ନୂଆଦିଲ୍ଲୀ: ଜାମ୍ମୁକାଶ୍ମୀର ବିଧାନସଭା ନିର୍ବାଚନ ପାଇଁ କଂଗ୍ରେସ ଜୋରଦାର ପ୍ରସ୍ତୁତି ଚଳାଇଛି । ରାଜ୍ୟରେ ନିର୍ବାଚନ ପ୍ରଚାର ଆରମ୍ଭ କରିସାରିଛି ଦଳ । ନିର୍ବାଚନ ଲାଗି ଦଳ ଆଉ ଏକ ଷ୍ଟାର ପ୍ରଚାରକ ତାଲିକା ଜାରି କରିଛି । ଏହି ତାଲିକାରେ ଦଳର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ, ପୂର୍ବତନ ଅଧ୍ୟକ୍ଷ ସୋନିଆ ଗାନ୍ଧୀ, ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ସମେତ ୪୦ ନେତାଙ୍କ ନାମ ସାମିଲ ରହିଛି । 

 କଂଗ୍ରେସର ଷ୍ଟାର ପ୍ରଚାରକ ତାଲିକାରେ ଆମେଥି ସାଂସଦ କିଶୋରୀ ଲାଲ ଶର୍ମାଙ୍କ ନାମ ମଧ୍ୟ ସାମିଲ ଅଛି । ଲୋକସଭା ନିର୍ବାଚନରେ ବିଜୟୀ ହେବା ପରେ ଦଳରେ ତାଙ୍କର ପତିଆରା ବୃଦ୍ଧି ପାଇଛି । ଜାମ୍ମୁକାଶ୍ମୀର ନିର୍ବାଚନ ଲାଗି କଂଗ୍ରେସର ଷ୍ଟାର ପ୍ରଚାରକଙ୍କ ମଧ୍ୟରେ ହିମାଚଳ ପ୍ରଦେଶର ମୁଖ୍ୟମନ୍ତ୍ରୀ ସୁଖବିନ୍ଦର ସିଂହ ସୁଖୁ, ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ଚରଣଜିତ ସିଂହ ଚଇନି, ରାଜସ୍ଥାନର ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କୁ ମଧ୍ୟ ସ୍ଥାନ ମିଳିଛି । 

 ଏହା ବ୍ୟତୀତ କଂଗ୍ରେସର ସାଧାରଣ ସଂପାଦକ କେସି ବେଣୁଗୋପାଳଙ୍କ ଦ୍ବାରା ଜାରି ଏହି ତାଲିକାରେ ଜୟରାମ ରମେଶ, ଅମ୍ବିକା ସୋନୀ, ଅଜୟ ମାକନ, ସଲମାନ ଖୁର୍ସିଦ ଏବଂ କହ୍ନେୟା କୁମାରଙ୍କୁ ସାମିଲ କରାଯାଇଛି । ଜାମ୍ମୁକାଶ୍ମୀରରେ ପ୍ରଥମ ଚରଣ ନିର୍ବାଚନ ସେପ୍ଟେମ୍ବର ୧୮ରେ ହେବ । ପ୍ରଥମ ଚରଣ ନିର୍ବାଚନ ଲାଗି ଗୁରୁବାର ୪୦ ଷ୍ଟାର ପ୍ରଚାରକଙ୍କ ତାଲିକା ଜାରି କରିଥିଲା କଂଗ୍ରେସ ।

 ଜାମ୍ମୁକାଶ୍ମୀର ବିଧାନସଭା ନିର୍ବାଚନ ୩ଟି ପର୍ଯ୍ୟାୟ ସେପ୍ଟେମ୍ବର ୧୮, ସେପ୍ଟେମ୍ବର ୨୫ ଏବଂ ଅକ୍ଟୋବର ୧ରେ ଅନୁଷ୍ଠିତ ହେବ । ଅକ୍ଟୋବର ୮ରେ ଫଳାଫଳ ପ୍ରକାଶ ପାଇବ । ଏହି ନିର୍ବାଚନରେ କଂଗ୍ରେସ ଫାରୁଖ ଅବଦୁଲ୍ଲାଙ୍କ ଦଳ ନ୍ୟାସନାଲ୍‌ କନଫରେନ୍ସ ସହ ମେଣ୍ଟ କରିଛି । ଜାମ୍ମୁକାଶ୍ମୀରରେ ୨୦୧୪ ପରେ ପ୍ରଥମ ଥର ବିଧାନସଭା ନିର୍ବାଚନ ହେବାକୁ ଯାଉଛି। ଆଉ ଏହି ନିର୍ବାଚନ ଲାଗି ଉଭୟ ଜାତୀୟ ଏବଂ ଆଞ୍ଚଳିକ ଦଳ ଜୋର ଲଗାଇ ଦେଇଛନ୍ତି ।