ନୂଆଦିଲ୍ଲୀ: ହରିୟାଣା ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ପାଇଁ ବଡ଼ ଆହ୍ବାନ ସୃଷ୍ଟି ହୋଇଛି । ଆସନ ବୁଝାମଣାକୁ ନେଇ ଆମ ଆଦମୀ ପାର୍ଟି ଏବଂ କଂଗ୍ରେସ ମଧ୍ୟରେ ଛକାପଞ୍ଝା ଲାଗି ରହିଛି । ଆପ ୨୦ଟି ଆସନ ଦାବି କରୁଥିବା ବେଳେ କଂଗ୍ରେସ ଏଥିରେ ରାଜି ନାହିଁ । କଂଗ୍ରେସର କେନ୍ଦ୍ରୀୟ ନିର୍ବାଚନ କମିଟିର ପ୍ରଥମ ବୈଠକରେ ଆପ୍ର ବିଦ୍ରୋହ କଂଗ୍ରେସ ପାଇଁ ଚିନ୍ତାର କାରଣ ପାଲଟିଛି ବୋଲି ସୂତ୍ର ଆଧାରରେ ସୂଚନା ମିଳିଛି । ହରିୟାଣାରେ ଶାସକ ବିଜେପିକୁ ମାତ ଦେବାକୁ କଂଗ୍ରେସ ପାଇଁ ଏହି ବୈଠକ ଗୁରୁତ୍ବପୂର୍ଣ୍ଣ ଥିଲା । ସହଯୋଗୀ ଦଳଗୁଡ଼ିକ ନିଜ ନିଜର ଏଜେଣ୍ଡା ପାଇଁ କଂଗ୍ରେସର ଫର୍ମୁଲାରେ ରାଜି ହେଉନଥିବା କୁହାଯାଉଛି ।
ବିଜେପିକୁ ମାତ ଦେଇ ହରିୟାଣାରେ ସରକାର ଗଢ଼ିବାକୁ ବେଶ ଆଶାବାଦୀ କଂଗ୍ରେସ । ଏଭଳି ସ୍ଥିତିରେ ନିଜର ସହଯୋଗୀ ଦଳଙ୍କୁ କେତୋଟି ଆସନରେ ଲଢ଼ିବା ପାଇଁ ଦିଆଯିବ ସେନେଇ କଂଗ୍ରେସ ନିଷ୍ପତ୍ତି ନେଉଛି । ହେଲେ ଏଭଳି ସ୍ଥିତିରେ ଆପ୍ ୨୦ଟି ଆସନ ଦାବି କରୁଥିବା ଜଣାପଡ଼ିଛି । ଗତ ଲୋକସଭା ନିର୍ବାଚନରେ ସଫଳତାକୁ ଦେଖି ଆପ୍ ବିଧାନସଭା ନିର୍ବାଚନରେ ୨୦ଟି ଆସନରେ ଲଢ଼ିବ ବୋଲି ଦାବି କରୁଛି । ସେପଟେ ଇଣ୍ଡି ମେଣ୍ଟରେ ଉଭୟ କଂଗ୍ରେସ ଏବଂ ଆପ୍ ସହଯୋଗୀ ହୋଇଥିବା ବେଳେ ଏହି ମେଣ୍ଟ ଜାତୀୟସ୍ତରରେ କାର୍ଯ୍ୟ କରୁଛି । କିନ୍ତୁ ରାଜ୍ୟ ନିର୍ବାଚନରେ ସହଯୋଗୀଙ୍କ ମଧ୍ୟରେ ମତଭେଦ ଦେଖିବାକୁ ମିଳୁଛି । ଏସବୁ ବିବାଦ ସତ୍ତ୍ବେ କଂଗ୍ରେସ ନେତା ବିଶେଷ କରି ରାହୁଲ ଗାନ୍ଧୀ ଆପ୍ ସହ ଏକ ଦୂରଦର୍ଶୀ ମେଣ୍ଟ କରିବାକୁ ଇଚ୍ଛା ରଖିଛନ୍ତି ।
ଏଭଳି ସ୍ଥିତିରେ ଆପ୍ର ଦାବିକୁ ନଜରରେ ରଖି ଅଧିକ ସିଟ୍ ଦେବାକୁ ନିଷ୍ପତ୍ତି ନେଇପାରେ କଂଗ୍ରେସ । ସେପଟେ ଏହା ପୂର୍ବରୁ ଦିଲ୍ଲୀ ନିର୍ବାଚନରେ କଂଗ୍ରେସ ଏବଂ ଆପ୍ ମଧ୍ୟରେ ମେଣ୍ଟ ସଫଳ ହୋଇପାରି ନଥିଲା । ତେବେ ହରିୟାଣାରେ ଆପ୍ ୨୦ ଆସନ ଦାବି କରୁଥିବା ବେଳେ କଂଗ୍ରେସ ଏହାକୁ ୨ କିମ୍ବା ୩ଟି ଆସନ କମାଇ ଅଫର କରିପାରେ । ସେହିଭଳି ସମାଜବାଦୀ ପାର୍ଟିକୁ ମଧ୍ୟ କଂଗ୍ରେସ ସନ୍ତୁଷ୍ଟ କରିବାକୁ ଚେଷ୍ଟା କରିବ । ଏସବୁ ଭିତରେ, ହରିୟାଣାରେ ଆପ୍ ସହ ନିର୍ବାଚନ ଲଢ଼ିବାକୁ ରାହୁଲ ଗାନ୍ଧୀଙ୍କ ଇଚ୍ଛାକୁ ସମ୍ମାନ ଜଣାଇଛନ୍ତି ଆପ୍ ସାଂସଦ ସଂଜୟ ସିଂହ । ଭାରତୀୟ ଜନତା ପାର୍ଟିକୁ ପରାସ୍ତ କରିବା ଆମର ପ୍ରଥମ ଲକ୍ଷ୍ୟ ବୋଲି ସେ କହିଛନ୍ତି । ୯୦ ଆସନ ବିଶିଷ୍ଟ ହରିୟାଣାରେ ଅକ୍ଟୋବର ୫ରେ ନିର୍ବାଚନ ହେବ । ଅକ୍ଟୋବର ୯ରେ ଫଳାଫଳ ପ୍ରକାଶ ପାଇବ ।
