ଜୟପୁର, ୧୦।୧୦ : ପାରିବାରିକ କଳହର କରୁଣ ପରିଣତି । ବେକରେ ରଶି ଲଗାଇ ଆତ୍ମହତ୍ୟା କଲେ ସ୍ବାମୀ-ସ୍ତ୍ରୀ । ଜୟପୁର ନିକଟସ୍ଥ ବାମୁଣୀପୁଟ ଗାଁରେ ଏହି ଘଟଣା ଘଟିଛି । ମୃତକ ହେଲେ ସୁକନ ସୌରା ଓ ସୁମିତ୍ରା ସୌରା। ବର୍ଷକ ତଳେ ଉଭୟ ବିବାହ କରିଥିଲେ ।
ଜୟପୁର ନିକଟସ୍ଥ ବାମୁଣୀପୁଟ ଗାଁର ସୁକନ କୌଣସି କାରଣରୁ ନେଇ ଗୁରୁବାର ସକାଳେ ଆତ୍ମହତ୍ୟା କରିଥିଲେ। ଆଉ ଏହା ଦେଖି ସୁମିତ୍ରା ବେକରେ ରଶି ଲଗାଇ ଆତ୍ମହତ୍ୟା ମଧ୍ୟ କରିଥିଲେ। ଗାଁ ଲୋକଙ୍କ ଠାରୁ ଖବର ପାଇ ସଦର ପୋଲିସ ଘଟଣା ସ୍ଥଳରେ ପହଞ୍ଚିଥିଲା । ମୃତଦେହ ଜବତ କରି ଘଟଣାର ତଦନ୍ତ କରୁଛି। ଉଭୟେ ବାପା ମାଆ ଓ ପରିବାର ଲୋକଙ୍କ ଠାରୁ ସେମାନେ ଅଲଗା ରହୁଥିଲେ। ସୁକନ ଜୟପୁରରେ ଖଲାସି କାମ କରୁଥିଲେ। ଏହି ଘଟଣା ପଛରେ ପାରିବାରିକ କଳହକୁ ଦାୟୀ କରାଯାଉଥିଲେ ବି ଉଭୟଙ୍କ ମଧ୍ୟରେ କଳହ ଥିବା କଥାକୁ ସୁକନଙ୍କ ପରିବାର ଲୋକ ଖଣ୍ଡନ କରିଛନ୍ତି।
ଅନ୍ୟପକ୍ଷରେ ଏହା ଆତ୍ମହତ୍ୟା ନୁହେଁ ବରଂ ଉଭୟଙ୍କୁ କେହି ହତ୍ୟା କରି ଆତ୍ମହତ୍ୟାର ରୂପ ଦେଉଥିବା ଅଭିଯୋଗ କରିଛନ୍ତି ସୁମିତ୍ରାଙ୍କ ପରିବାର ଲୋକେ । ସ୍ବାମୀ ଆତ୍ମହତ୍ୟା କରିବା ପରେ ସ୍ତ୍ରୀ ନିଶ୍ଚୟ ଚିତ୍କାର କରିଥିବ । ହେଲେ ଏହା ନକରି ସେ ବି କିପରି ଆତ୍ମହତ୍ୟା କଲା ବୋଲି ପ୍ରଶ୍ନ କରିଛନ୍ତି ।
