ନୂଆଦିଲ୍ଲୀ,୧୬/୦୯: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଘୋଷଣା ହେବା ପରେ ସୋମବାର ଦିନ ରାଜଧାନୀରେ ରାଜନୈତିକ କାର୍ଯ୍ୟକଳାପ ତୀବ୍ର ରହିଥିଲା। ଆମ୍ ଆଦମୀ ପାର୍ଟିରେ ନେତାଙ୍କ ଅନେକ ପର୍ଯ୍ୟାୟ ବୈଠକ ଅନୁଷ୍ଠିତ ହୋଇଥିଲା। ତା’ପରେ ସନ୍ଧ୍ୟାରେ ଦଳର ପିଏସିର ଏକ ବୈଠକ ମଧ୍ୟ ଅନୁଷ୍ଠିତ ହୋଇଥିଲା ଯେଉଁଥିରେ ସମ୍ଭାବ୍ୟ ସିଏମ୍‌ଙ୍କ ନାଁ ଉପରେ ଆଲୋଚନା କରାଯାଇଥିଲା। ବୈଠକ ପରେ ଆପ୍ ନେତା ସୌରଭ ଭରଦ୍ୱାଜ କହିଛନ୍ତି ଯେ ଆସନ୍ତାକାଲି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ତାଙ୍କ ପଦରୁ ଇସ୍ତଫା ଦେବେ। ଏଥିପାଇଁ ସେ ଉପରାଜ୍ୟପାଳଙ୍କ ଠାରୁ ସମୟ ମାଗିଛନ୍ତି।

ଦିଲ୍ଲୀ ସରକାରରେ ଥିବା ମନ୍ତ୍ରୀ ସୌରଭ ଭରଦ୍ୱାଜ କହିଛନ୍ତି ଯେ ସିଏମ୍ କେଜ୍ରିୱାଲ ରାଜନୈତିକ ବ୍ୟାପାର କମିଟି ବୈଠକରେ ଉପସ୍ଥିତ ଥିବା ସମସ୍ତ ଲୋକଙ୍କ ସହ ଗୋଟିଏ ପରେ ଗୋଟିଏ ଆଲୋଚନା କରିଛନ୍ତି। ଆସନ୍ତାକାଲି ସକାଳ ୧୧.୩୦ ରେ ବିଧାୟକ ଦଳର ଏକ ବୈଠକ ହେବ ଯେଉଁଥିରେ ଦ୍ୱିତୀୟ ପର୍ଯ୍ୟାୟ ଆଲୋଚନା ହେବ। ସେଠାରେ ଅରବିନ୍ଦ କେଜ୍ରିୱାଲ ସମସ୍ତଙ୍କ ସହ ଜଣ ଜଣ କରି କଥା ହେବେ, ତା’ପରେ ନାଁ ସ୍ଥିର ହେବ।