଗର ପ୍ୟାର୍ ହୈ, ତୋ ତକରାର୍ ଭି ହୈ... କୁହନ୍ତି ଜୀବନରେ ପ୍ରେମ ଥିଲେ ମନମାଳିନ୍ୟ ବି ଅଛି। ହେଲେ ବେଳେବେଳେ ଏହି ମନମାଳିନ୍ୟ ଏତେ ବଢିଯାଏ ଯେ, ଏହା ସମ୍ପର୍କ ଭାଙ୍ଗିବାର କାରଣ ପାଲଟିଯାଏ। ଆଜି ଆମେ ଏଭଳି ଏକ ପ୍ରେମ କାହାଣୀ ବଷୟରେ କହିବାକୁ ଯାଉଛି ଯାହାର ଏକ ଦୁଃଖଦ ଅନ୍ତ ଘଟିଛି। କାହାଣୀଟି ହେଉଛି ଜଣେସାଉଥ୍ ସୁପରଷ୍ଟାରଙ୍କର, ଯିଏ ଜଣେ ସୁପରଷ୍ଟାରଙ୍କ ଝିଅକୁ ହୃଦୟ ଦେଇ ବସିଲା। ଦୁହେଁ ପ୍ରେମ କରି ବିବାହ ବି କଲେ। ୧୮ ବର୍ଷ ଯାଏଁ ସାଙ୍ଗରେ ରହିଲେ। ହେଲେ ହଠାତ୍ ବୈବାହିକ ଜୀବନରେ ଭଟ୍ଟା ପଡ଼ିଲା। ଦୁହେଁ ଅଲଗା ହେବାକୁ ନିଷ୍ପତ୍ତି ନେଲେ। ଶେଷରେ ୨୦ ବର୍ଷର ବୈବାହିକ ଜୀବନରେ ପୂର୍ଣ୍ଣଚ୍ଛେଦ ପଡ଼ିଲା। କୌଣସି ଫିଲ୍ମ କାହାଣୀ ଠାରୁ କମ୍ ନୁହେଁ ଏହି ଷ୍ଟାର ଦମ୍ପତିଙ୍କର ଲଭ୍ଷ୍ଟୋରୀ।
୨୦୦୩ରେ ଆରମ୍ଭ ହୋଇଥିଲା ଲଭ୍ଷ୍ଟୋରୀ। କାହାଣୀଟି ହେଉଛି ସାଉଥ୍ ସୁପରଷ୍ଟାର ଧନୁଷ ଏବଂ ରଜନୀକାନ୍ତଙ୍କ ଝିଅ ଐଶ୍ଵର୍ଯ୍ୟାଙ୍କର। ବ୍ୟାକ୍-ଟୁ-ବ୍ୟାକ୍ ୨ଟି ହିଟ୍ ଫିଲ୍ମ କରିସାରିବା ପରେ ତୃତୀୟ ଫିଲ୍ମର ପ୍ରଥମ ଶୋରେ ଟେନ୍ସନ୍ରେ ଥିଲେ ଧନୁଷ। ଫିଲ୍ମ ଦେଖିବାକୁ ଆସିଥିବା ଷ୍ଟାରମାନଙ୍କ ପାଖକୁ ଯାଇ ନେଉଥିଲେ ରିଭ୍ୟୁ। ଏହି ସମୟରେ ତାଙ୍କର ନଜର ପଡ଼ିଥିଲା ସୁପରଷ୍ଟାର ରଜନୀକାନ୍ତଙ୍କ ଝିଅ ଐଶ୍ଵର୍ଯ୍ୟାଙ୍କ ଉପରେ। ଅନ୍ୟମାନଙ୍କ ଉପସ୍ଥିତିରେ ଦୁହେଁ ଦୁହିଁଙ୍କ ସହ କଥା ହୋଇପାରିନଥିଲେ ସତ କିନ୍ତୁ ଆଖିରେ ଆଖିରେ କରିଥିଲେ ପ୍ରେମ ଇଜହାର। ଏହାପରେ ଗୋଟିଏ ପାଦ ଆଗକୁ ବଢାଇଥିଲେ ଐଶ୍ଵର୍ଯ୍ୟା। ଧିରେଧୀରେ ଦୁହିଁଙ୍କ ଭିତରେ ବଢିଲା ମିଟିଂ-ଡେଟିଂ। ମିଡିଆରେ ଲଭ୍ ଅଫେୟାର ଖବର ବି ଆସିଲା। ପରେ ଦୁହିଁଙ୍କ ପରିବାର ବିବାହ କରାଇବାକୁ ଘୋଷଣା କଲେ।
୨୦୦୪ ନଭେମ୍ଵର ୧୮ରେ ଧନୁଷ ଏବଂ ଐଶ୍ଵର୍ଯ୍ୟା ପାରମ୍ପରିକ ତାମିଲ ରୀତିନୀତିରେ ବିବାହ କଲେ। ରଜନୀକାନ୍ତ ବଡ଼ ଧୁମ୍ଧାମ୍ରେ ଝିଅର ବାହାଘର କଲେ। ବହୁ ସୁପରଷ୍ଟାର ଏହି ବିବାହର ସାକ୍ଷୀ ହେଲେ। ପରେ ଦୁହିଁଙ୍କର ଦୁଇଟି ପୁତ୍ର ସନ୍ତାନ ହେଲା। ୧୮ ବର୍ଷ ଯାଏଁ ଦୁହେଁ ଫ୍ୟାନ୍ସଙ୍କ ପାଇଁ ଏକ ଆଇଡିଆଲ୍ ଦମ୍ପତି ଥିଲେ। ୨୦୨୨ରେ ହଠାତ୍ ଦୁହିଁଙ୍କ ବୈବାହିକ ଜୀବନରେ ଭଟ୍ଟା ପଡ଼ିଲା। ଦୁହେଁ ଅଲଗା ହେବାକୁ ନିଷ୍ପତ୍ତି ନେଲେ। ଏହି ନିଷ୍ପତ୍ତିରେ ଦୁହିଁଙ୍କ ପରିବାର ସହ ଫ୍ୟାନ୍ସଙ୍କୁ ବି ଝଟ୍କା ଲାଗିଲା। ଦୁଇ ପରିବାର ମିଶି ଦୁହିଁଙ୍କୁ ଏକାଠି କରିବାକୁ ଚେଷ୍ଟା ବି କଲେ।
୨ ବର୍ଷର ସବୁ ଚେଷ୍ଟା ଫେଲ୍ ମାରିଛି। ଏବେ ଧନୁଷ ଏବଂ ଐଶ୍ଵର୍ଯ୍ୟାଙ୍କ ରାସ୍ତା ସବୁଦିନ ପାଇଁ ଅଲଗା ହୋଇଯାଇଛି। ବୁଧବାର ଦୁହିଁଙ୍କ ଛାଡ଼ପତ୍ର ଆବେଦନରେ ଚେନ୍ନାଇ ଫ୍ୟାମିଲି କୋର୍ଟ ମୋହର ମାରିଛନ୍ତି। ଆପୋସ ସହମତିରେ ଦୁହେଁ ଦୁହିଁଙ୍କୁ ଛାଡ଼ପତ୍ର ଦେଇଛନ୍ତି। ଏବେ ଔପଚାରିକ ଭାବେ ଦୁହେଁ ଅଲଗା ହୋଇଛନ୍ତି। ତେବେ ଧନୁଷ-ଏବଂ ଐଶ୍ଵର୍ଯ୍ୟାଙ୍କ ଦୁଇ ପୁଅଙ୍କ କଷ୍ଟଡି ନେଇ କୌଣସି ସୂଚନା ମିଳିନାହିଁ।
