ନୂଆଦିଲ୍ଲୀ: ପୂର୍ବତନ ଭାରତୀୟ କ୍ରିକେଟର ନମନ ଓଝାଙ୍କ ବାପା ଚର୍ଚ୍ଚାରେ । ତାଙ୍କୁ ୭ ବର୍ଷ ଜେଲ୍ ଓ ୧୪ ଲକ୍ଷ ଟଙ୍କାର ଜୋରିମାନ ହୋଇଛି। ଟଙ୍କା ହଡ଼ପ ମାମଲାରେ କୋର୍ଟ ତାଙ୍କୁ ସଜା ଶୁଣାଇଛନ୍ତି । ୨୦୧୩ ମସିହାରେ ମଧ୍ୟପ୍ରଦେଶର ବେତୁଲ ଜିଲ୍ଲାର ବ୍ୟାଙ୍କ ଅଫ୍ ମହାରାଷ୍ଟ୍ରର ଜୌଲଖେଡ଼ା ଶାଖାରେ ପ୍ରାୟ ୧.୨୫ କୋଟି ଟଙ୍କା ଠକେଇ ମାମଲା ରୁଜୁ ହୋଇଥିଲା । ୧୧ ବର୍ଷ ପୁରୁଣା ଏହି ମାମଲାରେ ମୁଲତାଇର ଅତିରିକ୍ତ ସେସନ କୋର୍ଟ ନମନ ଓଝାଙ୍କ ବାପା ବିନୟ କୁମାର ଓଝାଙ୍କୁ ସଜା ଶୁଣାଇଛନ୍ତି।
୨୦୧୩ରେ ଘଟିଥିବା ଏହି ଠକେଇ ମାମଲାରେ ବିନୟ ଓଝାଙ୍କୁ ୨୦୨୨ରେ ବେତୁଲ ପୁଲିସ ଗିରଫ କରିଥିଲା । ବିନୟଙ୍କ ବିରୋଧରେ ଠକେଇ ମାମଲା ରୁଜୁ ହେବା ପରେ ସେ ଦୀର୍ଘ ସମୟ ଧରି ଫେରାର୍ ଥିଲେ । ଜାଲିଆତି ଏବଂ ଅନ୍ୟାନ୍ୟ ଆନୁସଙ୍ଗିକ ଠକେଇ ଅଭିଯୋଗରେ ୨୦୧୩ ମସିହାରେ ବିନୟ ଓଝାଙ୍କ ବିରୋଧରେ ଏଫଆଇଆର ରୁଜୁ କରିଥିଲା ପୋଲିସ । ତାପରେ ସେ ଫେରାର ହୋଇ ଯାଇଥିଲେ ।
ବିନୟ ୩୪ ଟି ନକଲି ଆକାଉଣ୍ଟ ଖୋଲି ଅର୍ଥ ହଡ଼ପ କରିଥିଲେ । କିସାନ କ୍ରେଡିଟ କାର୍ଡରୁ ଋଣ ନେଇ ସେହିସବୁ ଆକାଉଣ୍ଟକୁ ଟ୍ରାନ୍ସଫର କରିଥିଲେ । ନକଲି ଆକାଉଣ୍ଟକୁ ପ୍ରାୟ ୧.୨୫ କୋଟି ଟଙ୍କା ଟ୍ରାନ୍ସଫର କରାଯାଇଥିଲା । ଏହି ମାମଲାରେ ଅନ୍ୟ ଅଭିଯୁକ୍ତ ରତ୍ନାମ , ଧନରାଜ ଏବଂ ଲଖାନଲାଲଙ୍କୁ ମଧ୍ୟ ସଜା ହୋଇଛି । ବିନୟ ଓଝାଙ୍କୁ ୭ ବର୍ଷ ଜେଲ ସମେତ ୭ ଲକ୍ଷ ଟଙ୍କା ଜୋରିମାନା କରାଯାଇଛି । ମୁଖ୍ୟ ଅଭିଯୁକ୍ତ ଅଭିଷେଖ ରତ୍ନମଙ୍କୁ ୧୦ ବର୍ଷ ଜେଲ ସହ ୮୦ ଲକ୍ଷ ଟଙ୍କା ଜୋରିମାନା ଲଗାଇଛନ୍ତି କୋର୍ଟ ।
