ଭୁବନେଶ୍ୱର, ୨୩/୦୯ : ଭରତପୁର ଥାନା ହଙ୍ଗାମା ଘଟଣା ନେଲା ନୂଆ ମୋଡ଼ । ୬ ଘଣ୍ଟିଆ ରାଜଧାନୀ ବନ୍ଦ ଡାକରାକୁ ବନ୍ଦ କଲା ବିଜୁ ଜନତା ଦଳ । ମଙ୍ଗଳବାର ଦିନ ହେବାକୁ ଥିବା ବନ୍ଦ ଡାକରାକୁ ସାମୟିକ ଭାବେ ସ୍ଥଗିତ କଲା ବିଜେଡି । 

ସୂଚନା ମୁତାବକ, ଭରତପୁର ଥାନାରେ କିଛି ଦିନ ତଳେ ଏକ ମାମଲା ସାମ୍ନାକୁ ଆସିଥିଲା । ଭରତପୁର ଥାନା ମାମଲାର ବିଚାର ବିଭାଗୀୟ ତଦନ୍ତ କରିବାକୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିର୍ଦ୍ଦେଶ ଦେଇଛନ୍ତି । ରବିବାର ଲୋକସେବା ଭବନରେ ମୁଖ୍ୟମନ୍ତ୍ରୀ  ମନ୍ତ୍ରିସ୍ତରୀୟ କମିଟି ବୈଠକ ପରେ ଏହି ନିର୍ଦ୍ଦେଶ ଦେଇଛନ୍ତି । ବିଚାରପତି ଜଷ୍ଟିସ୍‌ ଚିତ୍ତରଂଜନ ଦାଶ ଏହି ତଦନ୍ତ ଦାୟିତ୍ୱ ନେବେ । ୬୦ ଦିନ ମଧ୍ୟରେ ରିପୋର୍ଟ ପ୍ରଦାନ କରିବା ପାଇଁ କମିଶନଙ୍କୁ  ଅନୁରୋଧ କରାଯାଇଛି । 

ପୋଲିସ ସହ ମେଜର ଏବଂ ତାଙ୍କ ବାନ୍ଧବୀଙ୍କ ହଙ୍ଗାମା ଘଟଣାରେ ଆନ୍ଦୋଳନ କରିଥାନ୍ତା ବିଜେଡି । ତେବେ ରବିବାର ଏକ ପ୍ରେସ୍‌ମିଟ ମାଧ୍ୟମରେ ଏନେଇ ସୂଚନା ଦିଆଯାଇଥିଲା । ଏହି ପ୍ରେସ୍‌ମିଟରେ ଦିଆଯାଇଥିବା ସୂଚନା ଅନୁସାରେ ଆସନ୍ତା କାଲି ଅର୍ଥାତ ମଙ୍ଗଳବାର ସକାଳ ୬ଟା ରୁ ମଧ୍ୟାହ୍ମ ୧୨ଟା ପର୍ଯ୍ୟନ୍ତ ଆନ୍ଦୋଳନ ହୋଇଥାନ୍ତା । ଏହି ଆନ୍ଦୋଳନ ଭୁବନେଶ୍ୱରରେ ଦୀର୍ଘ ୬ ଘଣ୍ଟା ଘରି ଚାଲିଥାନ୍ତା । ଏଥିରେ କେବଳ ଜରୁରୀକାଳୀନ ସେବାକୁ ବାଦ୍‌ ଦିଆଯାଇଥିଲା ।କିନ୍ତୁ ଏହି ଆନ୍ଦୋଳନ ଡାକରା ଦେବାର ଗୋଟିଏ ଦିନ ପରେ ପ୍ରତ୍ୟାହୃତ ହୋଇଛି । ବିଜେଡି ପକ୍ଷରୁ ମଙ୍ଗଳବାର ଦିନ ହେବାକୁ ଥିବା ୬ ଘଣ୍ଟିଆ ବନ୍ଦ ଡାକରାକୁ ସାମୟିକ ଭାବେ ସ୍ଥଗିତ ରଖାଯାଇଛି ।