ମୁମ୍ବାଇ: ମହାରାଷ୍ଟ୍ରର ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ବିଜେପି ନେତା ଦେବେନ୍ଦ୍ର ଫଡ଼ନବିସ୍ । ତୃତୀୟ ଥର ଲାଗି ରାଜ୍ୟର ମୁଖ୍ୟମନ୍ତ୍ରୀ ହେବା ପରେ ଫଡ଼ନାବିସ୍ଙ୍କ ପ୍ରଥମ ପ୍ରତିକ୍ରିୟା ସାମ୍ନାକୁ ଆସିଛି । ମହାୟୁତି ସରକାରର ପ୍ରଥମ କ୍ୟାବିନେଟ୍ ବୈଠକ ପରେ ଫଡ଼ନବିସ୍ କହିଛନ୍ତି, ମହାରାଷ୍ଟ୍ରରେ ଆଉ ରାଜନୈତିକ ଅସ୍ଥିରତା ନାହିଁ । ଆଗାମୀ ୫ ବର୍ଷ ଲାଗି ରାଜ୍ୟକୁ ମହାୟୁତି ଏକ ସ୍ଥିର ସରକାର ଦେବ । ୨୦୧୯ରୁ ୨୦୨୨ ପର୍ଯ୍ୟନ୍ତ ଆମେ ବହୁ ପରିବର୍ତ୍ତନ ଦେଖିଛୁ । ଭବିଷ୍ୟତରେ ସେଭଳି କିଛି ପରିବର୍ତ୍ତନ ହେବ ନାହିଁ ବୋଲି ଫଡ଼ନବିସ୍ କହିଛନ୍ତି ।
୫୪ ବର୍ଷୀୟ ଫଡ଼ନାବିସ୍ ଦୁଇ ସପ୍ତାହର ରାଜନୈତିକ ହଟଚମଟ ପରେ ମୁଖ୍ୟମନ୍ତ୍ରୀ ହୋଇଛନ୍ତି । ସିନ୍ଦେଙ୍କ ଶିବସେନାର ଅସନ୍ତୋଷ ଭିତରେ ସେ ଏହି ଶୀର୍ଷ ପଦର ଅଧିକାରୀ ହୋଇଛନ୍ତି । ଏକନାଥ ସିନ୍ଦେ ରାଜ୍ୟର ମୁଖ୍ୟମନ୍ତ୍ରୀ ହେବେ ବୋଲି ଦାବି ହେଉଥିଲା । ହେଲେ ଶେଷରେ ସିନ୍ଦେ ଉପମୁଖ୍ୟମନ୍ତ୍ରୀ ହେବାକୁ ରାଜି ହେବା ସହ ଆଜି ଫଡ଼ନବିସ୍ଙ୍କ ସହ ଶପଥ ନେଇଛନ୍ତି । ମୁଖ୍ୟମନ୍ତ୍ରୀ ପଦକୁ ନେଇ ବାଦ ବିବାଦ ହେବା ପରେ ଫଡ଼ନଭିସ୍ କହିଥିଲେ, ଏହି ପଦରେ ସେମିତି କିଛି ଅଲଗା ନାହିଁ । ଆମେ ୩ ଦଳର ନେତା ମିଶି ସରକାର ଚଳାଇବୁ ।
୨୦୧୪ରେ ମୁଁ ମୁଖ୍ୟମନ୍ତ୍ରୀ ଥିବା ବେଳେ ସିନ୍ଦେ ଆମ ସହ ଥିଲେ । ୨୦୧୯ରେ ୭୨ ଘଣ୍ଟା ପାଇଁ ଅଜିତ ପାଓ୍ବାର ଏବଂ ମୁଁ ଉପମୁଖ୍ୟମନ୍ତ୍ରୀ ଏବଂ ମୁଖ୍ୟମନ୍ତ୍ରୀ ହୋଇଥିଲୁ । ଏହା ପରେ ଏକନାଥ ସିନ୍ଦେ ମୁଖ୍ୟମନ୍ତ୍ରୀ ହୋଇଥିବା ବେଳେ ମୁଁ ଏବଂ ଅଜିତ ପାଓ୍ବାର ଉପମୁଖ୍ୟମନ୍ତ୍ରୀ ହୋଇଥିଲୁ । ବର୍ତ୍ତମାନ ମୁଁ ମୁଖ୍ୟମନ୍ତ୍ରୀ ଏବଂ ସେମାନେ ଉପମୁଖ୍ୟମନ୍ତ୍ରୀ ବୋଲି ଫଡ଼ନବିସ୍ କହିଛନ୍ତି । ଆମର ଭୂମିକା ପରିବର୍ତ୍ତନ ହୋଇଛି କିନ୍ତୁ ଦିଗ ସମାନ ରହିଛି । ୩ ଜଣଙ୍କ ସଂପର୍କ ବିଷୟରେ କହିବା ବେଳେ ଆପଣ କୌଣସି ପ୍ରଭେଦ ଦେଖିପାରିବେ ନାହିଁ ବୋଲି ମହାରାଷ୍ଟ୍ରର ନୂଆ ମୁଖ୍ୟମନ୍ତ୍ରୀ କହିଛନ୍ତି ।
ଫଡ଼ନବିସ୍ ଆହୁରି କହିଛନ୍ତି, ‘ଏ ସରକାର ଦ୍ରୁତ ବେଗରେ ନିଷ୍ପତ୍ତି ନେଉଛି । ଶପଥ ଗ୍ରହଣ ସମୟରେ ମୁଁ କହିଛି ଯେଉଁଭଳି ମହାରାଷ୍ଟ୍ର ଗତି କରୁଛି ତାହା ବନ୍ଦ ହେବନାହିଁ । ଯାହା କିଛି ବି ନିଷ୍ପତ୍ତି ହେବ ତାହା ଭାବିଚିନ୍ତି ନିଆଯିବ ।’ ସୂଚନାଯୋଗ୍ୟ, ୨୦୨୩ରେ ଏକନାଥ ସିନ୍ଦେଙ୍କ ପାଇଁ ଶିବସେନା ଦୁଇ ଭାଗ ହୋଇଥିଲା । ସେ ଶିବସେନାରୁ ଅଲଗା ହୋଇ ବିଜେପି ସହ ହାତ ମିଳାଇଥିଲେ । ତାପରେ ଅଜିତ ପାଓ୍ବାର ତାଙ୍କ ଦାଦା ଶରଦ ପାଓ୍ବାରଙ୍କ ଏନସିପିକୁ ଦୁଇ ଫାଳ କରି ସିନ୍ଦେଙ୍କ ଶିବେସେନା ଏବଂ ବିଜେପି ସରକାରରେ ସାମିଲ ହୋଇଥିଲେ । ସେତେବେଳେ ମହାରାଷ୍ଟ୍ର ରାଜନୀତିରେ ମହାନାଟକ ଦେଖିବାକୁ ମିଳିଥିଲା । ଗତ ଲୋକସଭା ନିର୍ବାଚନରେ ମହାୟୁତି ମେଣ୍ଟ ଭଲ ପ୍ରଦର୍ଶନ କରିପାରିନଥିଲା । କିନ୍ତୁ ବିଧାନସଭା ନିର୍ବାଚନରେ ମେଣ୍ଟକୁ ବଡ଼ ବିଜୟ ମିଳିଥିବା ବେଳେ ମହାରାଷ୍ଟ୍ରରେ ସରକାର ଗଢ଼ିଛି ।
