ନୂଆଦିଲ୍ଳୀ,୨୨।୯:ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବର୍ତ୍ତମାନ କ୍ବାଡ ସମୁହର ବୈଠକରେ ଯୋଗଦେବା ପାଇଁ ଆମେରିକା ଗସ୍ତରେ ଅଛନ୍ତି। କ୍ବାଡ ମିଟିଂରେ ଆମେରିକା ସହିତ ସବୁ ସଦସ୍ୟ ରାଷ୍ଟ୍ର ଦକ୍ଷିଣ ଚୀନ୍ ସାଗର ଓ ଏସିଆରେ ଚୀନ୍‌ର ବଢୁଥିବା ଆକ୍ରାମକ ସ୍ବଭାବକୁ ବିପଦ ବୋଲି କହିଛନ୍ତି। ତେବେ କ୍ବାର୍ଡ ସମ୍ମିଳନୀକୁ ନେଇ ଚୀନ୍ ନିଜର କଡା ମନ୍ତବ୍ୟ ଦେଇଛି। 

ଚୀନ୍ ସରକାରୀ ମୁଖପାତ୍ର ଗ୍ଲୋବାଲ ଟାଇମ୍ସ କ୍ବାଡ ଶିଖର ସମ୍ମିଳନୀ ଉପରେ ନିଜର ମନ୍ତବ୍ୟ ଦେଇ କହିଛନ୍ତି, ଚୀନ୍ ସହିତ ନିଜର ପ୍ରତିଯୋଗିତାକୁ ବଢାଇବା ପାଇଁ ଆମେରିକା, କ୍ବାଡ ରୂପରେ ଏକ ଛୋଟ ଗୋଷ୍ଠୀ ତିଆରି କରୁଛି କିନ୍ତୁ ଏହି ୪ ଦେଶର ଜାତୀୟ ହିତ ଅଲଗା ଅଲଗା ରହିଛି। ଏହି ଦେଶ ସହ ଚୀନ୍‌ର ମଧ୍ୟ ଗୁରୁତ୍ବପୂର୍ଣ୍ଣ ଓ ପୁରୁଣା ସମ୍ପର୍କ ରହିଛି ତେଣୁ ଏହି ଗୋଷ୍ଠୀର ଭବିଷ୍ୟତ ଅନ୍ଧକାରମୟ ଏବଂ ଅନିଶ୍ଚିତତା ଭିତରେ ରହିଛି। 

ଉଲ୍ଲେଖନୀୟ ଯେ, ଚୀନ୍‌ର ବଢୁଥିବା ଆକ୍ରାମକ ସ୍ବଭାବକୁ କାଉଣ୍ଟର କରିବା ପାଇଁ କ୍ବାଡ ସମୂହ ପୁଣିଥରେ ସକ୍ରିୟ ହୋଇଛନ୍ତି। ଆମେରିକା ରାଷ୍ଟ୍ରପତି ଏହି ସମ୍ମିଳନୀ ପରେ ହୋଇଥିବା ସାମ୍ବାଦିକ ସମ୍ମିଳନୀରେ କହିଛନ୍ତି, ଚୀନ୍‌ ଆମର ଲଗାତାର ପରୀକ୍ଷା ନେଉଛି। ଏହାର ଏସିଆ-ପ୍ରଶାନ୍ତ କ୍ଷେତ୍ରରେ ଆକ୍ରାମକ ବ୍ୟବହାର ଜାରି ରହିଛି। ବାଇଡେନ୍ କହିଛନ୍ତି, କ୍ବାଡ ମତରେ ତୀବ୍ର ପ୍ରତିଯେଗିତାର ସମୟରେ ଗହନ କୁଟନୀତି ରହିବା ଜରୁରୀ।