ଭୁବନେଶ୍ୱର, ୧୦।୧୧ : ପୂର୍ବତଟ ରେଳପଥର ମହାପ୍ରବନ୍ଧକ ପରମେଶ୍ୱର ଫୁଙ୍କୱାଲ ଶନିବାର ଖୋର୍ଦ୍ଧା ରୋଡ-ବଲାଙ୍ଗୀର ରେଳ ଲାଇନ ପ୍ରକଳ୍ପର ଅଗ୍ରଗତିର ସମୀକ୍ଷା କରିବା ପାଇଁ ବୌଦ୍ଧ ଏବଂ ପୁରୁଣାକଟକ ମଧ୍ୟରେ ନୂତନ ଭାବେ ନିର୍ମିତ ରେଳ ଲାଇନର ନିରୀକ୍ଷଣ କରିଛନ୍ତି  | ଏହି ନିରୀକ୍ଷଣ ପ୍ରକଳ୍ପର ଠିକ ସମୟରେ ସମାପ୍ତି କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଯାହା ଓଡିଶାର ଉପାନ୍ତ ତଥା ଆକାଂକ୍ଷୀ ଅଞ୍ଚଳରେ ସଂଯୋଗକୁ ସୁଦୃଢ଼ କରିବାକୁ ପଦକ୍ଷେପ ନିଆଯାଇଅଛି  |  

ନିର୍ମାଣ ୟୁନିଟ୍ ଦ୍ୱାରା ବୌଦ୍ଧ ଏବଂ ପୁରୁଣାକଟକ ମଧ୍ୟରେ ଥିବା ନୂତନ ନିର୍ମିତ ଟ୍ରାକ୍ ରେ ଇଞ୍ଜିନ ଗଡ଼ିବା ଏବଂ ପରୀକ୍ଷଣ ସଫଳତାର ସହିତ ସମାପ୍ତ ହୋଇସାରିଛି । ଖୋର୍ଦ୍ଧା ରୋଡ୍-ବଲାଙ୍ଗୀର ରେଳ ଲାଇନ ପ୍ରକଳ୍ପର ମୋଟ ୩୦୧ କିଲୋମିଟର ଦୈର୍ଘ୍ୟ ମଧ୍ୟରୁ ଆଜି ପର୍ଯ୍ୟନ୍ତ ୨୨୬ କିଲୋମିଟରର କାର୍ଯ୍ୟ ଶେଷ ହୋଇଛି ଏବଂ ତନ୍ମଧ୍ୟରୁ ୧୯୯ କିଲୋମିଟର କାର୍ଯ୍ୟକ୍ଷମ ହୋଇସାରିଛି ।

ଶ୍ରୀ ଫୁଙ୍କୱାଲ ତାଙ୍କ ଯାଞ୍ଚ ସମୟରେ ନିର୍ମାଣର ଗତିଧାରା ବଜାୟ ରଖିବା ଏବଂ ସମସ୍ତ ପ୍ରସ୍ତାବିତ ଷ୍ଟେସନରେ ଆବଶ୍ୟକ ଯାତ୍ରୀ ସୁବିଧା ସୁନିଶ୍ଚିତ କରିବା ଉପରେ ଗୁରୁତ୍ୱାରୋପ କରିଥିଲେ । କଠିନ ଭୂମି, ବିଶେଷକରି ଟନେଲ ଥିବା ରେଳ ସେକ୍ସନ ମାନଙ୍କରେ ଇଂଜିନିୟରିଂ ଆହ୍ୱାନ ସତ୍ତ୍ୱେ ଏହି ପ୍ରକଳ୍ପ ଠିକ ସମୟରେ ଶେଷ ହେବ  ବୋଲି କହିଛନ୍ତି।

ରେଳ ସୁରକ୍ଷା ଆୟୁକ୍ତ (କମିଶନର) (CRS) ଙ୍କ ସଫଳ ନିରୀକ୍ଷଣ ଓ ତାଙ୍କର ଅନୁମତି ପାଇବା ପରେ ଏବଂ ଆନୁସଙ୍ଗିକ ଭିତ୍ତିଭୂମି ତଥା ଯାତ୍ରୀ ସୁବିଧା ଗୁଡିକର କାର୍ଯ୍ୟ ସମାପ୍ତ ହେବା ପରେ ନୂତନ ଭାବେ ନିର୍ମିତ ରେଳ ସେକ୍ସନ ଗୁଡ଼ିକରେ ଟ୍ରେନ୍ ସେବା ଚଳାଇବାକୁ ନିଷ୍ପତ୍ତି ନିଆଯିବ | ନିୟମିତ କାର୍ଯ୍ୟ ପାଇଁ ଟ୍ରାକର ଫିଟନେସ୍ ସୁନିଶ୍ଚିତ କରିବାକୁ ଏକ ହାଲୁକା ଇଞ୍ଜିନ୍ ଟ୍ରାଏଲ୍ ରନ୍ ପୂର୍ବରୁ ପରୀକ୍ଷଣ କରାଯାଇଛି |