ସମ୍ବଲପୁର,୦୮/୦୯: ନୂଆଁଖାଇରେ ସାମିଲ ହେବାକୁ  ରବିବାର ସମ୍ବଲପୁର ଆସୁଛନ୍ତି ମୁଖ୍ୟମନ୍ତ୍ରୀ ମୋହନ  ଚରଣ ମାଝୀ । ତାଙ୍କ ସହ ଆସୁଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ତଥା  ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ । ମା’ ସମଲେଶ୍ୱରୀଙ୍କ  ମନ୍ଦିରରେ ଅନ୍ୟ ନେତା ମନ୍ତ୍ରୀଙ୍କ ଗହଣରେ ଉଭୟେ  ନବାନ୍ନ ଭକ୍ଷଣ କରିବେ । ସକାଳ ସାଢ଼େ ୯ଟା ସୁଦ୍ଧା ମା’ଙ୍କ  ନିକଟରେ ନବାନ୍ନ ଲାଗି ହେବ । ଏହା ପରେ ଅନ୍ୟ ପାଶ୍ୱର୍ ଦେବାଦେବୀଙ୍କ ନିକଟରେ ନବାନ୍ନ ଅର୍ପଣ କରାଯିବ ।  

ନୂଆଁଖାଇରେ ସମ୍ବଲପୁର ସମେତ ପଶ୍ଚିମ ଓଡ଼ିଶାର  ଭକ୍ତମାନେ ମା’ଙ୍କ ଦର୍ଶନ ପାଇଁ ଆସୁଥିବାରୁ ମନ୍ଦିରରେ ନାହିଁ  ନ ଥିବା ଭିଡ଼ ହୋଇଥାଏ । ଏଭଳି ସ୍ଥିତିରେ ମୁଖ୍ୟମନ୍ତ୍ରୀଙ୍କ  ଗସ୍ତ ପାଇଁ ମନ୍ଦିର ପରିସରରେ କଡ଼ା ସୁରକ୍ଷା ବ୍ୟବସ୍ଥା  ହୋଇଛି । ସାଧାରଣ ଦର୍ଶନ ପାଇଁ ସମୟ ନିର୍ଘଣ୍ଟ ଧାର୍ଯ୍ୟ  କରାଯାଇଛି । ନବାନ୍ନ ବିଧି ପରେ ମହା ଆଳତି, ଅନ୍ନଭୋଗ  ଆଦି ରୀତି ନୀତି ଥିବାରୁ ମଧ୍ୟାହ୍ନ ସାଢ଼େ ୧୨ଟା ପରେ  ସର୍ବସାଧାରଣ ଦର୍ଶନ ଆରମ୍ଭ ହେବ ବୋଲି ସ୍ଥିରୀକୃତ ହୋଇଛି ।