ଉଦଳା,୨୩।୧୧   କପ୍ତିପଦା ଥାନା ସମିବୃକ୍ଷ ନିକଟରୁ ମାଟିରେ ପୋତା ଯାଇଥିବା ମୃତଦେହ କୁ ପୋଲିସ ବୁଧବାର  ଉଦ୍ଧାର କରିଥିଲା।  ମୃତକଙ୍କ ହାତରେ ଥିବା ଟାଟୁରୁ ମୃତକଙ୍କ ପରିଚୟ ମିଳିଥିଲା।  ମୃତକ ବାଲେଶ୍ୱର ଜିଲ୍ଲା ଶିଳ୍ପାଞ୍ଚଳ ଥାନା ପଦ୍ମପୁର ଅଞ୍ଚଳର ଚିତ୍ତରଞ୍ଜନ ବେହେରା ବୋଲି ଜଣାପଡିଥିଲା।

ଗତ ରବିବାର ଚିତ୍ତରଞ୍ଜନ ନିଖୋଜ ହୋଇଥିବା ନେଇ ଶିଳ୍ପାଞ୍ଚଳ ଥାନାରେ ଅଭିଯୋଗ ହୋଇଥିଲା।  ବୁଧବାର ପରିବାର ଲୋକେ ମୃତଦେହ ଚିହ୍ନଟ କରିବା ପରେ ପୋଲିସ ଘଟଣାର ଖୋଳତାଡ଼ ଆରମ୍ଭ କରିଥିଲା।ଏହି ଘଟଣାରେ ପୋଲିସ ୨ ଜଣଙ୍କୁ ଗିରଫ କରିଛି । ବାଲେଶ୍ୱର ଶିଳ୍ପାଞ୍ଚଳ ଥାନା ଅଞ୍ଚଳର ହୋଟେଲ ମାଲିକ ପ୍ରଫୁଲ୍ଲ ବେହେରା ଏବଂ କପ୍ତିପଦା ଥାନା ଜେଏସଜମୁଡିହା ଅଞ୍ଚଳର ଜଣେ ଯୁବକଙ୍କୁ ଗିରଫ କରିଛି। ଅଭିଯୁକ୍ତମାନେ ସିସିଟିଭି ହାର୍ଡଡିସ୍କ, ତାର, ମାଉସ ଆଦିକୁ ଉଦଳା ବନ୍ଧରେ ପକାଇଦେଇଥିବା ବେଳେ ପୋଲିସ ଅଗ୍ନିଶମ ବିଭାଗ ସହାୟତାରେ ଗୋଟିଏ ମାଉସ, ତାର ଆଦି ବନ୍ଧରୁ ବାହାର କରିଛି। ଏହି ଘଟଣାରେ ଅନ୍ୟ ଅଭିଯୁକ୍ତ ସମ୍ପୃକ୍ତ ରହିଥିବା ବେଳେ ପୋଲିସ ସେମାନଙ୍କୁ ଖୋଜୁଛି। ଏହା ସହିତ ମୃତକଙ୍କ ବେକକୁ ଏକ କଟୁରୀରେ ହାଣି ହତ୍ୟା କରାଯାଇଥିବା ପୋଲିସ ଜାଣିବାକୁ ପାଇଥିବା ବେଳେ ଉକ୍ତ କଟୁରୀ ଏବଂ କୋଦାଳକୁ ପୋଲିସ ଜବତ କରିବା ପାଇଁ ଚଢ଼ାଉ ଜାରି ରଖିଛି।