ମୁମ୍ବାଇ: ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କୁ ନେଇ ସମୀକରଣ ସ୍ପଷ୍ଟ ହେଉନାହିଁ । ବିଜେପି ନେତା ଦେବେନ୍ଦ୍ର ଫଡ଼ନାଭିସ୍ ମହାରାଷ୍ଟ୍ରର ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ଲାଗି ରହିଛି । ଏହାରି ମଧ୍ୟରେ ବିଜେପି ନେତା ଏବଂ ପୂର୍ବତନ ମନ୍ତ୍ରୀ ସୁଧିର ମୁଙ୍ଗତିଓ୍ବାର କହିଛନ୍ତି, ବିଜେପି କୌଣସି ଚକିତ କଲା ଭଳି ଘୋଷଣା କରିବ ନାହିଁ । ଦେବେନ୍ଦ୍ର ଫଡ଼ନାଭିସ ହିଁ ମୁଖ୍ୟମନ୍ତ୍ରୀ ହେବେ ଏବଂ ବିଧାୟକ ଦଳ ବୈଠକରେ ଏନେଇ ନିଷ୍ପତ୍ତି ହେବ । ଏଭଳି ନିଷ୍ପତ୍ତି ଲାଗି ଏକନାଥ ସିନ୍ଦେ ନାରାଜ ନାହାନ୍ତି ବୋଲି ସେ କହିଛନ୍ତି ।
ସେ ଆହୁରି କହିଛନ୍ତି, ‘ସିନ୍ଦେ ଆମ ସସସ୍ତଙ୍କର ଭଲ ଯତ୍ନ ନେଇଛନ୍ତି । ସେ ସର୍ବଦା ସମ୍ମାନର ପାତ୍ର ଏବଂ ସେ ଆଗାମୀ ସରକାରରେ ଏକ ଅଂଶ ହୋଇ ରହିବେ ବୋଲି ଆଶା । ଲୋକମାନେ ବିପୁଳ ସଂଖ୍ୟାରେ ଭୋଟ୍ ଦେଇ ମହାୟୁତିକୁ ଜିତାଇଛନ୍ତି ।’ ସେହିଭଳି ନଭେମ୍ବର ୫ରେ ମୁମ୍ବାଇରେ ଏକ ଭବ୍ୟ ଶପଥ ଗ୍ରହଣ ଉତ୍ସବର ଆୟୋଜନ ହେବ ବୋଲି ମୁଙ୍ଗତିଓ୍ବାର କହିଛନ୍ତି । ଏହା ପୂର୍ବରୁ ଅନ୍ୟ ଜଣେ ବିଜେପି ନେତା ରବିବାର କହିଥିଲେ, ମହାରାଷ୍ଟ୍ର ମୁଖ୍ୟମନ୍ତ୍ରୀ ଲାଗି ଦେବେନ୍ଦ୍ର ଫଡ଼ନାଭିସଙ୍କ ନାଁ ସ୍ଥିର ହୋଇସାରିଛି । ତାଙ୍କୁ ବିଧାୟକ ଦଳ ବୈଠକରେ ନେତା ଚୟନ କରାଯିବ ।
ସେପଟେ ନୂଆ ମୁଖ୍ୟମନ୍ତ୍ରୀଙ୍କୁ ନେଇ ବିଜେପିର ନିଷ୍ପତ୍ତିକୁ ସମର୍ଥନ କରିବେ ବୋଲି ଏକନାଥ ସିନ୍ଦେ କହିଥିଲେ । ସିନ୍ଦେଙ୍କ ପୁଅ ଶ୍ରୀକାନ୍ତ ଉପମୁଖ୍ୟମନ୍ତ୍ରୀ ହେବେ ଏବଂ ଶିବସେନା ଗୃହ ବିଭାଗ ଦାବି କରୁଥିବା ନେଇ ଚର୍ଚ୍ଚା ମଧ୍ୟରେ ଏକନାଥ ସିନ୍ଦେ କହିଛନ୍ତି, ମହାୟୁତି ସହଯୋଗୀ ବିଜେପି, ଏନସିପି ଏବଂ ଶିବସେନା ସରକାର ଗଠନ ନେଇ ନିଷ୍ପତ୍ତି ନେବେ । ମହାରାଷ୍ଟ୍ର ନିର୍ବାଚନରେ ମହାୟୁତିକୁ ବୃହତ୍ତ ବିଜୟ ମିଳିଥିଲେ ହେଁ ରାଜ୍ୟରେ ନୂଆ ସରକାର ଗଠନ ହୋଇପାରି ନାହିଁ । ଏକ ସପ୍ତାହରୁ ଅଧିକ ସମୟ ବିତିଥିଲେ ମଧ୍ୟ ମୁଖ୍ୟମନ୍ତ୍ରୀ କିଏ ହେବେ ତାକୁ ନେଇ ସସପେନ୍ସ ଜାରି ରହିଛି । ଏସବୁ ଭିତରେ ଡିସେମ୍ବର ୫ ସନ୍ଧ୍ୟରେ ମୁମ୍ବାଇର ଆଜାଦ ମୈଦାନରେ ଶପଥ ଗ୍ରହଣ ଉତ୍ସବ ଆୟୋଜିତ ହେବ ବୋଲି ମହାୟୁତି ପକ୍ଷରୁ ସ୍ଥିର ହୋଇଛି ।
