ନୂଆଦିଲ୍ଲୀ: ଇସ୍ରାଏଲ ଏବଂ ଲେବାନନ ମଧ୍ୟରେ କ୍ରମାଗତ ଭାବରେ ଉତ୍ତେଜନା ବୃଦ୍ଧି ପାଇବାରେ ଲାଗିଛି । ହିଜବୁଲ୍ଲା ଉପରେ ପ୍ରଭାବ ବିସ୍ତାର କରିବାକୁ ଇସ୍ରାଏଲ ଲେବାନନର ୩ଶହ ଠିକଣା ଉପରେ ଆକ୍ରମଣ କରିଛି। ଇସ୍ରାଏଲ୍ ସେନା ପକ୍ଷରୁ ଏହି ଦାବି କରାଯାଇଛି । ତେବେ ଲେବାନନ୍ ଏବଂ ହିଜବୁଲ୍ଲା ପକ୍ଷରୁ ହୋଇଥିବା ଆକ୍ରମଣ ସମ୍ପର୍କରେ ଏପର୍ଯ୍ୟନ୍ତ କୌଣସି ସୂଚନା ସାମ୍ନାକୁ ଆସି ନାହିଁ।
ଗାଜା ଯୁଦ୍ଧର ଶିକାର ହୋଇଥିବା ପଶ୍ଚିମ ଏସିଆର ଅନ୍ୟ ଏକ ମୋର୍ଚ୍ଚା ଉପରେ ଆକ୍ରମଣ ତୀବ୍ର ହୋଇଛି । ଲେବାନାନର ସମର୍ଥକ ହିଜବୁଲ୍ଲା ଏବଂ ଇସ୍ରାଏଲ ମଧ୍ୟରେ ତିକ୍ତତା ଚରମ ସୀମାରେ ରହିଛି । ଅନ୍ତର୍ଜାତୀୟ ସମୁହର ଚେତାବନୀକୁ ଅଣଦେଖା କରି ଉଭୟ ପରସ୍ପରର ସୀମା ଉପରେ ଆକ୍ରମଣକୁ ଆହୁରି ଜୋରଦାର କରିବାକୁ ଧମକ ଦେଇଛନ୍ତି । ଇସ୍ରାଏଲ ବିରୁଦ୍ଧରେ ହାମାସକୁ ସମର୍ଥନ କରିବାକୁ ଛିଡା ହୋଇଥିବା ହିଜବୁଲ୍ଲାର ଅଣ୍ଟାକୁ ସଂପୂର୍ଣ୍ଣ ଭାଙ୍ଗିବାକୁ ଇସ୍ରାଏଲ୍ ସଂକଳ୍ପ ବଦ୍ଧ । ଲଗାତାର ଅନେକ ଦିନ ଧରି ହିଜବୁଲ୍ଲା ବିରୋଧରେ ଇସ୍ରାଏଲ ଜୋରଦାର କାର୍ଯ୍ୟାନୁଷ୍ଠାନ ଗ୍ରହଣ କରିଛି । ପ୍ରଥମେ ପେଜର୍, ତାପରେ ଓ୍ବାକି-ଟକି ଏବଂ ତା’ପରେ ଏୟାର ଷ୍ଟ୍ରାଇକ୍ କରିଛି । ଏଥି ସହିତ ହିଜବୁଲ୍ଲା ମୁଖ୍ୟ ନାସରାଲ୍ଲା ମଧ୍ୟ ଏହାର ପରିଣାମର ସମ୍ମୁଖୀନ ହେବାକୁ ଚେତାବନୀ ଦେଇଛନ୍ତି ।
ରବିବାର ଦିନ ହିଜବୁଲ୍ଲା ଉତ୍ତର ଇସ୍ରାଏଲକୁ ୧୦୦ରୁ ଅଧିକ ରକେଟ୍ ମାଡ କରିଥିଲା । ଇସ୍ରାଏଲର ହାଇଫା ସହର ନିକଟରେ ଏହି ରକେଟ ଗୁଡ଼ିକ ଖସିପଡିଥିଲା । ଏହି ଆକ୍ରମଣରେ ୪ ଜଣ ଆହତ ହୋଇଛନ୍ତି । ରକେଟ ଆକ୍ରମଣ ପରେ ହିଜବୁଲ୍ଲାର ଉପନେତା ନାଏମ କାସୀମ ଖୋଲା ଯୁଦ୍ଧ ଘୋଷଣା କରିଥିଲେ।ଏହାର ପ୍ରତିଶୋଧ ନେଇ ଇସ୍ରାଏଲ୍ ଦକ୍ଷିଣ ଲେବାନନରେ ହିଜବୁଲ୍ଲା ଠିକଣା ଉପରେ ଆକ୍ରମଣ କରିଥିଲା, ଯେଉଁଥିରେ ଏୟାରବେସ୍ ଏବଂ ସାମରିକ ଉତ୍ପାଦନ କେନ୍ଦ୍ର ମଧ୍ୟ ରହିଥିଲା ।
