ନୂଆଦିଲ୍ଲୀ ୨୩/୦୪: ବିଶ୍ୱରେ କିଛି ଦେଶ ଅଛି, ଯେଉଁଠି ଅପରାଧ ପାଇଁ ଶୂନ୍ୟ ସହନଶୀଳତା ନୀତି ଅବଲମ୍ବନ କରାଯାଏ । ଦେଶର ଉନ୍ନତିରେ ଏହି ନୀତିର ବିଶେଷ ଗୁରୁତ୍ୱ ରହିଛି । ଏଭଳି ଦେଶ ମଧ୍ୟରେ ଜାପାନ ଅନ୍ୟତମ । ଏଠାରେ ଅତି ଛୋଟ ଦୁର୍ନୀତି ପାଇଁ ମଧ୍ୟ ସାରା ଜୀବନର ପୁଞ୍ଜି ହରାଇବାକୁ ପଡ଼ିପାରେ । ଜାପାନରେ ଏକ ମାମଲା ସାମ୍ନାକୁ ଆସିଛି, ଯାହା ଦୁର୍ନୀତି ବିରୋଧୀ ନୀତି ଯୋଗୁ ଅନ୍ୟ ଦେଶ ପାଇଁ ଉଦାହରଣ ହୋଇଛି ।
ମାମଲାଟି ଏମିତି- ଜାପାନର କ୍ୟୋଟୋ ସହରର ଜଣେ ବସ୍ ଚାଳକ ୭ ଡଲାର (ପ୍ରାୟ ୧୦୦୦ ୟେନ୍) ବା ହାରାହାରି ୬୦୦ ଟଙ୍କା ଚୋରି ଅଭିଯୋଗରେ ୮୪,୦୦୦ ଡଲାର ବା ପ୍ରାୟ ୭୦ ଲକ୍ଷ ଟଙ୍କାର ପେନ୍ସନ୍ ହରାଇଛନ୍ତି । ରିପୋର୍ଟ ଅନୁସାରେ, ବସ୍ ଚାଳକ ଜଣକ ଦୀର୍ଘ ୨୯ ବର୍ଷ ପର୍ଯ୍ୟନ୍ତ ସଚ୍ଚୋଟତାର ସହ ସେବା ପ୍ରଦାନ କରିଥିଲେ । କିନ୍ତୁ ଏହି ଗୋଟିଏ ଘଟଣା ତାଙ୍କୁ ସାରା ଜୀବନର ପେନ୍ସନରୁ ବଞ୍ଚିତ କରିଛି । ୨୦୨୨ରେ ୫୮ ବର୍ଷୀୟ ଏହି ଚାଳକଙ୍କୁ ବସ୍ରେ ଲାଗିଥିବା କ୍ୟାମେରାରେ କଏଦ କରାଯାଇଥିଲା । ଏଥିରେ ସେ ଜଣେ ଯାତ୍ରୀଙ୍କଠୁ ମିଳିଥିବା ୧୦୦୦ ୟେନ୍କୁ ଭଡ଼ା ମେସିନ୍ରେ ରଖିବା ବଦଳରେ ନିଜ ପକେଟ୍ରେ ପୂରାଉଥିବା ନଜର ଆସିଥିଲେ । ସେହି ସମୟରେ ବସ୍ରେ ୫ ଜଣ ଯାତ୍ରୀ ଥିଲେ । ସେମାନେ ମୋଟ୍ ୧,୧୫୦ ୟେନ୍ ଭଡ଼ା ଦେଇଥିଲେ । ଘଟଣାର ଯାଞ୍ଚ୍ରେ ଚାଳକ ପ୍ରଥମେ ଚୋରି ଅଭିଯୋଗକୁ ଖଣ୍ଡନ କଲେ । କିନ୍ତୁ ଭିଡିଓ ଫୁଟେଜ୍ ସତ ସାମ୍ନାକୁ ଆଣିଲା ।
ଏହା ପରେ ଚାଳକଙ୍କୁ ଚାକିରିରୁ ବାହାର କରିଦିଆଗଲା ଏବଂ ତାଙ୍କର ୨୯ ବର୍ଷର ସେବା ବାବଦ ପେନ୍ସନକୁ ଅଟକାଇ ଦିଆଗଲା । ସେ ଏହି ନିଷ୍ପତ୍ତି ବିରୋଧରେ ମକଦ୍ଦମା କଲେ । ତଳ କୋର୍ଟ ଦଣ୍ଡକୁ ଅତ୍ୟଧିକ ଦର୍ଶାଇ ତାଙ୍କ ପକ୍ଷରେ ନିଷ୍ପତ୍ତି ଶୁଣାଇଲେ । କିନ୍ତୁ ଜାପାନ ସୁପ୍ରିମକୋର୍ଟ ଏହାକୁ ବଦଳାଇ କ୍ୟୋଟୋ ସହର କୋର୍ଟଙ୍କ ନିଷ୍ପତ୍ତିକୁ ବଳବତ୍ତର ରଖିଲେ । କୋର୍ଟ କହିଲେ, ଏ ପ୍ରକାର କାର୍ଯ୍ୟ ସାର୍ବଜନୀନ ସେବାର କାର୍ଯ୍ୟପ୍ରଣାଳୀକୁ ପ୍ରଭାବିତ କରେ । ସୋସିଆଲ ମିଡିଆରେ ଏହି ଖବରକୁ ନେଇ ଭିନ୍ନ ଭିନ୍ନ ରାୟ ଦେଖିବାକୁ ମିଳୁଛି । କିଏ କହୁଛି, ଯେତେ ବଡ଼ ଦଣ୍ଡ ତାଙ୍କୁ ମିଳିଛି, ଦୁର୍ନୀତି ସେତିକି ଗମ୍ଭୀର ନୁହେଁ । ଆଉ କିଏ କହୁଛି ଦୁର୍ନୀତିକୁ ଛୋଟ କିମ୍ବା ବଡ଼ ଭାବେ ଦେଖିବା ଉଚିତ୍ ନୁହେଁ । ଆରମ୍ଭରୁ ଏହାକୁ ରୋକିବା ଉଚିତ୍ ।
