ବ୍ରହ୍ମପୁର, ୬/୬ : ଗଞ୍ଜାମ ଜିଲ୍ଲା ବଡ଼ବଜାର ଥାନା ହରିଡ଼ାଖଣ୍ଡି ପୋଖରୀରୁ ଜଣେ ବ୍ୟକ୍ତିଙ୍କ ମୃତଦେହ ଉଦ୍ଧାର ହୋଇଛି। ମୃତ ବ୍ୟକ୍ତି ଜଣଙ୍କ ହେଲେ ଗେଟ୍ ବଜାର ଗୋଲାପଲ୍ଲି ସାହିର ଦୀନବନ୍ଧୁ ପ୍ରଧାନ(୫୩ ବର୍ଷ)।
ସୂଚନା ମୁତାବକ, ଦୀନବନ୍ଧୁ ବୁଧବାର ରାତି ୧୦ଟାରେ ଘରୁ ସାଇକେଲ ଧରି ବୁଲିବାକୁ ବାହାରିଥିଲେ। ପ୍ରତିଦିନ ଅଧଘଣ୍ଟା ବୁଲିବା ପରେ ସେ ଫେରି ଆସନ୍ତି। କିନ୍ତୁ ବୁଧବାର ରାତିରେ ଆଉ ଫେରି ନଥିଲେ। ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ। ଶେଷରେ ନପାଇ ନିଖୋଜ ହୋଇଥିବା ମେସେଜ ବିଭିନ୍ନ ସୋସିଆଲ ମିଡିଆରେ ଛାଡିଥିଲେ। ଶୁକ୍ରବାର ସକାଳୁ ହରିଡ଼ାଖଣ୍ଡି ପୋଖରୀରେ ଏକ ମୃତଦେହ ଭାସୁଥିବା ସ୍ଥାନୀୟ ଲୋକ ଦେଖିଥିଲେ। ଏନେଇ ପୁଲିସ ଓ ଅଗ୍ନିଶମ ବାହିନୀକୁ ଖବର ଦେଇଥିଲେ। ପୁଲିସ ଉପସ୍ଥିତିରେ ଅଗ୍ନିଶମ ବାହିନୀ ମୃତଦେହକୁ ପୋଖରୀରୁ ବାହାର କରିଥିଲେ। ଏହା ଦୀନବନ୍ଧୁଙ୍କ ମୃତଦେହ ବୋଲି ଚିହ୍ନଟ ହୋଇଥିଲା। ତେବେ କେଉଁ ପରିସ୍ଥିତିରେ ଦୀନବନ୍ଧୁଙ୍କର ମୃତ୍ୟୁ ହେଲା ତାହା ଅସ୍ପଷ୍ଟ ରହିଛି। ଶବ ବ୍ୟବଚ୍ଛେଦ ପାଇଁ ଏମକେସିଜି ହସ୍ପିଟାଲକୁ ପଠାଯାଇଛି। ମୃତକ ଜଣଙ୍କ ପକ୍ଷାଘାତ ରୋଗରେ ପୀଡ଼ିତ ଥିଲେ ବୋଲି ଜଣାପଡ଼ିଛି।